Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN PEBRERO 2013

Moises—Ulidan ti Kinapakumbaba

Moises—Ulidan ti Kinapakumbaba

ANIA TI KINAPAKUMBABA?

Ti kinapakumbaba ket kasungani ti kinapannakkel wenno kinapangas. Ti napakumbaba a tao ibilangna a nababbaba ti bagina ngem iti sabsabali. Bigbigen ti napakumbaba a tao ti kinaimperpektona ken ammona ti limitasionna.

KASANO NGA IMPAKITA NI MOISES TI KINAPAKUMBABA?

Saan a dimmakkel ti ulo ni Moises idi naikkan iti autoridad. Masansan a no uray adda bassit laeng nga autoridad ti maysa a tao, madlaw a dagus no napakumbaba wenno saan. Kastoy ti komento ti maika-19 a siglo nga autor a ni Robert G. Ingersoll: “Kaaduan a tao maibturanda ti rigat. Ngem no kayatmo a maammuan ti kinatao ti maysa, ikkam iti autoridad.” Nangipakita ni Moises iti nagsayaat nga ulidan iti kinapakumbaba. Kasano?

Naikkan ni Moises iti dakkel nga autoridad, ta dinutokan ni Jehova a mangidaulo iti Israel. Ngem pulos a saan a nagbalin a natangsit ni Moises gapu iti autoridadna. Alaentay a pagarigan ti napakumbaba a panangtamingna iti nadagsen a problema maipapan iti kalintegan nga agtawid. (Numeros 27:1-11) Nadagsen ti problema ta ti desisionna ket agpaay a pagtuladan ti sumaganad a henerasion.

Ania ti aramiden ni Moises? Irasonna ngata a kas lider ti Israel, ammonan ti desision nga aramidenna? Agtalek kadi iti abilidadna, iti kaadu ti kapadasanna, wenno iti nauneg a pannakaammona iti pampanunot ni Jehova?

Nalabit kasta ti aramiden ti napannakkel a tao. Ngem saan nga inaramid dayta ni Moises. Kuna ti Biblia: “Indatag ni Moises ti kasoda iti sanguanan ni Jehova.” (Numeros 27:5) Agasem! Uray 40 a tawenen nga idadauluanna ti nasion ti Israel, nagpannuray latta ken Jehova. Talaga a napakumbaba ni Moises!

Dina pinanunot nga isu laeng ti rumbeng a maaddaan iti autoridad. Naragsakan idi impalubos ni Jehova nga agbalin a propeta ti dadduma nga Israelita. (Numeros 11:24-29) Idi insingasing ti katuganganna nga italekna ti dadduma a rebbengenna, sipapakumbaba a sinurot ni Moises. (Exodo 18:13-24) Idi lakayen, nupay napigsa pay, kiniddawna ken Jehova a mangdutok iti mangsuno kenkuana. Idi pinili ni Jehova ni Josue, naimpusuan a sinuportaran ni Moises ti ub-ubing a lalaki. Pinaregtana pay dagiti tattao nga agtungpalda iti panangidaulo ni Josue nga agturong iti Naikari a Daga. (Numeros 27:15-18; Deuteronomio 31:3-6; 34:7) Talaga nga imbilang ni Moises a maysa a pribilehio nga idauluanna dagiti Israelita iti panagdayaw iti Dios. Ngem impangpangrunana ti pagimbagan ti sabsabali ngem ti autoridadna.

ANIA TI MASURSUROTAYO?

Saan koma a dumakkel ti ulotayo gapu ta addaantayo iti autoridad wenno gapu iti paglaingantayo. Laglagipem: Tapno maitungpaltayo ti annongentayo ken Jehova napatpateg koma ti kinapakumbabatayo ngem iti abilidadtayo. (1 Samuel 15:17) No pudno a napakumbabatayo, ikagumaantayo nga iyaplikar ti nagsayaat a balakad ti Biblia: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.”—Proverbio 3:5, 6.

Isuronatayo met ti ulidan ni Moises a saan koma a nalabes ti panangipategtayo iti kasasaad wenno autoridadtayo.

Sigurado a magunggonaantayo no tuladentayo ti kinapakumbaba ni Moises! No pudno a napakumbabatayo, nalakatayo a pakilangenan ken ipategdatayo dagiti tattao. Kangrunaanna, ipatpategnatayo ni Jehova a mangipakpakita met iti daytoy nagsayaat a galad. (Salmo 18:35) “Ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.” (1 Pedro 5:5) Nagsayaat la ketdin ti agbalin a napakumbaba a kas ken Moises!