Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2013

Makapnek ti Biag—No Tuladen ni Jesus

Makapnek ti Biag—No Tuladen ni Jesus

“Agbiag a kas iti panagbiag ni Jesu-Cristo.”—1 Juan 2:6, Ti Baro a Naimbag a Damag Biblia.

KAS naisalaysay iti immuna nga artikulo, makapnek ti biag ni Jesus. Isu a no kayattayo a makapnek ti biagtayo, tuladentayo ti ulidanna ken tungpalentayo ti balakadna.

Kinapudnona, iparparegta ni Jehova nga aramidentayo dayta, kas ipakita ti nadakamat a teksto iti ngato. No agbiagtayo a kas ken Jesus, masapul nga itunostayo ti biagtayo iti ulidan ken pannursurona. No aramidentayo dayta, anamongannatayo ti Dios ken agbalin a makapnek ti biagtayo.

Ti pannursuro ni Jesus ramanenna dagiti prinsipio ti Biblia a makatulong kadatayo nga agbiag a maitunos iti panagbiagna. Masarakantayo ti adu kadagitoy a prinsipio iti nalatak a Sermon iti Bantay. Usigentayo ti sumagmamano kadagita ken no kasanotayo nga iyaplikar.

PRINSIPIO: “Naragsak dagidiay sipapanunot iti naespirituan a kasapulanda.”—Mateo 5:3.

NO KASANO A MAKATULONG DAYTOY TAPNO MAADDAAN ITI MAKAPNEK A BIAG:

Impakita ni Jesus a naparsua ti tao nga agkasapulan iti naespirituan. Kayattayo a maammuan ti sungbat dagitoy a saludsod: Apay nga addatayo ditoy? Apay a nakaro ti panagsagaba ditoy daga? Talaga kadi a maseknan ti Dios kadatayo? Adda kadi biag kalpasan ti ipapatay? Masapul a maammuantayo ti sungbat dagita a saludsod tapno agbalin a makapnek ti biagtayo. Ammo ni Jesus a maysa laeng ti mapagtalkan a pagtaudan ti sungbat—ti Sao ti Dios. Inkararag ni Jesus iti Amana: “Ti saom ket kinapudno.” (Juan 17:17) Talaga kadi a makatulong ti Sao ti Dios tapno mapennek ti naespirituan a kasapulantayo?

KAPADASAN:

Kas lead singer iti nalatak a banda, ni Esa ket dandanin agbalin a rock star. Ngem saan a naragsak ni Esa. “Nupay pagay-ayatko ti kaaddak iti banda, kayatko nga ad-adda koma a makapnek ti biagko,” kunana. Idi agangay, nakasarita ni Esa ti maysa kadagiti Saksi ni Jehova. “Nagadu ti insaludsodko,” kunana. “Nagustuak dagiti sungbatna manipud iti Biblia isu nga immanamongak nga iyadalannak iti Biblia.” Gapu kadagiti naadalna manipud iti Biblia, natignay a nangidedikar iti biagna ken Jehova. “Problemadoak idi a kanayon, ngem ita addan pudpudno a panggep ti biagko,” kuna ni Esa. *

PRINSIPIO: “Naragsak dagiti naasi.”—Mateo 5:7.

NO KASANO A MAKATULONG DAYTOY TAPNO MAADDAAN ITI MAKAPNEK A BIAG:

Ti asi ket panangipakita iti kinaimbag ken konsiderasion iti sabsabali. Kinaasian ni Jesus dagiti agkasapulan. Gapu ta maasian unay, natignay a mangipaay iti pakabang-aran ti sabsabali. (Mateo 14:14; 20:30-34) No naasitayo a kas ken Jesus, ad-adda a makapnek ti biagtayo, ta naragsak dagidiay naasi iti sabsabali. (Aramid 20:35) Maipakitatayo ti asi iti sabsabali no makapabileg ken makapabang-ar ti sasao ken ar-aramidtayo kadagiti agkasapulan ti tulongtayo. Sumayaat kadi ti kinataotayo no agbalintayo a naasi?

Maria ken Carlos

KAPADASAN:

Ti agassawa a Maria ken Carlos ket nagsayaat nga ulidan ti panagbalin a naasi. Nabalon ti Tatang ni Maria, ken sumagmamanon a tawen a naidalit iti pagiddaan. Inyawid da Maria ken Carlos iti balayda ken ipapaayda ti amin a kasapulanna. Adu a rabii a mapuypuyatanda, nga uray la itarayda iti ospital no kumaro ti diabetis-na. Admitirenda a mabambannogda no dadduma. Ngem naragsakda a kas iti kinuna ni Jesus  agsipud ta ammoda nga ipapaayda ti kasapulan ti ama ni Maria.

