Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2012

 Saludsod Dagiti Agbasbasa

Apay nga Adda Dagiti Saan nga Agselebrar iti Krismas?

Apay nga Adda Dagiti Saan nga Agselebrar iti Krismas?

Iti intero a lubong, dandani dua a bilion a tattao ti agselselebrar iti Krismas iti Disiembre 25, idinto ta agarup 200 milion ti agselebrar iti pannakayanak ni Jesus-Kristo iti Enero 7. Ngem adda pay minilion a saan nga agselselebrar iti Krismas. Apay?

Mabalin a kamengda iti relihion a saan a paset ti Kakristianuan, kas kadagiti Judio, Hindu wenno Shinto. Dagiti ateista, agnostiko, freethinker, wenno secular humanist, ibilangda nga estoria laeng ti Krismas.

Adu a tattao ti mamati ken Jesus ngem saanda nga agselebrar iti Krismas. Apay? Adda uppat a rason.

Umuna: Saanda a patien a naipasngay ni Jesus iti Disiembre wenno Enero. Awan ti petsa nga ibaga ti Biblia. Kunaenna laeng: “Iti dayta met laeng a pagilian adda met idi dagiti pastor nga aggigian iti ruar ken agbambantay iti rabii kadagiti arbanda. Ket kellaat a ti anghel ni Jehova nagtakder iti sibayda, ket . . . kinuna kadakuada ti anghel: ‘. . . Nayanak kadakayo ita nga aldaw ti maysa a Manangisalakan, nga isu ti Kristo nga Apo.’”—Lucas 2:8-11.

Dagitoy nga ebidensia ipakitada a naipasngay ni Jesus idi agarup rugrugi ti Oktubre, idi adda pay laeng dagiti pastor iti kannag a kaduada ti arban. Bayat dagiti bulan ti Disiembre ken Enero, nakalamlamiis iti away ti Jerusalem. Gapuna, tapno saanda a lamminen iti rabii, mayapon ti arban iti kulonganda.

Maikadua: Ti laeng imbilin ni Jesus a rambakan dagiti pasurotna ket ti pananglaglagip iti ipapatayna, saan a ti pannakayanakna. Maaramid dayta babaen ti simple laeng a pannangan. (Lucas 22:19, 20) Kasta met, saan a dinakamat dagiti Ebanghelio da Marcos ken Juan ti maipapan iti pannakaipasngay ni Jesus.

Ti laeng imbilin ni Jesus a rambakan dagiti pasurotna ket ti pananglaglagip iti ipapatayna, saan a ti pannakayanakna

Maikatlo: Awan pammaneknek ti historia a rinambakan dagiti immuna a Kristiano ti pannakayanak ni Kristo. Ngem rinambakanda ti pananglaglagip iti ipapatayna. (1 Corinto 11:23-26) Nasurok a 300 a tawenen ti napalabas manipud pannakayanak ni Jesus idi opisial a rinambakan ti Kakristianuan ti Krismas iti Disiembre 25. Makapainteres ta iti katengngaan ti maika-17 a siglo, imbilin ti parliamento idiay England a maiparit ti panangrambak iti Krismas. Kasta met laeng ti inaramid ti General Court ti Massachusetts iti United States. Apay? Kuna ti libro a The Battle for Christmas: “Awan ti dinakamat ti Biblia wenno ti historia a mangibaga a naipasngay ni Jesus iti Disiembre 25.” Innayonna pay a kadagiti Puritan, ti “Krismas ket maysa laeng a piesta dagiti pagano a naaramid a piesta dagiti Kristiano.”

Maikapat: Saan a nasayaat ti nagtaudan ti selebrasion. Ti Krismas ket nagtaud iti pagano a Roma ken ti aglalaok a piestana a mangidayaw iti dios ti agrikultura a ni Saturno ken ti dios ti init a ni Sol Invictus, wenno Mithra. Kuna dagiti autor ti libro a Pagan Christmas ken antropologo a da Christian Rätsch ken Claudia Müller-Ebeling: “Kas iti adu a kaugalian ken patpatien sakbay ti panawen dagiti Kristiano, ti kadaanan a piesta a mangrambak iti tinawen a panagsubli ti init ti nagbalin a selebrasion ti pannakaipasngay ni Kristo.”

Gapuna, makitam kadi no apay a saan a selebraran dagiti pudno a Kristiano ti Krismas?