Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2013

 TI BIBLIA BALBALIWANNA TI BIAG

“Nauyongak Idi”

“Nauyongak Idi”
  • PANNAKAYANAKNA: 1960
  • NAKAYANAKANNA: FINLAND
  • PAKASARITAANNA: MUSIKERO ITI HEAVY-METAL

TI NAPALABASKO:

Dimmakkelak iti napanglaw a lugar iti sangladan a siudad ti Turku. Kampeon iti boksing ni tatangko, ken kanayonkami met a makiboksing ken adingko. Masansan a makidinnanogak idiay eskuelaan gapu ta kanayon a karitendak a makilaban. Kas maysa nga agtutubo, nakikaduaak iti maysa a gang nga agdindinnamag gapu iti dakes nga aramid. Isu nga ad-adda a nairamanak iti naranggas a panaglalaban. Nangrugi met a magustuak dagiti kanta a heavy-metal ken inarapaapko ti agbalin a rock star.

Gimmatangak iti sumagmamano a drum, nangbukelak iti maysa a banda ket idi agangay, siak ti nagbalin a lead singer ti banda. No addaak iti stage pagay-ayatko ti naariwawa a panagkankantak. In-inut a limmatak ti bandami gapu iti agresibo ken karkarna a langami. Nangrugikami nga agtokar iti sanguanan ti adu a tattao ken adda sumagmamano nga inrekordmi ket nagustuan dagiti tattao ti kaudian a kantami. Iti maudi a paset ti dekada ‘80, napankami idiay Estados Unidos a nangi-promote iti bandami. Nagpabuyakami iti sumagmamano a daras idiay New York ken Los Angeles, ket nakasaritami sadiay dagiti propesional iti industria ti musika sakbay a nagawidkami idiay Finland.

Nupay pagay-ayatko iti kaaddak iti banda, tartarigagayak nga ad-adda koma a makapnek ti biagko. Nadismayaak gapu iti nakaro a kompetision iti industria ti musika ken naupayak gapu ta awan ti pudpudno a panggep ti biagko. Panagkunak, dakesak a tao ket mabutengak a matutuok iti umap-apuy nga impierno. Binasak ti nadumaduma a libro maipapan iti relihion. Sipapasnek met nga inkararagko a tulongannak ti Dios, uray no iti panagriknak ket saanak a maikari iti anamongna.

NO KASANO A BINALBALIWAN TI BIBLIA TI BIAGKO:

Tapno masuportarak ti bagik, nagtrabahoak iti post office iti lugarmi. Naminsan, naammuak a maysa gayam a Saksi ni Jehova ti katrabahuak. Nagadu ti insaludsodko kenkuana. Nagustuak dagiti sungbatna manipud iti Biblia isu nga immanamongak  nga iyadalannak iti Biblia. Sumagmamano a lawasen nga agad-adalak iti Biblia idi natukonan ti bandami iti makaallukoy a recording contract nga adda posibilidadna a makairuarkami iti album idiay Estados Unidos. Kinunak a daytoyen ti gundawayko.

Imbagak iti Saksi a mangyad-adal kaniak a kayatko ti mangaramid iti maysa pay nga album ket kalpasan dayta, iyaplikarkonton dagiti prinsipio ti Biblia. Awan ti imbagana, imbes ketdi impabasana laeng ti kinuna ni Jesus iti Mateo 6:24. Kastoy ti mabasa: “Awan ti makabalin nga agpaadipen iti dua nga appo.” Nasdaawak idi natarusak ti kaipapanan ti sasao ni Jesus. Ngem kalpasan ti sumagmamano nga aldaw, nasdaaw ti mangyad-adal kaniak iti Biblia! Imbagak kenkuana nga immikkatakon iti banda gapu ta kayatko ti agbalin a pasurot ni Jesus!

Ti Biblia ket kas iti sarming a mangipakita iti pakapilawak. (Santiago 1:22-25) Nakitak a nauyongak, napannakkel ken ambisioso. Agsaoak iti dakes, makilabanak, agsigarilio, ken mammartekak. Idi nabigbigko a ti panagbiagko ket maikontra kadagiti prinsipio ti Biblia, kagurak ti bagik. Nupay kasta, sidadaanak a mangaramid iti panagbalbaliw.—Efeso 4:22-24.

“Naasi ti nailangitan nga Amatayo, ken kayatna a tulongan dagiti agbabbabawi”

Idi damo, makonsiensiaak iti dakes a naaramidko iti napalabas. Ngem adu ti naitulong ti Saksi a mangyad-adal kaniak. Impabasana ti Isaias 1:18: “Uray no ti basbasolyo kasla koma eskarlata, mapapudawdanto a kasla niebe.” Daytoy nga impabasana ken ti dadduma pay a teksto ti nangkombinsir kaniak a naasi ti nailangitan nga Amatayo, ken kayatna a tulongan dagiti agbabbabawi.

Idi naam-ammokon a naimbag ken naapresiarko ni Jehova kas maysa a Persona, kayatkon nga idedikar ti biagko kenkuana. (Salmo 40:8) Nabautisaranak idi 1992 iti internasional a kombension dagiti Saksi ni Jehova idiay St. Petersburg, Russia.

NO KASANO A NAGUNGGONAANAK:

Adu ti nagbalin a nasinged a gagayyemko kadagiti agdaydayaw ken Jehova. Adda dagiti gundaway nga agkakaduakami nga agtokar kadagiti makaay-ayo a musika ken mangtagiragsak iti daytoy a sagut ti Dios. (Santiago 1:17) Naisangsangayan a bendision ti ingungotek nga asawa a ni Kristina. Nagbinnuligkami kadagiti naragsak ken narigat a kasasaad iti biag, kasta met ti kaunggan a riknak.

Mabalin a natayak koma itan no saanak a nagbalin a Saksi ni Jehova. Kanayon idi a problemadoak. Ita, nasayaaten ti amin ta addan pudpudno a panggep ti biagko.