Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Abril 2013

 UMADANIKA ITI DIOS

“Itultuloyyo ti Agdawat, ket Maitedto Dayta Kadakayo”

“Itultuloyyo ti Agdawat, ket Maitedto Dayta Kadakayo”

“Apo, isurom kadakami no kasano ti agkararag.” (Lucas 11:1) Dayta ti kiniddaw ti maysa kadagiti adalan ni Jesus. Kas sungbatna, insalaysayna ti dua nga ilustrasion a mangisuro kadatayo no ania ti aramidentayo tapno denggen ti Dios ti kararagtayo. No agduaduaka a denggen ti Dios dagiti kararagmo, mabalin nga interesadoka iti sungbat ni Jesus.—Basaem ti Lucas 11:5-13.

Ti umuna nga ilustrasion ket naipamaysa iti daydiay agkarkararag. (Lucas 11:5-8) Iti dayta a salaysay, iti tengnga ti rabii adda simmangpet a bisita ti maysa a lalaki ket awan ti maidasarna a taraon. Para iti lalaki a nangpasangbay, kasapulan nga idasaranna ti bisitana. Nupay tengngan ti rabii, napan iti gayyemna tapno bumulod iti tinapay. Iti damo, saan a kayat ti gayyemna ti bumangon gapu ta nakaturogen ti pamiliana. Ngem gapu iti kinapingetna, nagtultuloy a nagkiddaw agingga a bimmangon ti gayyemna tapno mangted iti tinapay. *

Ania ti isuro dayta nga ilustrasion kadatayo maipapan iti kararag? Isursuro kadatayo ni Jesus a masapul a napingettayo—itultuloytayo ti agdawat, agsapul, ken agtuktok. (Lucas 11:9, 10) Apay? Ibagbaga kadi ni Jesus a saan a dumngeg ti Dios no agkararagtayo? Saan. Ti kayat a sawen ni Jesus ket saan a kas iti gayyem nga agkedked iti damo, magagaran ti Dios a mangipaay iti umiso a kiddaw dagidiay agkararag nga addaan pammati. Maipakitatayo ti kasta a pammati babaen ti kinapingettayo. No agtultuloytayo nga agkiddaw, ipakpakitatayo a talaga a kasapulantayo ti kidkiddawentayo ket patientayo nga ited ti Dios no dayta ti pagayatanna.—Marcos 11:24; 1 Juan 5:14.

Ti maikadua nga ilustrasion ket naipamaysa iti “Managdengngeg iti kararag,” ni Jehova. (Salmo 65:2) Insaludsod ni Jesus: “Siasino kadakayo ti ama a, no ti anakna dumawat iti ikan, nalabit iyawatnanto kenkuana ti maysa a serpiente imbes nga ikan? Wenno no dumawat met iti itlog, iyawatnanto kenkuana ti maysa a manggagama?” Nalawag ti sungbat, awan ti nadungngo nga ama a mangted iti makadangran a banag iti annakna. Kalpasanna, inlawlawag ni Jesus ti kaipapanan ti ilustrasion: No kasano a dagiti imperpekto nga ama mangtedda iti “naimbag a sagsagut” kadagiti annakda, “anian a nangnangruna pay a ti Ama sadi langit mangtedto iti nasantuan nga espiritu”—ti kasayaatan a sagut—kadagiti agkiddaw kenkuana nga annakna ditoy daga! *Lucas 11:11-13; Mateo 7:11.

Magagaran ti Dios a mangipaay iti umiso a kiddaw dagidiay addaan pammati

Ania ti isuro kadatayo daytoy nga ilustrasion maipapan ken Jehova, ti “Managdengngeg iti kararag”? Isursuro ni Jesus a naayat nga Ama ni Jehova ken magagaran a mangipaay iti kasapulan dagiti annakna. Gapuna, dagiti agdaydayaw ken Jehova, nawayada nga umadani kenkuana ken agkiddaw iti aniaman a tarigagayanda. Gapu ta pagaammona no ania ti kasayaatan para kadakuada, sidadaanda a mangawat iti sungbat dagiti kiddawda uray no saan a dayta ti inanamaenda. *

Singasing a basaen iti Biblia iti Abril

Lucas 7-21

^ par. 4 Ipakita ti ilustrasion ni Jesus ti kaugalian ken ar-aramid idi a tiempo. Ibilang dagiti Judio a nagpateg nga annongen ti panangpadagus. Mangluto laeng ti maysa a pamilia iti tinapay nga eksakto a kanenda iti maysa nga aldaw, isu a gagangay idi ti bumulod no maibusan. Kasta met, no nakurapay ti pamilia, maturogda iti suelo iti maysa a siled.

^ par. 6 Iti panangisuro ni Jesus, masansan nga agusar iti sasao nga “anian a nangnangruna pay” tapno ipakitana no kasano nga agaplikar dayta iti mas serioso a banag. Kuna ti maysa nga iskolar: “Kastoy dayta, ‘No agpayso ti immuna, ad-adda nga agpayso ti maikadua.’”

^ par. 7 Tapno maammuam ti ad-adu pay no kasano ti agkararag tapno denggen ti Dios, kitaem ti kapitulo 17 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.