Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN MARSO 2013

 PAKASARITAAN TI BIAG

“Nakitak Ngem Diak Naawatan”

“Nakitak Ngem Diak Naawatan”

Tawen 1975, idi damo a nagsuspetsa ni Nanang nga adda karkarna maipapan kaniak. Dua ti tawenko idi. Bayat nga ub-ubbaennak ni Nanang, adda natinnag ti gayyemna a nadagsen a banag isu a gimluong. Nadlaw ni Nanang a saanak man la a nakigtot. Idi tallo ti tawenkon, diak pay laeng makasao. Idin, naammuan ti pamiliak ti makapakigtot a damag a pinatalgedan dagiti espesialista a saanak a pulos makangngeg!

Maladagaak pay laeng idi nagdiborsio dagiti nagannakko, isu a ni Nanang laeng ti nangpadakkel kaniak ken ti dua a manongko ken ni manangko. Kadagidi a panawen, sabali ti pamay-an a pannakaisuro dagiti ubbing a tuleng idiay France, ken no dadduma dagiti ubbing marigatanda iti pamay-an a pannakaisuroda. Ngem maibagak a manipud kinaubingko, nasaysayaat ti kasasaadko ngem iti dadduma a tuleng. Palubosandak a mangisalaysay.

Idi agarup lima ti tawenko

Patien idi ti adu a mangisursuro a masapul a piliten dagiti ubbing a tuleng a suruan nga agsao ken tarusanda ti panaggaraw ti bibig. Kinapudnona, iti France a dimmakkelak, maiparit ti panagsenias iti eskuelaan. Magalutan pay ketdi a patallikud ti ima ti dadduma a tuleng nga ubbing bayat ti klase.

Iti sumagmamano a tawen, adu nga oras iti linawas nga isuronak ti speech therapist. Iggamanna ti pangak wenno ti ulok ket pilitennak nga agsao iti diak mangngeg. Diak kabaelan ti makisarita iti dadduma nga ubbing. Narigatanak idi kadagita a tawen.

Ngem idi agtawenakon iti innem, nagadalak iti eskuelaan dagiti tuleng. Iti umuna a gundaway, damo a nakalangenko dagiti padak a tuleng. Maiparit met ditoy ti agsenias. No agseniaskami iti klase, pak-ilanda dagiti ramaymi wenno pungotenda ti buokmi. Ngem inlimedmi ti agsenias, isu a makapagsasaritakamin babaen kadagiti inimbentomi a senias. Dita a nangrugi ti uppat a naragsak a tawen.

Ngem idi sangapulo ti tawenkon, nayakarak iti elementaria a kaduak dagiti makangngeg nga ubbing, isu a naupayak! Impagarupko a sisiak laengen ti tuleng a sibibiag iti lubong. Saan a nakasursuro ti pamiliak nga agsenias gapu ta sinurotda ti balakad dagiti doktor, ta amangan no awan ti magunggonak iti speech therapy. Saanak met a napalubosan a makilangen kadagiti tuleng nga ubbing. Malagipko pay ti ipapanmi iti hearing specialist. Adda librona a sign-language iti lamisaanna. Idi nakitak ti ladawan iti akkubna, intudok sa kinunak, “Kayatko dayta!” Ti doktor dagus nga inlemmengna ti libro. *

NAAMMUAK DAGITI KINAPUDNO ITI BIBLIA

Insuro ni Nanang kadakami nga annakna dagiti  Nakristianuan a prinsipio. Itugtugotnakami kadagiti gimong iti Mérignac a kongregasion dagiti Saksi ni Jehova, iti asideg ti Bordeaux. Gapu ta ubingak pay, bassit laeng ti maawatak kadagiti gimong. Ngem agsisinnublat dagiti kakabsat sadiay a makikatugaw kaniak a mangisurat kadagiti maipalpalawag. Apresiarek ti ayat ken pannakaseknanda. Idiay balaymi, iyadalannak iti Biblia ni Nanang ngem diak matarusan a naimbag ti maisursuro kaniak. Kaslaak ken propeta Daniel a nagkuna idi imbaga ti anghel ti maysa a padto: “Nangngegko, ngem saanko a maawatan.” (Daniel 12:8) Ngem iti kasasaadko, “Nakitak, ngem diak naawatan.”

