Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN PEBRERO 2013

 TI BIBLIA BALBALIWANNA TI BIAG

“Kayatda a Sukimatek a Mismo ti Kinapudno”

“Kayatda a Sukimatek a Mismo ti Kinapudno”
  • PANNAKAYANAKNA: 1982
  • NAKAYANAKANNA: DOMINICAN REPUBLIC
  • PAKASARITAANNA: NAPADAKKEL A MORMON

TI NAPALABASKO:

Naipasngayak idiay Santo Domingo, Dominican Republic. Siak ti buridek kadagiti uppat nga annak. De adal dagiti nagannakko ken kayatda a dumakkel dagiti annakda a nasingpet ken mapagpiaran. Uppat a tawen sakbay a naipasngayak, nakasarita dagiti nagannakko dagiti misionero a Mormon. Gapu ta nagustuanda ti natakneng a panagkawkawes dagiti agkabannuag a lallaki, inkeddeng dagiti nagannakko a ti pamiliami ti kaunaan iti isla nga agbalin a miembro ti Church of Jesus Christ of Latter-day Saints, wenno Mormon Church.

Bayat a dumakdakkelak, magusgustuak dagiti panaglalangen iti kapilia ken pannakaipamaysa ti biag ti pamilia ken naimbag a kababalin dagiti Mormon. Ipagpannakkelko ti panagbalinko a Mormon ken kayatko ti agbalin a misionero.

Idi 18 ti tawenkon, immakar ti pamiliami iti United States tapno agkolehioak sadiay. Agarup makatawen kalpasanna, binisitanakami idiay Florida ti angkel ken antik a Saksi ni Jehova. Inawisdakami nga umatender iti kombensionda. Nasdaawak idi makitak nga ukagen dagiti kaabayko ti Bibliada tapno birokenda dagiti teksto ken aginotarda. Isu a bimmulodak iti bolpen ken papel ket naginotarak met.

Kalpasan ti kombension, imbaga ni antik ken angkelko a gapu ta kayatko ti agbalin a misionero, tulongandak nga agadal iti Biblia. Naragsakanak idi ta ad-adu ti ammok maipapan iti Book of Mormon ngem iti Biblia.

NO KASANO A BINALBALIWAN TI BIBLIA TI BIAGKO:

Bayat ti panagadalmi iti Biblia babaen ti telepono, kanayon a paregtaendak da angkel ken antik nga idiligko dagiti patpatiek iti isursuro ti Biblia. Kayatda a sukimatek a mismo ti kinapudno.

 Adu dagiti pinatik a sursuro dagiti Mormon, ngem diak sigurado no maitunos dagita iti Biblia. Pinatulodannak ni antik iti Nobiembre 8, 1995 a ruar ti magasin nga Agriingkayo!, nga impablaak dagiti Saksi ni Jehova. Addaan dayta kadagiti artikulo maipapan iti patpatien dagiti Mormon. Nasdaawak ta adu pay a pannursuro dagiti Mormon ti saanko nga ammo. Dayta ti nangtignay kaniak a mangsukimat iti Web site dagiti Mormon tapno paneknekak no agpayso ti ibagbaga ti Agriingkayo! Agpayso gayam ken ad-adda pay a napaneknekak a pudno dagita idi bimmisitaak iti museo dagiti Mormon idiay Utah.

Impagarupko idi nga agtunos ti Book of Mormon ken ti Biblia. Ngem idi rinugiak a binasa a naimbag ti Biblia, nadlawko nga agkontra ti pannursuro dagiti Mormon ken dagiti sasao iti Biblia. Kas pagarigan, iti Ezequiel 18:4, kuna ti Biblia a matay ti kararua. Ngem ibaga ti Book of Mormon iti Alma 42:9: “Ti kararua ket di pulos matay.”

Malaksid iti agkokontra a doktrina, maburiborak iti nasionalistiko a kapanunotan nga isursuro dagiti Mormon. Kas pagarigan, isursuro dagiti Mormon a ti hardin ti Eden ket adda idiay Jackson County, Missouri, U.S.A. Ken isursuro dagiti lider ti relihion nga “inton agturay ti Pagarian ti Dios, sipapannakkelton a maiwagayway ti awan tulawna a bandera ti United States iti pagwagaywayan ti wayawaya ken ti agpapada a kalintegan ti tao.”

Pinampanunotko no anianto ti mapasamak iti pagiliak ken ti dadduma pay a pagilian. Idi immawag kaniak ti agtutubo a Mormon a masansanay nga agmisionero, pinagsaritaanmi daytoy a topiko. Sinaludsodko kenkuana no sidadaan a makilaban iti padana a Mormon no makigubat ti pagilianna iti pagilian dagiti padana a Mormon. Nasdaawak idi wen ti insungbatna! Sinukimatko a naimbag dagiti patpatiek ken nagsaludsodak met kadagiti lider ti Mormon Church. Imbagada a misterio ti sungbat dagiti saludsodko ken addanto tiempo a masungbatanto met laeng dagita.

Naupayak iti imbagada, isu a sinukimatko a naimbag ti panggepko no apay a kayatko ti agbalin a misionero dagiti Mormon. Naamirisko a kayatko ti agbalin a misionero tapno tulongak ti sabali a tattao. Kayatko met ti agbalin a misionero gapu ta mararaem dagiti misionero. Ngem bassit laeng ti ammok maipapan iti Dios. Nupay namin-adun a binasak ti Biblia, saanko a talaga nga impateg dayta. Diak ammo ti panggep ti Dios para iti daga ken kadagiti tattao.

NO KASANO A NAGUNGGONAANAK:

Babaen ti pannakipagadalko iti Biblia kadagiti Saksi ni Jehova, naammuak ti nagan ti Dios, ania ti mapasamak no mataytayo, ken no ania ti akem ni Jesus tapno matungpal ti panggep ti Dios. Kamaudiananna, adu met laengen ti naammuak maipapan iti daytoy nagsayaat a libro, ken maragragsakanak a mangiranud kadagiti maad-adalko a kinapudno. Ammok nga adda Dios, ngem ita, babaen ti kararag, mabalinkon ti makisarita kenkuana kas kasingedan a Gayyemko. Nagpabautisarak kas maysa a Saksi ni Jehova idi Hulio 12, 2004, ken innem a bulan kalpasanna, nagserbiak kas amin-tiempo a ministro.

Nagtrabahoak iti sangalubongan a hedkuarter dagiti Saksi ni Jehova idiay Brooklyn, New York iti lima a tawen. Maragsakanak a timmulong iti pannakapataud ti Biblia ken dagiti naibatay iti Biblia a literatura a nakatulong iti minilion a tattao iti intero a lubong. Maragragsakanak pay laeng a tumulong kadagiti sabsabali a mangammo iti Dios.