Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN MARSO 2013

 ISUROYO DAGITI ANNAKYO

Nagulbod da Pedro ken Ananias—Ania ti Masursurotayo?

Nagulbod da Pedro ken Ananias—Ania ti Masursurotayo?

Kas pagaammom, ti panagulbod ket panangibaga iti banag a saan a pudno. Nagulbodka kadin? * Nagulbod met uray ti dadduma a nataengan a mangay-ayat iti Dios. Mabalin nga adda am-ammom a karakter iti Biblia a nangaramid iti kasta. Pedro ti naganna, maysa kadagiti 12 nga apostol ni Jesus. Ammuenta ti napasamak no apay a nagulbod.

Idi naaresto ni Jesus, naipan iti pagtaengan ti nangato a padi. Tumengnga idin ti rabii. Nakapan ni Pedro iti paraangan ti pagtaengan ti nangato a padi nga awan ti nakabigbig kenkuana. Gapu ta nalawag, ti adipen a babai ti nangato a padi nabigbigna ni Pedro. “Sika, met, kaduanaka idi ni Jesus,” kuna ti babai. Nagulbod ni Pedro gapu iti butengna.

Idi kuan, kuna ti Biblia a “sabali pay a babai ti nakadlaw kenkuana.” Kinuna ti babai: “Daytoy a tao naikadua idi ken Jesus.” Nagulbod manen ni Pedro. Pagammuan ta kuna ti sabali pay a nakakita ken Pedro sadiay: “Pudno a maysaka met kadakuada.”

Nagbuteng ni Pedro, isu nga iti maikatlo a gundaway, nagulbod manen a kunkunana: “Diak am-ammo ti tao!” Dagus a nagtaraok ti maysa a kawitan. Timmaliaw ni Jesus ken Pedro, ket nalagip ni Pedro ti kinuna ni Jesus sumagmamano nga oras sakbay dayta: “Sakbay nga agtaraok ti maysa a kawitan, paglikudannakto iti mamitlo.” Nagsangit ni Pedro ken nagladingit iti kasta unay!

Mabalin kadi met a mapasamak dayta kenka?— Kas pagarigan addaka idiay eskuelaan, ket mangngegmo a pagsasaritaan dagiti kaklasem ti maipapan kadagiti Saksi ni Jehova. Kuna ti maysa, “Saanda nga agsaludo iti bandera.” Kuna ti sabali pay, “Dida makilaban para iti pagilianda.” Kuna pay ti maysa, “Saanda a Kristiano gapu ta saanda nga agselebrar iti Krismas.” Idi kuan, adda nagsaludsod kenka, “Saan kadi a maysaka a Saksi ni Jehova?” Ania ti isungbatmo?

 Masapul a nakasaganaka sakbay a mapasamak dayta kenka, tapno ammom ti isungbatmo. Saan ngamin a nakasagana ni Pedro, isu a nagulbod idi naipasango iti narigat a situasion. Ngem nagbabawyanna ti inaramidna isu a pinakawan ti Dios.

Adda sabali pay idi nga adalan ni Jesus a nagulbod. Isu ni Ananias. Ngem saan a pinakawan ti Dios ni Ananias ken ti asawana a ni Safira. Ngamin, immanamong iti panagulbod ni lakayna. Kitaenta no apay a saan a pinakawan ti Dios da Ananias ken Safira.

Sangapulo nga aldawen kalpasan a nagsubli ni Jesus idiay langit. Agarup 3,000 a tattao idin ti nabautisaran idiay Jerusalem. Adu ti naggapu iti adayo a lugar tapno agselebrar iti Piesta ti Pentecostes. Idi nagbalindan nga adalan ni Jesus kayatda ti agpaut pay sadiay tapno ad-adu pay ti maammuanda maipapan iti baro a pammatida. Isu nga inusar ti dadduma nga adalan ni Jesus ti bukodda a kuarta a pangtulong kadakuada.

Inlako da Ananias ken Safira ti dadduma a dagada tapno adda kuarta a pangtulongda kadagiti baro a nabautisaran. Idi impan ni Ananias ti kuarta kadagiti apostol, imbagana a dayta ti amin a naglakuanna. Ngem saan nga agpayso dayta ta indulinna ti dadduma a kuarta! Impakaammo dayta ti Dios ken Pedro, isu a kinuna ni Pedro ken Ananias: “Nagulbodka, saan a kadagiti tattao, no di ket iti Dios.” Iti dayta met laeng a gundaway, natay ni Ananias! Agarup tallo nga oras kalpasanna, simrek met ni baketna. Gapu ta dina ammo ti napasamak ken lakayna, nagulbod met isu a natay.

Maysa a nagsayaat a leksion daytoy kadatayo: Masapul a sursuruentayo nga ibaga ti pudno! Wen, makaaramidtayo iti kamali, nangruna no ubingtayo pay. Dika kadi maragsakan nga ay-ayatennaka ni Jehova ken pakawanennaka a kas ken Pedro?— Ngem laglagipem a masapul nga ibagatayo ti pudno. Ken no nakapagulbodtayo man, masapul a dumawattayo iti pammakawan ti Dios. Dayta ti mabalin nga inaramid ni Pedro isu a napakawan. No aramidentayo ti amin a kabaelantayo a saan nga agulbod, pakawanennatayo met ti Dios!

^ par. 3 No adda kaduam nga ubing, ti uged ket palagip nga agsardengka ken paregtaem nga ibagana ti naawatanna.