Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2013

 SUHETO ITI AKKUB | ANIA TI MENSAHE TI BIBLIA?

Ti Inaramid ti Dios a Mangispal iti Sangatauan

Ti Inaramid ti Dios a Mangispal iti Sangatauan

Inkari ti Dios ken matalek nga Abraham nga agtaud iti kaputotanna ti naipadto a “bin-i.” Babaen iti dayta, mabendisionanto dagiti tattao iti “amin a nasion.” (Genesis 22:18) Idi agangay, immakar idiay Egipto ni Jacob nga apoko ni Abraham. Sadiay a dimmakkel ti pamiliana a nagbalin a nasion ti Israel.

Idi agangay, ti naulpit a Faraon ti Egipto inadipenna dagiti Israelita agingga a dinutokan ti Dios ni Moises kas propeta. Indauluanna ti nasion ti Israel a rummuar iti Egipto babaen ti milagro a panangbisngayna iti Nalabaga a Baybay. Kalpasanna, nangted ti Dios kadagiti linteg iti Israel a pakairamanan ti Sangapulo a Bilin a mangiwanwan ken mangsalaknib kadakuada. Espesipiko nga ibaga ti linteg ti idatonda tapno mapakawan dagiti basolda. Pinaltiingan ti Dios ni Moises nga ibagana iti Israel a mangibaon ti Dios iti sabali a propeta nga isu ti naikari a “bin-i.”

Nasurok nga 400 a tawen kalpasanna, inkari ti Dios ken Ari David a ti “bin-i” a naipadto idiay Eden, iturayannanto ti maysa a pagarian nga agtalinaed iti agnanayon. Isu ti Mesias, ti Mangisalakan a dinutokan ti Dios a mangispal iti sangatauan ken mangisubli iti Paraiso ditoy daga.

Babaen ken David ken ti dadduma pay a propeta, in-inut nga impalgak ti Dios ti ad-adu pay maipapan iti Mesias. Impadtoda nga isu ket napakumbaba ken naasi ken babaen iti turayna pukawenna ti bisin, kinaawan hustisia, ken gubat. Agkakappianto dagiti tattao ken animal. Awanton ti sakit, panagsagaba, ken ipapatay a saan a paset ti orihinal a panggep ti Dios, ken mapagungarto dagiti natay ditoy daga.

Babaen ken propeta Mikias, impadto ti Dios a maipasngay ti Mesias idiay Betlehem ken impadto ni propeta Daniel a mapapatayto. Ngem ti Mesias pagungarento ti Dios ken dutokanna kas Ari idiay langit. Nasirmata met ni Daniel a ti Mesianiko a Pagarian, sukatannanto amin a gobierno ti tao. Kas naipadto, talaga kadi a dimteng ti Mesias?

Naibasar iti Genesis kapitulo 22-50, kasta met ti Exodo, Deuteronomio, 2 Samuel, Salmo, Isaias, Daniel, Mikias, Zacarias 9:9.