Ngem in-inut a naipasagepsep kaniak dagiti kinapudno ti Biblia. Impapusok dagiti natarusak ken inyaplikarko dagita. Nakasursuroak met iti panangpaliiwko iti ugali ti dadduma. Kas pagarigan, ibaga kadatayo ti Biblia nga agan-anustayo. (Santiago 5:7, 8) Talaga a diak matarusan dayta. Ngem matarusak ti kayat a sawen ti panaganus no mapaliiwko nga ipakpakita dagiti kapammatiak dayta a galad. Talaga a dakkel ti naitulong kaniak ti kongregasion Kristiano.

NAPAIT A PANNAKAPAAY KEN NAISANGSANGAYAN A SORPRESA

Tinulongannak ni Stéphane a mangtarus iti Biblia

Naminsan, idi maysaakon a tin-edyer, nakakitaak kadagiti agsensenias nga agtutubo a tuleng nga adda iti kalsada. Sililimed a rinugiak ti nakikadua kadakuada ken nasursurok ti French Sign Language (FSL). Intultuloyko ti timmabuno kadagiti Nakristianuan a gimong. Sadiay adda agtutubo a Saksi nga agnagan Stéphane a nakigayyem kaniak. Inkagumaanna ti nakikomunikar kaniak isu a nagbalinkami a nasinged. Ngem naladingitanak idi naibalud ni Stéphane gapu iti panangsalimetmetna iti neutral a takderna kas Kristiano. Kasta unay ti pannakaupayko idi awanen ni Stéphane ken dandani diak kayaten ti makigimong.

Ngem kalpasan ti 11 a bulan, nawayawayaan ken nakaawiden ni Stéphane. Nasdaawak idi nangrugi a makikomunikar kaniak ni Stéphane babaen ti sign language. Kasla diak mamati nga ammonan ti agsenias! Kasano a nakasursuro? Idiay pagbaludan, nasursuro ni Stéphane ti French Sign Language. Maragragsakanak bayat a buybuyaek ti panaggaraw dagiti ima ken ekspresion ti rupa ni Stéphane. Napanunotko a dakkel ti maitulong dayta kaniak.

NAAWATAK MET LAENGEN DAGITI KINAPUDNO ITI BIBLIA

Rinugian ni Stéphane ti mangyadal iti Biblia kaniak. Dita a nangrugi a mapagkokonektarko dagiti kinapudno iti Biblia a nasursurok idi. Idi ubingak pay, pagay-ayatko a buybuyaen dagiti nagpipintas a ladawan iti publikasiontayo a naibatay iti Biblia, nga idiligko kadagiti karakter ken sukimatek a naimbag dagiti detalye tapno maipasagepsep iti panunotko dagiti estoria. Ammok ti maipapan ken Abraham, ti ‘bin-ina’ ken ti “dakkel a bunggoy,” ngem naawatak laeng ti pudno a kaipapananda idi nailawlawag daytoy iti sign language. (Genesis 22:15-18; Apocalipsis 7:9) Nalawag a nasarakakon ti pagay-ayatko a lengguahe.

Ita ta matarusakon dagiti maipalpalawag kadagiti gimong, natukay ti pusok ken kayatko a maammuan ti ad-adu pay. Rimmang-ay ti pannakaawatko iti Biblia gapu iti tulong ni Stéphane. Idi 1992, indedikarko ti biagko ken Jehova a Dios ken nagpabautisarak. Nupay rimmang-ayakon, managbabainak pay laeng ken marigatanak a makilangen iti sabsabali gapu ta idi ubingak, diak kabaelan ti makikomunikar kadagiti tattao.

