Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NOBIEMBRE 2012

Ti Biblia Balbaliwanna ti Biag

Ti Biblia Balbaliwanna ti Biag

KASANO a ti maysa a babai nga awan interesna iti Dios ken nagsayaat ti propesionna, nasarakanna ti pudno a panggep ti biag? Ania ti naammuan ti maysa a Katoliko nga agtutubo a lalaki maipapan iti ipapatay a nangbalbaliw iti biagna? Ken ania ti naammuan ti maysa nga agkabannuag a lalaki a dismayado ti biagna maipapan iti Dios a nakatignayanna nga agbalin a Kristiano a ministro? Basaem ti salaysayda.

“Adu a Tawen a Pinampanunotko No, ‘Apay nga Agbibiagtayo?’”—ROSALIND JOHN

  • PANNAKAYANAKNA: 1963
  • NAKAYANAKANNA: BRITAIN
  • PAKASARITAANNA: NADAYAW TI PROPESIONNA

TI NAPALABASKO:

Naipasngayak idiay Croydon, South London. Siak ti maikanem iti siam nga annak. Dagiti nagannakko ket dati nga agnanaed iti isla ti St. Vincent iti Caribe. Metodista ni nanangko. Nupay pagay-ayatko ti agadal, diak interesado maipapan iti Dios. No bakasion ti eskuela, masansan nga addaak iti igid ti dan-aw iti lugarmi nga agbasbasa iti adu a libro a binulodko iti libraria.

Sumagmamano a tawen kalpasan a nagraduarak, kayatko a tulongan dagiti nakurapay a tattao. Timmulongak nga umuna kadagiti awanan pagtaengan, addaan pisikal a depekto, ken dagiti marigatan nga agsursuro. Idi agangay, simrekak manen iti unibersidad ket nangalaak iti kurso a mainaig iti salun-at. Idi nagturposak, naaddaanak iti agsasaruno a nadayaw a posision ken nagbalin a naluho ti panagbiagko. Kas freelance management consultant ken social researcher, ti laeng laptop-ko ken ti koneksion iti Internet ti kasapulak tapno makapagtrabahoak. Adda dagiti gundaway a mapanak iti sabali a pagilian iti sumagmamano a lawas, agnaedak iti paboritok a hotel, tagiragsakek ti nagpintas nga aglawlaw, ken mapanak iti spa ken gym tapno kanayon a nasalun-atak. Pagarupko a daytoyen ti pudpudno a biag. Nupay kasta, maseknanak latta kadagiti nakakaasi ken mairurrurumen.

NO KASANO A BINALBALIWAN TI BIBLIA TI BIAGKO:

Adu a tawen a pinampanunotko, ‘Apay nga agbibiagtayo ken ania ti panggep ti biag?’ Ngem diak man la sinukimat ti Biblia. Naminsan idi 1999, binisitanak ni adingko a Margaret a maysa idin a Saksi ni Jehova. Kaduana ti gayyemna a Saksi a nangipakita iti personal a pannakaseknan kaniak. Immanamongak nga agpayadal iti Biblia iti gayyem ni adingko, ngem saanak unay a rimmang-ay gapu iti estilo ti panagbiagko ken adu ti tiempo a busbusbosek iti trabahok.

Idi kalgaw ti 2002, immakarak iti makin-abagatan a laud a paset ti England. Sadiay nga intuloyko ti postgraduate study para iti kurso a social research, tapno magun-odko ti doctorate degree. Rinugiak ti regular a makigimong iti Kingdom Hall a kaduak ti barok. Nupay pagay-ayatko ti nangato nga adal, ti panagadalko iti Biblia ti nakatulong kaniak a mangtarus kadagiti problema iti biag ken nangipaay kadagiti solusion. Nabigbigko  a pudno ti kunaen ti Mateo 6:24 a di mabalin ti agserbi iti dua nga appo, ti Dios wenno kinabaknang. Ammok a masapul nga ikeddengko no ania ti iyun-unak.

Iti napalabas a tawen, kanayon idi a tumabunoak iti grupo dagiti Saksi nga agad-adal iti Biblia. Inadalmi ti libro nga Is There a Creator Who Cares About You? * Nakombinsirak a ti laeng Namarsua kadatayo a ni Jehova ti makasolbar kadagiti parikut ti sangatauan. Ngem marurodak ta maisursuro iti unibersidad a saan a masapul a mamatika iti Namarsua tapno adda panggep ti biagmo. Kalpasan ti dua a bulan, diakon intuloy ti kursok iti unibersidad. Inkeddengkon ti mangbusbos iti ad-adu a tiempo para iti naespirituan nga aktibidad.

Natignayak a mangbalbaliw iti panagbiagko gapu iti kunaen ti Biblia iti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Ad-adda a makagunggona a sursuruen ti maipapan iti naayat a Diostayo ngem iti aniaman a kinabaknang ken kinatan-ok nga ipaay ti nangato nga adal. Bayat nga umad-adu ti pannakaammok maipapan iti panggep ni Jehova ditoy daga ken ti panangisakripisio ni Jesus iti biagna kadatayo, ad-adda met a kayatko nga idedikar ti biagko iti Namarsua kadatayo. Nabautisaranak idi Abril 2003. Kalpasanna, in-inut a pinasimplek ti biagko.

