Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Agosto 2013

Sungbat Dagiti Saludsod Maipapan iti Biblia

Sungbat Dagiti Saludsod Maipapan iti Biblia

Denggen kadi ti Dios ti amin a kararag?

Denggen ti Dios ti amin a tattao iti amin a nasion. (Salmo 145:18, 19) Parparegtaennatayo ti Saona, ti Biblia, nga ipakaammotayo kenkuana ti aniaman a pakaseknantayo. (Filipos 4:6, 7) Ngem saan a makaay-ayo iti Dios ti dadduma a kararag. Kas pagarigan, saanna nga anamongan dagiti maulit-ulit a naikabesa a kararag.—Basaem ti Mateo 6:7.

Kasta met, saan a denggen ni Jehova ti kararag dagiti sipapakinakem a manglabsing iti lintegna. (Proverbio 28:9) Kas pagarigan, idi tiempo ti Biblia, saan a dimngeg ti Dios kadagiti Israelita a nakabasol iti pammapatay. Nalawag, masapul a maragpattayo dagiti kalikaguman ti Dios tapno denggennatayo.—Basaem ti Isaias 1:15.

Ania ti rumbeng nga aramidentayo tapno denggennatayo ti Dios?

Ditay makaadani iti Dios babaen ti kararag no awan pammatitayo. (Santiago 1:5, 6) Masapul a kombinsidotayo nga adda Dios a maseknan kadatayo. Mapabileg ti pammatitayo no agadaltayo iti Biblia, gapu ta ti pammati ket naibatay iti pammaneknek ken pammatalged a mabasa iti Sao ti Dios.—Basaem ti Hebreo 11:1, 6.

Masapul a sipapasnek ken sipapakumbaba nga agkararagtayo. Uray ni Jesus nga Anak ti Dios, sipapakumbaba a nagkararag. (Lucas 22:41, 42) Gapuna, imbes nga ibagatayo iti Dios no ania ti kayattayo a mapasamak, masapul a tarusantayo dagiti kalikagumanna babaen ti panangbasatayo iti Biblia. Kalpasanna, agkararagtayo maitunos iti pagayatan ti Dios.—Basaem ti 1 Juan 5:14.

Ammuem ti Ad-adu Pay

ANIA A TALAGA TI ISURSURO TI BIBLIA?

Umadanika iti Dios Babaen ti Kararag

Denggen kadi ti Dios ti kararagmo? Tapno masungbatan dayta a saludsod, nasken a maawatam no ania ti isursuro ti Biblia maipapan iti kararag.