Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Hulio 2013

 PANNAKISARITA ITI MAYSA A KAARRUBA

Maseknan Kadi ti Dios iti Panagsagabatayo?

Maseknan Kadi ti Dios iti Panagsagabatayo?

Naisalaysay iti baba ti gagangay a pannakisarita ti maysa a Saksi ni Jehova iti kaarrubana. Ipapantayo a simmarungkar ti Saksi nga agnagan Michelle iti pagtaengan ti maysa a babai nga agnagan Sophia.

APAY NGA IMPALUBOSNA A MAPASAMAK DAYTOY?

Michelle: Iranranudko ita nga aldaw daytoy a tract ditoy lugaryo. Napauluan daytoy iti Kayatmo Kadi a Maammuan ti Kinapudno? Daytoy ti kopiam.

Sophia: Maipapan kadi daytoy iti relihion?

Michelle: Wen. Kitaem ti innem a saludsod iti umuna a panid. Ania kadagitoy a saludsod ti—

Sophia: Agurayka. Saysayangem laeng ti panawenmo a makisarita kaniak.

Michelle: Apay a nakunam dayta?

Sophia: Iti kinapudnona, kasla diak mamatin iti Dios.

Michelle: Pagyamanan iti panangibagam iti kapanunotam. Ngem, maisaludsodko man, Dati kadi a kasta ti opinionmo?

Sophia: Saan, makimismisaak met idi, ngem nabayagen a simmardengak.

Michelle: Kasta kadi? Ay wen gayam, siak ni Michelle. Sika ngay?

Sophia: Siak ni Sophia.

Michelle: Maragsakanak a makaam-ammo kenka, Sophia.

Sophia: Kastaak met.

Michelle: Saanak nga immay tapno ipilit ti relihionko kenka, Sophia. Ngem maisaludsodko man, adda kadi makagapu no apay a saanka a mamati iti Dios?

Sophia: Wen. Naaksidente ngamin iti lugan ni nanangko, 17 a tawenen ti napalabas.

Michelle: Maladingitanak man a makaammo iti dayta. Komustan ngay ni nanangmo?

Sophia: Paralisadon sipud idi.

Michelle: Kaasi met. Sigurado a nasakit dayta para kenka.

Sophia: Wen. Pampanunotek ngarud, No adda Dios, apay nga impalubosna a kastoy ti mapasamak? Apay nga ipalpalubosna nga agsagabatayo?

DAKES KADI NGA ISALUDSOD NO APAY?

Michelle: Maawatak ti riknam no apay a kasta ti saludsodmo. No agsagabatayo, gagangay a kasta ti maisaludsodtayo. Kinapudnona, uray dagiti matalek a lallaki ken babbai idi panawen ti Biblia naibagada met ti kasta!

Sophia: Talaga?

Michelle: Wen. Mabalin nga ipakitak kenka ti maysa a pagarigan iti Biblia?

Sophia: Sige man ngarud.

Michelle: Denggem ti insaludsod ti matalek a propeta a ni Habakuk iti Dios a nairekord iti Habakuk, kapitulo 1, bersikulo 2 ken 3: “Kasano kabayag, O Jehova, a masapul nga agpatulongak, ket saanka a dumngeg? Kasano kabayag nga umasugakto kenka iti tulong manipud kinaranggas, ket saanka a mangisalakan? Apay nga ipakitam kaniak ti makapasakit?” Saan kadi a kastoy met dagiti insaludsodmo?

Sophia: Wen nga agpayso.

Michelle: Saan a binabalaw ti Dios ni Habakuk idi insaludsodna dagita wenno imbagana a kasapulan ni Habakuk ti nabilbileg a pammati.

Sophia: Talaga?

KAGURA NI JEHOVA TI PANAGSAGABA

Michelle: Isursuro ti Biblia nga ammo ni Jehova ti panagsagabatayo ket maseknan kadatayo.

Sophia: Ania ti kayatmo a sawen?

Michelle: Kitaenta ti maysa a pagarigan ditoy Exodo 3:7. Mabalin kadi a sika ti mangbasa?

Sophia: Sige. “Ket innayon ni Jehova: ‘Di mapagduaduaan  a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda.’”