PRINSIPIO: “Naragsak dagiti mannakikappia.”—Mateo 5:9.

NO KASANO A MAKATULONG DAYTOY TAPNO MAADDAAN ITI MAKAPNEK A BIAG:

Kasano nga ad-adda a makapnek ti biag ti maysa a mannakikappia? Nasaysayaat ti relasiontayo iti sabsabali no mannakikappiatayo. Nasayaat no ipangagtayo ti balakad ti Biblia: “No mabalin, agingga a makapagpannuray kadakayo, makikappiakayo iti amin a tattao.” (Roma 12:18) Ti “amin a tattao” ramanenna ti kapamiliatayo ken dagiti saantayo a kapammatian. Talaga kadi nga ad-adda a makapnek ti biagtayo no mannakikappiatayo iti “amin a tattao”?

Nair

KAPADASAN:

Usigentayo ti kapadasan ti babai nga agnagan Nair. Iti adun a tawen, naipasango iti adu a problema isu a nasubok ti panangtaginayonna iti kappia nangruna iti kapamiliana. Sipud pay pinanawan ni lakayna agarup 15 a tawen ti napalabasen, isun ti nangpadakkel kadagiti annakna. Maysa kadagiti annakna ti adikto iti droga ken masansan a mangriribuk nga uray la pangtaanna ni nanangna ken ti kabsatna a babai. Patien ni Nair a napabileg a mangtaginayon iti kappia gapu kadagiti maad-adalna iti Biblia, uray kadagita a narigat a kasasaad. Inkagumaanna ti saan a makiapa. Ikagkagumaanna ti agbalin a naasi, mannakipagrikna, ken mannakaawat iti sabsabali. (Efeso 4:31, 32) Kombinsido a ti panagbalinna a mannakikappia ti nakatulong kenkuana a maaddaan iti nasayaat a relasion iti pamiliana ken iti sabsabali.

SIPAPANUNOT ITI MASANGUANAN

No surotentayo ti nainsiriban a balakad ni Jesus, agbalin a naragsak ken kontento ti biagtayo. Ngem tapno pudpudno a makapnek ti biagtayo, masapul nga ammotayo met no ania ti mapasamak iti masanguanan. Ngamin kasano koma a makapnek ti biagtayo no ti ammotayo laeng ket lumakay, agsakit, ken mataytayo? Ngem dagitoy ti talaga a mapaspasamak iti daytoy a lubong.

Ngem adda naimbag a damag! Adu a bendision ti ipaay ni Jehova kadagidiay mangikagumaan nga ‘agbiag a kas iti panagbiag ni Jesus.’ Inkari ni Jehova nga asidegen nga iyegna ti nalinteg a baro a lubong a pagnaedan dagiti matalek a tattao a saanton nga agsakit. Kuna ti Saona: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:3, 4.

Ni Maria nga agtawen iti 84 a nadakamat iti umuna nga artikulo iti daytoy a ruar, maragsakan a makakita iti pannakatungpal dagita a sasao. Sika ngay? Kayatmo kadi a maammuan ti ad-adu pay maipapan iti “pudpudno a biag”—ti kasasaad ti biag inton agturayen ti Pagarian ti Dios? (1 Timoteo 6:19) No wen, kontakem dagiti Saksi ni Jehova iti lugaryo wenno agsuratka iti nangipablaak iti daytoy a magasin. *

^ par. 8 Mabasam ti kompleto a pakasaritaan ti biag ni Esa iti artikulo a “Ti Biblia Balbaliwanna ti Biag—Nauyongak idi” iti daytoy a magasin.

^ par. 18 Ti libro nga Ania a Talaga ti Isursuro ti Biblia? nga impablaak dagiti Saksi ni Jehova ket nakatulongen iti adu a mangadal iti kuna ti Biblia maipapan iti nadumaduma a topiko.

 

Ammuem ti Ad-adu Pay

Ania ti Panggep ti Biag?

Napanunotmo kadin, ‘No ania ti panggep ti biag?’ Ammuen ti sungbat ti Biblia iti dayta a saludsod.

Anianto ti Aramiden ti Pagarian ti Dios?

Ammuem no anianto ti namnamaem a mapasamak inton agturay ti gobierno ti Dios iti intero a daga.