Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2012

Pananglaglagip ken Jesu-Kristo

Pananglaglagip ken Jesu-Kristo

“Itultuloyyo nga aramiden daytoy kas panglaglagip kaniak.”—LUCAS 22:19.

Rason nga agselebrar ti dadduma iti Krismas.

No maipapan iti Krismas, kuna ti dadduma a ni Jesus “ti rason ti okasion.” Selebraranda ti Krismas kas panglaglagip iti pannakayanakna.

Apay a mapaay ti panggep?

Adu a nalatak a kanta ken kaugalian iti Krismas ti awan unay pakainaiganna ken Jesu-Kristo. Minilion nga agselselebrar ti saan a mamati kenkuana; saan pay ketdi a patien ti dadduma a nagbiag ni Jesus kas tao. Kadagiti negosiante, nagbalin daytan a tiempo iti panangyanunsio kadagiti produkto imbes a laglagipenda ni Jesus.

Ania dagiti makatulong a prinsipio ti Biblia?

“Ti Anak ti tao immay . . . tapno itedna ti kararuana kas subbot a kasukat dagiti adu.” (Marcos 10:45) Dinakamat ni Jesus dagiti sasao iti rugi daytoy nga artikulo, nalawag a saan nga iti rabii sakbay ti pannakayanakna no di ket iti rabii sakbay ti ipapatayna. Iti daydi a rabii, rinugianna ti simple a selebrasion a manglaglagip iti ipapatayna. Ngem apay a kayat ni Jesus a laglagipen dagiti pasurotna ti ipapatayna imbes a ti pannakayanakna? Agsipud ta ti pangsubbot a sakripisio ni Jesus ti makaipaay kadagiti natulnog a tattao iti gundaway nga agbiag nga agnanayon. “Ta dagiti isupapak ti basol isu ti ipapatay,” kuna ti Biblia, “ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Gapuna, tunggal anibersario ti ipapatay ni Jesu-Kristo, laglagipen dagiti pasurotna nga isu ket “manangisalakan ti lubong” saan a maladaga nga awan gawayna.—Juan 4:42.

“Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Tapno maipakitam ti panagraem ken malaglagipmo ni Jesus, masapul nga adalem ti ulidanna kas perpekto ken masirib a tao. Utobem met no kasano nga impakitana ti asi, anus, ken tured a mangaramid iti umiso. Mangbirokka pay iti pamay-an no kasanom a matulad ti ulidanna.

“Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.” (Apocalipsis 11:15) No lagipem ni Jesu-Kristo, usigem ti ar-aramidenna itan. Agturturayen ni Jesus kas Ari idiay langit. Kunaen ti Sao ti Dios maipapan ken Jesus: “Buyogen ti kinalinteg ukomennanto dagidiay nanumo, ket buyogen ti kinapalungdo mangipaayto iti pannubngar maigapu kadagidiay naemma iti daga.” (Isaias 11:4) Saan a maipakita ti maysa a maladaga dagita a makaay-ayo a galad no di ket ti maysa a mannakabalin nga Agturay.