Michelle: Pagyamanan. Sigun iti nabasam, ammo kadi ti Dios no agsagaba ti ilina?

Sophia: Wen, kasla kasta.

Michelle: Ken saan laeng a basta ammona ti mapaspasamak. Kitaem manen ti maudi a paset dayta a bersikulo. Kinuna ti Dios: “Ammok unay dagiti rigat a sagsagabaenda.” Sasao kadi dagita ti saan a maseknan a Dios?

Sophia: Saan.

Michelle: Siempre, agduma ti basta ammom ti maysa a kasasaad ken ti maseknan iti dayta.

Sophia: Pudno dayta.

Michelle: Basaenta ti sabali pay a rekord a nagsagaba dagiti adipen ti Dios. Mabasa dayta iti Isaias 63:9. Kastoy ti kuna ti umuna a pasetna: “Bayat ti isuamin a pannakaparigatda isu naparigatan.” Panagkunam, maseknan kadi ti Dios iti panagsagaba ti ilina?

Sophia: Wen.

Michelle: Kinapudnona, Sophia, maseknan unay ti Dios kadatayo ken dina kayat nga agsagabatayo. No masaktantayo, masaktan met ti Dios.

APAY A NAKAUN-UNDAY?

Michelle: Sakbay a pumanawak, adda pay sabali a teksto a kayatko nga ipabasa kenka.

Sophia: Sige.

Michelle: Kitaem no ania ti isursuro ti Biblia maipapan iti pannakabalin ti Dios. Pakibasam man ti Jeremias 10:12.

Sophia: Sige. Kunana: “Isu ti Nangaramid iti daga babaen iti pannakabalinna, Daydiay mangipaspasdek a sititibker iti nabunga a daga babaen iti siribna, ken Daydiay a babaen iti pannakaawatna inyunnatna ti langlangit.”

Michelle: Pagyamanan. Usigenta biit daytoy a bersikulo. Kasapulan kadi ti Dios ti kasta unay a pannakabalin a mangparsua iti naglawa nga uniberso ken amin a linaonna?

Sophia: Wen a.

Michelle: No kasta, no kabaelan ti Dios a parsuaen ti amin nga adda iti aglawlawtayo, saan kadi a namnamaentayo nga addaan met iti pannakabalin a mangkontrol kadagiti parsuana?

Sophia: Siempre.

Michelle: Panunotem manen ni nanangmo. Apay a maladingitanka no makitkitam nga agsagsagaba?

Sophia: Gapu ta ay-ayatek ni nanangko.

Michelle: Ket no adda pannakabalinmo a mangpaimbag kenkuana, aramidem kadi?

Sophia: Wen a.

Michelle: Kayatna ngarud a sawen nga isursuro ti Biblia nga ammo ti Dios ti panagsagabatayo, maseknan kadatayo ken nakabilbileg. Mapanunotmo kadi no kasano ti panagtepteppel ti Dios a saan a nagtignay a dagus tapno pagpatinggaenna ti panagsagabatayo?

Sophia: Diak pulos napanunot dayta a.

Michelle: Adda kadi naimbag a rasonna no apay a saan nagtignay a mangipatingga kadagiti problematayo? *

Sophia: Hmm, adda siguro.

Michelle: Addan sa umaw-awag kenka isu nga agsubliakto manen ta pagsaritaanta ti ad-adu pay maipapan iti daytoy a topiko.

Sophia: Sige, pagyamanan. *

Adda kadi kayatmo a maammuan a topiko iti Biblia? Adda kadi saludsodmo maipapan kadagiti patpatien dagiti Saksi ni Jehova? No kasta, dika koma bumdeng a makisarita kadagiti Saksi ni Jehova ta maragsakanda a mangilawlawag iti dayta.

^ par. 61 Para iti ad-adu pay nga impormasion, kitaem ti kapitulo 11 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 64 Addanto artikulo iti daytoy a serye a mangisalaysay no apay nga ipalpalubos ti Dios ti panagsagaba.

Ammuem ti Ad-adu Pay

TI PAGWANAWANAN

Apay nga Ipalpalubos ti Dios ti Panagsagaba?

Ilawlawag ti umuna a libro ti Biblia no apay nga ipalpalubos ti Dios ti panagsagaba uray no kabaelanna a pagpatinggaen dayta.