Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN MARSO 2013

Ti Panagungar ni Jesus Kaipapananna ti Biag!

Ti Panagungar ni Jesus Kaipapananna ti Biag!

TI PANAGUNGAR ni Jesus ket saan laeng a naisangsangayan wenno nagkauna a pasamak nga awan maipaayna a pagimbagan kadatayo. Dinakamat ni apostol Pablo ti kinapateg dayta idi insuratna: “Ni Kristo naibangonen manipud kadagiti natay, ti umuna a bungbunga kadagidiay naturog ken patay. Ta yantangay ti ipapatay ket gapu iti maysa a tao, ti panagungar dagiti natay ket gapu met iti maysa a tao. Ta no kasano a ken Adan matmatay ti amin, kasta met nga iti Kristo mapagbiagto ti amin.”—1 Corinto 15:20-22.

Napagungar ni Jesus idi Nisan 16, 33 C.E., ti aldaw iti tawen a maidaton ti umuna a bungbunga ti kaunaan nga apit a bukbukel iti sanguanan ni Jehova a Dios iti santuario ti templo idiay Jerusalem. Idi tinukoyna ni Jesus kas umuna a bungbunga, impakita ni Pablo nga addanto dadduma nga indibidual a mapagungar.

Ilawlawag ti sumaruno a sasao ni Pablo no ania dagiti pagimbagan ti panagungar ni Jesus. “Yantangay ti ipapatay ket gapu iti maysa a tao,” kuna ni Pablo, “ti panagungar dagiti natay ket gapu met iti maysa a tao.” Mataytayo amin gapu iti basol ken kinaimperpekto nga impatawid ni Adan. Ngem babaen ti panangitedna iti perpekto a natauan a biagna kas subbot, linuktan ni Jesus ti gundaway dagiti tattao a maluk-atan iti pannakaadipen iti basol ken ipapatay babaen ti panagungar. Nagsayaat ti pananggupgop ni Pablo iti Roma 6:23: “Ta dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”

Inlawlawag a mismo ni Jesus kadatayo ti kaipapanan ti ipapatay ken panagungarna. Iti panangtukoyna ti bagina, kinunana: “Masapul a maibayog ti Anak ti tao, tapno tunggal maysa a mamati kenkuana maaddaan iti agnanayon a biag. Ta ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”—Juan 3:14-16.

Agasem dayta, biag nga agnanayon nga awan ut-ot, panagsagaba, wenno ladingit! (Apocalipsis 21:3, 4) Anian a nagragsak a namnama! Kastoy ti kinuna ti maysa nga iskolar: “Nupay ti tanem ipalagipna kadatayo ti kinaababa ti biag, ti panagungar ipasiguradona kadatayo ti kinaababa ni patay.” Wen, ti panagungar ni Jesus kaipapananna ti biag!