Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Nobiembre 2012

Umuna a Saludsod: Ania ti Panggep ti Biagko?

Umuna a Saludsod: Ania ti Panggep ti Biagko?

NI Rosalind a taga-England ket saan a maum-uma nga agadal. Kayatna met a tulongan dagiti tattao. Apaman a nagraduar, naaddaan iti nagsayaat a trabaho a pakairamanan ti panangtulongna kadagiti awanan iti pagtaengan, addaan pisikal a depekto, ken dagiti marigatan nga agsursuro. Nupay naragsak iti trabahona ken nanam-ay ti biagna, kunana, “Adu a tawen a pinampanunotko no, ‘Apay nga agbibiagtayo?’ ken ‘Ania ti panggep ti biag?’”

Apay a normal laeng nga isaludsod dayta?

Ngamin, saan a kas kadagiti animal, adda abilidad dagiti tattao a makasursuro iti napalabas, agplano para iti masanguanan, ken mangammo iti panggep ti biag.

Ania ti kuna ti dadduma?

Para iti adu, ti kangrunaan a panggep ti biag ket gumun-od iti kinabaknang wenno kinalatak tapno agbalin a naragsak.

Ania ti ipakita ti sungbatda?

Datayo ti mangikeddeng no ania ti iyun-unatayo. Napatpateg ti tarigagaytayo ngem iti pagayatan ti Dios.

Ania ti isursuro ti Biblia?

Nagragragsak ken nagurnong ni Ari Solomon iti adu a kinabaknang, ngem napaneknekanna nga awan serserbi amin dagita. Nabigbigna no ania ti mangyeg iti pudpudno a panggep ti biag idi insuratna: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.” (Eclesiastes 12:13) Ania ti ramanen ti panangsalimetmet kadagiti bilin ti Dios?

Maysa kadagiti panggep ti Dios ket agbiagtayo a naragsak. Insurat ni Solomon: “Iti maysa a tao awanen ti nasaysayaat ngem iti pannanganna  ket pudno nga uminum ken ipakitana iti kararuana ti naimbag gapu iti napinget a panagtrabahona. Daytoy met ket nakitak, mismo a siak, a daytoy ket manipud iti ima ti pudno a Dios.”—Eclesiastes 2:24.

Kayat met ti Dios nga ayaten ken aywanantayo ti pamiliatayo. Usigem ti simple ken praktikal a balakad para kadagiti miembro ti pamilia.

  • “Rebbeng a dagiti lallaki ayatenda dagiti assawada a kas kadagiti bukodda a bagi.”—Efeso 5:28.
  • “Ti babai rebbeng nga addaan iti nauneg a panagraem iti asawana.”—Efeso 5:33.
  • “Annak, agtulnogkayo kadagiti nagannak kadakayo.”—Efeso 6:1.

Naragsak ken kontentotayo no iyaplikartayo dagitoy a prinsipio ti Biblia. Ngem ti kapatgan a maaramidtayo ket ikagumaantayo nga ammuen ti maipapan iti Namarsua kadatayo ken agbalintayo a Gayyemna. Kinapudnona, aw-awisennatayo ti Biblia nga ‘umadani iti Dios’ ket inkarina nga ‘Isu umadaninto kadatayo.’ (Santiago 4:8) No awatem daytoy nga awis, maaddaan iti pudpudno a panggep ti biagmo.

Ni Rosalind a nadakamat itay, naammuanna ti pudpudno a panggep ti biag. Mabasam ti insalaysayna a namagbalbaliw iti panangmatmatna iti artikulo a “Ti Biblia Balbaliwanna ti Biag.”

Ammuem ti Ad-adu Pay

ANIA A TALAGA TI ISURSURO TI BIBLIA?

Panagbiag iti Wagas a Makaay-ayo iti Dios

Posible ti agbiag iti wagas a makaay-ayo ken ni Jehova. Kinapudnona, mabalinmo ti makigayyem kenkuana.