Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2013

Ania ti Epekto Kenka Dagiti Kolor?

Ania ti Epekto Kenka Dagiti Kolor?

No kumitaka iti aglawlaw, agtinnulong ti mata ken utekmo nga agurnong iti impormasion. No adda makitam a prutas, maibagam no kayatmo a kanen dayta. No kumitaka iti tangatang, maibagam no agtudo wenno saan. No makitam dagiti sasao a basbasaem, maibagam ti kaipapananda. Kinapudnona, talaga nga adda epekto kenka dagiti kolor.

No makitam ti kolor ti prutas, ammom no naluomen ken mabalinen a kanen. Maibagam ti paniempo no makitam ti kolor ti tangatang ken dagiti ulep. Bayat a basbasaem dagiti sasao iti daytoy nga artikulo, komportable ti matam iti kolor dagiti sasao ken ti nakaisuratanna. Wen, nalabit dimo mapupuotan a makatulong kenka ti kolor tapno maammuam dagiti bambanag maipapan iti aglawlawmo. Ngem adda met epekto ti kolor iti riknam.

TI EPEKTO TI KOLOR ITI RIKNA

Bayat a magmagnaka iti pasilio ti maysa a supermarket, makitam iti aglawlaw ti nagduduma a pakete ken kahon a nairanta a mangawis iti atensionmo. Ammom man wenno saan, pilien a naimbag dagiti advertiser ti kombinasion dagiti kolor a magustuan dagiti tattao aniaman ti edadda. Ammo met dagiti para arkos iti pagtaengan, diseniador iti bado, ken artist dagiti kolor a makatukay iti rikna.

Agduduma ti kaipapanan dagiti kolor kadagiti tattao gapu iti kultura ken kaugalianda. Kas pagarigan, dagiti taga-Asia inaigda ti kolor a nalabaga iti suerte ken selebrasion. Ngem iti dadduma a paset ti Africa ti nalabaga ket kolor ti panagladingit. Ngem iti laksid ti pannakapadakkelda, agpapada ti epekto ti sumagmamano a kolor kadagiti tattao. Usigentayo ti tallo a kolor ken no ania ti epektoda kenka.

Ti NALABAGA ket nalawag a makita. Daytoy a kolor ket masansan a mainaig iti bileg, gubat, ken peggad. Biagenna ti emosion ken papartakenna ti metabolismo, panaganges, ken pangatuenna ti presion ti dara.

Iti Biblia, ti Hebreo a sao para iti “nalabaga” ket nagtaud iti sao a kaipapananna “dara.” Inusar ti Biblia ti narangrang a nalabaga wenno eskarlata tapno deskribirenna ti nalatak a mammapatay a balangkantis a nakakawes iti purpura ken eskarlata a nakasakay iti “eskarlata ti marisna nga atap nga animal a napno iti natabbaaw a nagnagan.”Apocalipsis 17:1-6.

Ti BERDE ket mangpataud iti reaksion a kasungani ti nalabaga. Pabannayatenna ti metabolismo ken mangpakalma. Makapagin-awa dayta a kolor ken masansan a nainaig iti kinatalinaay. Mabang-arantayo no makakitatayo iti berde a hardin ken turturod. Kuna ti salaysay ti Genesis maipapan iti panamarsua nga impaay ti Dios para kadagiti tattao dagiti berde a ruot ken mulmula.—Genesis 1:11, 12, 30.

Ti PURAW ket masansan a nainaig iti lawag, kinatalged, ken kinadalus. Nainaig met dayta kadagiti galad a kinaimbag, kinaawan basol, ken kinasin-aw. Ti puraw ket masansan a madakamat kadagiti sirmata iti Biblia. Nailadawan dagiti tattao ken anghel a nakakawes iti puraw a mangipaganetget iti kinalinteg ken naespirituan  a kinadalus. (Juan 20:12; Apocalipsis 3:4; 7:9, 13, 14) Dagiti nakasakay iti puraw a kabalio a nakakawes iti puraw ken nadalus a lienso isimbolona ti nalinteg a gubat. (Apocalipsis 19:14) Inusar ti Dios ti puraw a mangipaganetget a sidadaan a mangpakawan: “Uray no ti basbasolyo kasla koma eskarlata, mapapudawdanto a kasla niebe.”Isaias 1:18.

KOLOR A TUMULONG A MANGIPALAGIP

Ti panangusar ti Biblia iti kolor ipakitana nga ammo ti Dios nga adda epekto dayta iti emosion ti tao. Kas pagarigan, naipadto iti libro ti Biblia nga Apocalipsis ti mapaspasamak ita a gubat, bisin, ken ipapatay gapu iti sakit ken kinakurang ti taraon. Tapno malagiptayo dagitoy, nalawag nga ipakita ti sirmata dagiti nakasakay iti kabalio nga addaan kolor.

Umuna, ti puraw a kabalio, isimbolona ti nalinteg a gubat ni Kristo-Jesus. Sumaruno ti nalabaga wenno maris-apuy a kabalio a mangirepresentar iti gubat dagiti nasion. Daytoy ket sarunuen ti nakabutbuteng a nangisit a kabalio a mangipasimudaag iti bisin. Kalpasanna, ti “nabessag a kabalio; ket daydiay sisasakay iti dayta addaan iti nagan a Patay.” (Apocalipsis 6:1-8) Ti kolor dagiti kabalio parnuayenna ti rikna a katupag ti isimbolo dagiti kabalio. Nalakatayo laeng a malagip ti kolor dagiti kabalio ken ti isuroda kadatayo.

Ipakita ti adu a pagarigan iti Biblia a nausar ti kolor a mangiladawan kadagiti sasao. Wen, ti Namarsua iti lawag, kolor, ken mata ket nagsayaat ti panangusarna iti kolor a mangisuro tapno mangpataud iti ladawan a nalaka a maawatan ken malagip dagiti agbasbasa. Makatulong kadatayo ti kolor a mangurnong ken mangtarus iti impormasion. Ti kolor ket adda epektona iti rikna, ken makatulong kadatayo a manglagip kadagiti napateg nga impormasion. Ti kolor ket naayat a sagut ti Namarsua tapno matagiragsaktayo ti biag.