Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NOBIEMBRE 2012

Rumbeng Kadi a Saludsodan ti Dios?

Rumbeng Kadi a Saludsodan ti Dios?

KUNA ti dadduma a di umiso a saludsodan ti Dios. Nalabit ipapanda a kinaawan panagraem no saludsodanda ti Dios no apay nga ipalubosna wenno dina ipalubos a mapasamak ti maysa a banag. Kasta kadi met ti opinionmo?

No kasta, mabalin a masdaawka no adu a nasingpet a tattao ti nagsaludsod iti Dios. Usigem ti dadduma kadagitoy:

Insaludsod ti matalek a lalaki a ni Job: “Apay ngata nga agtultuloy nga agbiag dagiti mismo a nadangkes, limmakayda, kasta met a nagbalinda a natantan-ok iti kinabaknang?”Job 21:7.

Inyimtuod met ni propeta Habakuk: “Apay a kitaem dagidiay makilanglangen a sigugulib, nga agulimekka no daydiay nadangkes alun-onenna daydiay nalinlinteg ngem isu?”Habakuk 1:13.

Insaludsod ni Jesu-Kristo: “Diosko, Diosko, apay a binaybay-annak?”Mateo 27:46.

No basaem ti konteksto dagiti nadakamat a saludsod, awan ti mangipakita a nasair ni Jehova * a Dios. Saan a nakaskasdaaw a binay-anna ida nga agsaludsod. Kas pagarigan, saan a mainsulto ti Dios no kiddawentayo nga ipaayna dagiti kangrunaan a kasapulantayo tapno agtalinaedtayo a nasalun-at. Maragsakan a mangipaay kadagitoy a kiddawtayo. (Mateo 6:11, 33) Kasta met, sipaparabur a mangipaay kadagiti impormasion tapno agtalinaedtayo a nasalun-at iti mental ken emosional. (Filipos 4:6, 7) Kinapudnona, kinuna ni Jesus kadagiti adalanna: “Itultuloyyo ti agdawat, ket maitedto dayta kadakayo.” (Mateo 7:7) Ipakita ti kari ni Jesus a saan laeng a dagiti material a bambanag ti awatentayo no di ket masungbatan pay dagiti napateg a saludsodtayo.

No adda gundawaymo, ania kadagitoy ti kayatmo a saludsoden iti Dios?

  • Ania ti panggep ti biagko?
  • Ania ti mapasamak no matayak?
  • Apay nga ipalubosmo nga agsagabaak?

Yantangay “amin a Kasuratan impaltiing ti Dios,” maammuam dagiti sungbatna babaen ti Saona, ti Biblia. (2 Timoteo 3:16) Ammuentayo no apay nga insaludsod ti dadduma dagiti nadakamat iti ngato ken no ania ti sungbat ti Biblia.

^ par. 7 Jehova ti nagan ti Dios sigun iti Biblia.