Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN HUNIO 2013

Rumbeng Kadi a Pagkararagantayo Dagiti Santo?

Rumbeng Kadi a Pagkararagantayo Dagiti Santo?

ADU a tattao ita ti madandanagan ken makarikna a kasapulanda ti tulong. Aniaman ti pakaigapuan ti panagdanagtayo, nalabit agpatulongtayo iti mannakipagrikna ken addaan kapadasan a gayyem. Talaga a nagsayaat a gayyem ti kasta a tao.

Mabalin a kasta met ti marikna ti dadduma no maipapan iti kararag. Imbes nga umadanida iti Dios, gapu ta ibilangda a nakatantan-ok ken nakaskasdaaw, kaykayatda ti umadani kadagiti santo. Irasonda nga ad-adda a mannakipagrikna dagiti santo gapu ta napasarandan dagiti suot ken rigat a mapaspasaran dagiti tattao. Kas pagarigan, dagiti nakapukaw iti napateg a banag, mabalin a kayatda ti umadani ken “Saint” Anthony of Padua—ti patron dagiti napukawan wenno natakawan. No ikararaganda dagiti masakit nga animal, mabalin nga umawagda ken “Saint” Francis of Assisi wenno no maladladingitanda umawagda ken “Saint” Jude Thaddeus.

Ngem kasanotayo a masigurado a maitunos iti Biblia ti panagkararag kadagiti santo? Gapu ta maiturong dagiti kararagtayo iti Dios, sigurado a kayattayo a maammuan: Denggenna kadi dagiti kararagtayo? Ken rumbeng met nga isaludsodtayo: Anamongan ngata ti Dios no agkararagtayo kadagiti santo?

PANAGKARARAG KADAGITI SANTO—TI KUNA TI BIBLIA

Ti panagkararag kadagiti santo ket naibatay iti isursuro ti Iglesia Katolika a panangibabaet dagiti santo. Sigun iti New Catholic Encyclopedia kaipapanan dayta ti “panagpakaasi iti maysa nga addaan iti kalintegan nga agkiddaw iti Dios tapno magun-odan ti asi para iti daydiay agkasapulan.” Gapuna, manginanama daydiay agkararag kadagiti santo a makagun-od iti naisangsangayan a pabor gapu iti naanamongan a kasasaadda iti imatang ti Dios.

Isursuro kadi ti Biblia ti kasta a doktrina? Kuna ti dadduma a nangipaay ni apostol Pablo iti pakaibatayan ti panagkararag kadagiti santo kadagiti suratna. Kas pagarigan, insuratna kadagiti Kristiano idiay Roma: “Ita bagbagaankayo, kakabsat, baeten ken Apotayo a Jesu-Kristo ken baeten ti ayat ti espiritu, nga iyagawayo ti bagbagiyo a bumuyog kaniak kadagiti kararag iti Dios maipaay kaniak.” (Roma 15:30) Kidkiddawen kadi ni Pablo kadagiti padana a Kristiano nga agserbida a mangibabaet kenkuana iti imatang ti Dios? Saan. No kasapulan, kiddawenda ken Pablo nga apostol ni Kristo nga isu ti mangibabaet kadakuada. Ipakpakita ni Pablo a maitutop a kiddawen iti pada a Kristiano nga iramandatayo iti kararagda iti Dios. Ngem naan-anay  a naiduma ti agkararag iti maysa nga ipapantayo nga addan idiay langit a mangipakaammo iti dawattayo iti Dios. Apay?

Iti Ebanghelio ni apostol Juan, kuna ni Jesus: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6) Innayonna pay: “Itedto ti Ama kadakayo ti aniaman a dawatenyo kenkuana iti naganko.” (Juan 15:16, Ti Baro a Naimbag a Damag Biblia) Saan nga imbaga ni Jesus nga iturongtayo ti kararagtayo kenkuana tapno isu ti makisarita iti Dios para kadatayo. Imbes ketdi, tapno masungbatan dagiti kararagtayo, masapul nga agkararagtayo iti Dios baeten ken Jesus, awanen ti sabali.

Idi kiniddaw dagiti adalan ni Jesus nga isurona ida nga agkararag, kinunana: “No agkararagkayo, kunaenyo, ‘Ama, masantipikar koma ti naganmo.’” (Lucas 11:2) Wen, tunggal agkararagtayo, masapul nga iturongtayo iti Dios saan a ken Jesus wenno iti asinoman. Maitunos iti daytoy nalawag a pannursuro ni Jesus, saan kadi a nainkalintegan laeng nga iturongtayo iti Dios dagiti kararagtayo baeten ken Jesus saan a kadagiti manangibabaet wenno “santo”?

Ti kararag ket nagpateg a paset ti panagdayawtayo. Nalawag a ti panagdayaw iti asinoman malaksid iti Dios ket saan a maitunos iti pannursuro ti Biblia. (Juan 4:23, 24; Apocalipsis 19:9, 10) Dayta ti rason nga agkararagtayo laeng iti Dios.

MAAMAKKA KADI NGA UMADANI ITI DIOS?

Iti Sermon iti Bantay, nangted ni Jesus iti pagarigan ti maysa nga ubing nga agkidkiddaw iti taraon iti amana. Ikkan kadi ti amana iti bato imbes a tinapay? Wenno nagita nga uleg imbes nga ikan? (Mateo 7:9, 10) Saan la ketdi nga aramiden ti naayat a nagannak dayta!

Kayat ti Dios a makisaritatayo kenkuana kas iti naayat nga Ama iti anakna

Ipapanmo a maysaka a nagannak ket adda kidkiddawen kenka ti anakmo. Nasingedka kenkuana ken nalakaka nga asitgan. Ngem gapu iti di umiso a panagbutengna iti reaksionmo, indawatna a sabali ti mangibaga kenka iti kiddawna. Ania ti makunam? Kasanon no nayugalinan ti makisao kenka babaen iti sabali a tao ken kanayon a kastan ti aramidenna? Maragsakanka kadi iti ar-aramidenna? Sigurado a saan! Kayat dagiti naayat a nagannak nga umadani a mismo dagiti annakda tapno agkiddawda iti aniaman a kasapulanda.

Iti panangyaplikarna iti ilustrasion ti ubing nga agkidkiddaw iti taraon, kinuna ni Jesus kadagiti tattao: “Gapuna, no dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a kasta a ni Amayo nga adda iti langlangit mangted iti naimbag a bambanag kadagidiay agdawdawat kenkuana!” (Mateo 7:11) Talaga a kayat dagiti nagannak ti mangted iti naimbag a bambanag kadagiti annakna. Sigurado a denggen ken sungbatan met ti nailangitan nga Amatayo dagiti kararagtayo.

Kayat ti Dios nga agkararagtayo a mismo kenkuana uray no mariribukantayo gapu kadagiti pagkapuyantayo. Saan a mangituding iti sabali a dumngeg iti kararagtayo. Iparegta kadatayo ti Biblia: “Ipalladawmo ti dadagsenmo ken Jehova a mismo, ket isu saranayennakanto.” (Salmo 55:22) Imbes nga agpannuraytayo kadagiti mangibabaet a santo wenno iti asinoman, rumbeng a maaddaantayo iti positibo a panangmatmat ken Jehova a Dios.

Kas indibidual, maseknan kadatayo ti nailangitan nga Amatayo. Kayatnatayo a tulongan kadagiti problematayo ken aw-awisennatayo nga umadani kenkuana. (Santiago 4:8) Anian a yamantayo ta adda gundawaytayo nga umadani iti Dios ken Amatayo, ti “Managdengngeg iti kararag”!—Salmo 65:2.