Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NOBIEMBRE 2012

Biag Idi Tiempo ti Biblia—Ti Pastor

Biag Idi Tiempo ti Biblia—Ti Pastor

“Kas iti maysa a pastor ipastorannanto ti bukodna a pangen. Babaen ti takiagna ummongennanto a sangsangkamaysa dagiti kordero; ket iti barukongna awitennanto ida.”—ISAIAS 40:11.

ITI Biblia, namin-adu a nadakamat dagiti pastor, manipud Genesis agingga iti Apocalipsis. (Genesis 4:2; Apocalipsis 12:5) Dagiti natan-ok a tattao a kas kada Abraham, Moises, ken Ari David ket papastor. Nagsayaat ti panangyebkas ni salmista David iti responsabilidad ken pakaseknan ti naimbag a pastor. Ti salmo a pinutar ni Asaf dinakamatna ni David kas pastor ti nagkauna nga ili ti Dios.—Salmo 78:70-72.

Idi kaaldawan ni Jesus, napateg pay laeng ti trabaho a panagipastor. Tinukoy ni Jesus ti bagina kas “nasayaat a pastor” ken masansan nga usarenna dagiti galad ti naimbag a pastor a mangisuro iti napateg a leksion. (Juan 10:2-4, 11) Ti Mannakabalin-amin a ni Jehova a Dios ket nayarig iti “maysa a pastor.”—Isaias 40:10, 11; Salmo 23:1-4.

Ania dagiti animal nga aywanan ti maysa a pastor? Ania ti ramanen ti trabahona? Ania ti masursurotayo kadagitoy nagaget a trabahador?

Karnero ken Kalding

Karaman kadagiti ay-aywanan dagiti nagkauna a pastor iti Israel ket ti broadtail Syrian [Ovis laticaudata]a karnero. Dakkel ken nalukmeg ti burburan nga ipus dagitoy a karnero. Dagiti laeng kalakian ti addaan sara. Nalaka nga iturturong dagitoy a  naamo nga animal ken masapul a maaywananda ta nalakada a madangran iti paniempo ken narungsot nga animal.

Agtaraken met iti kalding dagiti pastor. Dua laeng ti kolor dagiti kalding, nangisit wenno kolor kape. Nalaka laeng a mapisang ti atiddog ken agtillayon a lapayagda gapu kadagiti siit ken nasamek a mulmula no kumalay-atda kadagiti bakras ken agarabda kadagiti naraber a karuotan.

Narigat ti trabaho ti pastor ta agtultuloy ti panangisurona kadagiti karnero ken kalding tapno agtulnogda iti panangiwanwanna. Nupay kasta, nadungngo dagiti naimbag a pastor kadagiti aywanda. Panagananda pay dagitoy tapno nalakada nga agtulnog no awagan ida dagiti pastor.—Juan 10:14, 16.

Tiempo ti Panagipastor

No primavera (Pebrero/Marso), inaldaw nga iruar ti pastor ti arbanna iti kulongan nga adda iti asideg ti pagtaenganna tapno ipaarabna kadagiti nalangto ken naraber a ruot iti asideg a pagpastoran. Iti daytoy a tiempo, umadu ti arban no maipasngay dagiti urbon a karnero ken kalding. Panawen met daytoy a mapukisan dagiti karnero, isu a tiempo dayta ti panagpadaya!

Mabalin nga addaan laeng ti sumagmamano a karnero ti maysa a pumurok, isu a mangtangdan iti maysa a pastor a mangitipon kadagiti karnerona iti aywanna nga arban. Pagaammo a saan unay a nasayaat ti panangaywan dagiti matangtangdanan a pastor kadagiti saanda a taraken.—Juan 10:12, 13.

No naanin dagiti trigo, ipaarab ti pastor ti arbanna kadagiti sagibo ken dagiti nabati a binukel iti naggapasan. No nangaton ti init, dagiti pastor ipanda dagiti arbanda iti nalamlamiis a pagaraban iti nangatngato a lugar. Adu nga al-aldaw a maturog dagiti pastor iti ruar tapno mabantayanda ken maipaarabda ti arbanda iti naraber a rangkis. Iti rabii, iyaponna iti kueba ti arbanna tapno masalaknibanda kadagiti atap nga aso. No mabuak ti arban gapu iti taguob ti atap nga aso, ti naalumamay a timek ti pastor ti mangpatalna kadakuada.

Kada rabii, bilangen ti pastor ti arbanna ken kitaenna no adda agsakit. Iti agsapa, no agayab ti pastor, sumurot met ti arban iti lugar a pagaraban. (Juan 10:3, 4) No agmatuon, ipanna ti arbanna iti nalamiis a libtong tapno painumenna ida. No naatianan ti libtong, ipanna ti arban iti bubon ken agsakdo iti danum nga inumen dagiti karnero.

 No agngudon ti kalgaw, iyakarna ti arbanna iti katantanapan iti igid ti baybay ken iti kapatagan. No panagtutudon, iyaponna idan iti kulonganda, ta no saan, mabalin a matay dagitoy no makutoranda gapu iti napigsa a tudo, bagyo, ken niebe. Manipud Nobiembre agingga iti primavera (Pebrero/Marso), saan nga ipaarab ti pastor ti arbanna iti ruar.

Alikamen ti Pastor

Simple laeng ti kawes ti pastor ngem nalagda. Tapno masalakniban manipud tudo ken nalammiis nga angin iti rabii, mabalin nga adda kagayna a lalat ti karnero, a makin-uneg ti burborna. Adda isuotna a tunika wenno atiddog a kawes. Agsandalias tapno saan a masugat ti sakana kadagiti natadem a bato ken siit. Adda met inabel a de lana a dalungdongna.

Dagitoy ti gagangay nga alikamen ti pastor: Bag a lalat a pagkargaan iti balon a kas iti tinapay, olibo, napakebbet a prutas ken keso (1); armas a kadawyanna a 1 metro ti kaatiddogna ken adda tirad-tirad ti murdongna (2); kutsilio (3); sarukod a pagsammaked ti pastor no magmagna wenno umul-uli (4); pagkargaan ti danum (5); makupin a lalat a pagkaud ti danum iti bubon (6); pallatibong a pangabugna kadagiti agsisiim nga atap nga animal ken pangiturongna kadagiti sumina a karnero ken kalding (7); ken runo a pito a tokarenna tapno maliwliwa ken mangpakalma iti arban (8).

Kas supapak ti bannog ti pastor, mangipaay ti arban iti taraon a kas iti gatas ken karne. Dagiti dutdot ken lalat ket mausar a pagbayad ken pakisinnukat kadagiti produkto. Mausar pay a kawes ken pagkargaan iti likido. Maaramid met a tela ti dutdot ti kalding. Agpada a maidaton dagiti karnero ken kalding.

Maysa a Pagwadan

Nagaget, mapagtalkan ken natured dagiti naimbag a pastor. Irisgoda pay ti biagda tapno masalakniban ti arban.—1 Samuel 17:34-36.

Di ngarud pakasdaawan nga inusar ni Jesus ken dagiti adalanna ti pastor kas pagwadan dagiti Kristiano a manangaywan. (Juan 21:15-17; Aramid 20:28) Kas iti naimbag a pastor idi tiempo ti Biblia, ikagumaan dagiti manangaywan ti kongregasion ita nga ‘ipastoran ti arban ti Dios nga adda iti aywanda, saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar.’—1 Pedro 5:2.