PANANGPARMEK ITI KINAMANAGBABAINKO

Idi agangay, ti bassit a grupo dagiti tuleng ket naitipon iti kongregasion ti Pessac, maysa a purok iti Bordeaux. Nakatulong unay kaniak dayta ket rimmang-ayak iti naespirituan. Nupay ikagkagumaak ti makikomunikar, siguraduen dagiti makasao a gagayyemko a matarusak ti amin nga ibagbagada.  Inkagumaan dagiti agassawa a Gilles ken Elodie ti makikomunikar kaniak. Masansan nga awisendak a mangan wenno agkape a kaduada kalpasan ti gimong, isu a simminged ti panaggagayyemmi. Talaga a naragsak ti agbalin a paset ti ili a mangan-annurot kadagiti naayat a daldalan ti Dios!

Talaga a dakkel a tulong kaniak ni baketko a Vanessa

Ditoy a kongregasion a naam-ammok ti napintas a balasang a ni Vanessa. Nagustuak ti kinamannakipagrikna ken kinamannakaawatna. Dina imbilang ti kasasaadko a lapped iti pannakikomunikar, imbes ketdi imbilangna dayta a pamay-an tapno makasursuro a makikomunikar kadagiti tuleng. Natnag ti riknak kenkuana ket nagkasarkami idi 2005. Nupay saanak a nalaing a makikomunikar, tinulongannak ni Vanessa a mangparmek iti kinamanagbabainko ken mangyebkas kadagiti opinionko. Talaga nga apresiarek ti tulongna bayat nga itungtungpalko dagiti responsabilidadko.

SABALI PAY A SAGUT MANIPUD KEN JEHOVA

Idi tawen a panagkasarmi, inawisnak ti sanga nga opisina dagiti Saksi ni Jehova idiay Louviers, France para iti makabulan panagsanay iti trabaho a panagipatarus. Kadagiti napalabas a tawen, ikagkagumaan ti sanga nga opisina ti mangpataud kadagiti publikasion nga FSL iti DVD. Ngem gapu ta umad-adu ti trabaho, kasapulan ti translation team ti ad-adu nga agipatarus.

Agpalpalawagak iti French Sign Language

Nariknami ken Vanessa a nagdakkel a pribilehio ti panagserbik iti sanga nga opisina ken ibilangmi dayta a sagut manipud ken Jehova. Ngem admitirek a medio maamakkami. Ania ngarud itan ti mapasamak iti grupomi a sign-language? Kasano ngatan ti balaymi? Makasarak ngata ni Vanessa iti trabaho sadiay? Iti naisangsangayan a pamay-an, nangipaay ni Jehova iti solusion kadagita a problemami. Talaga a mariknak ti panagayat ni Jehova kadakami nga agassawa ken kadagiti tuleng a tattao.

TINULONGANNAK TI NAGKAYKAYSA NGA ILI

Gapu ta karamanak iti trabaho a panagipatarus, ammok no ania dagiti maar-aramid tapno maipaayan iti naespirituan a tulong dagiti tuleng. Maragsakanak a makakita kadagiti katrabahuak a mangikagkagumaan a makisarita kaniak. Natukay ti pusok iti panangikagumaanda a mangusar iti sumagmamano a senias a nasursuroda tapno makikomunikarda kaniak. Diak pulos marikna a maikapkapisak. Amin dagitoy nga ar-aramidenda ket mangipakita iti naisangsangayan a panagkaykaysa ti ili ni Jehova.—Salmo 133:1.

Panagtrabaho iti Translation Department iti sanga nga opisina

Agyamanak ken Jehova ta babaen ti kongregasion Kristiano, kanayon a siguraduenna nga adda tumulong kaniak. Apresiarek met ti bassit a pasetko a tumultulong kadagiti padak a tuleng a mangammo iti naayat a Namarsua kadatayo ken suminged kenkuana. Segseggaak ti tiempo inton awanen dagiti lapped ti pannakikomunikar ken usarenen ti amin tattao ti “nasin-aw a pagsasao”—ti kinapudno maipapan ken Jehova a Dios ken dagiti panggepna—kas paset ti nagkaykaysa a pamiliana ditoy daga.—Sofonias 3:9.

^ par. 9 Idi laeng 1991 nga opisial nga impalubos ti gobierno ti France ti pannakausar ti sign language a mangisuro kadagiti tuleng nga ubbing.