NO KASANO A NAGUNGGONAANAK:

Nakapatpateg ti pannakigayyemko ken Jehova. Natalna ti panunotko ken naragsakak gapu iti pannakaam-ammok kenkuana. Maragragsakanak met a makitimpuyog kadagiti agdaydayaw iti pudno a Dios.

Kanayon met a mapnek ti tarigagayko a gumun-od iti pannakaammo babaen kadagiti Nakristianuan a gimong ken ti panagadalko iti Biblia. Maragragsakanak a mangiranud iti pammatik iti sabsabali. Daytoy ti nagbalinen a karerak tapno matulongak dagiti tattao a maaddaan iti nasayaat ken naragsak a biag iti baro a lubong. Sipud idi Hunio 2008, agserserbiakon kas amin-tiempo a ministro ket naragragsak ken kontentoak itan. Agyamanak unay ken Jehova ta addan pudno a panggep ti biagko.

 “Naldaanganak Unay iti Ipapatay ti Gayyemko.”—ROMAN IRNESBERGER

  • PANNAKAYANAKNA: 1973
  • NAKAYANAKANNA: AUSTRIA
  • PAKASARITAANNA: DATI A SUGADOR

TI NAPALABASKO:

Dimmakkelak iti bassit nga ili ti Braunau, Austria. Narang-ay ti kasasaad ti biag iti lugarmi ken manmano ti krimen. Katoliko ti nabangonak a relihion ti pamiliami.

Adda napasamak idi ubingak pay a nakaro ti epektona kaniak. Idi 1984, idi agtawenak iti 11, maysa kadagiti nasinged a gayyemko ti kaduak a  nagay-ayam iti soccer. Ngem iti dayta met la a malem, isu ket natay iti aksidente iti lugan. Naldaanganak unay iti ipapatay ti gayyemko. Uray adun a tawen ti napalabas, pampanunotek pay laeng no ania ti mapasamak no mataytayo.

Idi nagsardengak a nageskuela, nagtrabahoak kas elektrisian. Nupay napeklanak a sugador ken dakkel ti itaytayak, awan problemak iti kuarta. Adu met ti tiempo a busbusbosek iti isports ken pagay-ayatko dagiti musika a heavy metal ken punk rock. Ayuyangko dagiti disco ken party. Imoral ken naisentro iti ragragsak ti biagko ngem mariknak nga adda kurang.

NO KASANO A BINALBALIWAN TI BIBLIA TI BIAGKO:

Idi 1995, adda maysa a lakay a Saksi a simmarungkar kaniak ket inikkannak iti libro a naglaon iti sungbat ti Biblia iti saludsod nga, Ania ti mapasamak no mataytayo? Mapampanunotko pay laeng ti nakalkaldaang nga ipapatay ti gayyemko, isu nga innalak ti libro. Saan laeng a ti kapitulo maipapan iti ipapatay ti binasak no di ket inungpotko a binasa ti libro!

Idi binasak dayta, naammuak ti sungbat dagiti saludsodko maipapan iti ipapatay. Ngem ad-adu pay ti naammuak. Gapu ta dimmakkelak a Katoliko, naisentro ken Jesus dagiti patpatiek. Nupay kasta, ti napasnek a panagadalko iti Biblia ti nakatulong kaniak a maaddaanak iti nasinged a relasion iti Ama ni Jesus a ni Jehova a Dios. Maragsakanak a makaammo a saan nga ilemmeng ni Jehova ti kinasiasinona kadagidiay agsapsapul kenkuana. (Mateo 7:7-11) Naammuak a mannakipagrikna ken kanayon a tungpalen ni Jehova ti saona. Dayta ti nangtignay kaniak a mangsukimat kadagiti padto ti Biblia ken no kasano a natungpal dagita. Bimmileg ti pammatik iti Dios kadagiti natakuatak.

Idi agangay, nabigbigko a dagiti laeng Saksi ni Jehova ti napasnek a tumultulong kadagiti tattao a mangtarus iti Biblia. Binasak iti Bibliami a Katoliko dagiti teksto a nadakamat iti publikasion dagiti Saksi. Bayat ti panagsukimatko, ad-adda met a nabigbigko a nasarakakon ti kinapudno.

Naammuak iti panagadalko iti Biblia a namnamaen ni Jehova nga agbiagak a maitunos iti pagalagadanna. Sigun iti nabasak iti Efeso 4:22-24, naammuak a masapul nga uksobek ti ‘daan a personalidadko’ a timmanor gapu iti ‘sigud a kababalinko’ ken ‘ikawesko ti baro a personalidad a naparsua maitunos iti pagayatan ti Dios.’ Gapuna, insardengkon ti imoral a panagbiag ken ti panagsugalko, ta dayta a bisio iparparegtana ti materialismo ken kinaagum. (1 Corinto 6:9, 10) Ammok a tapno makapagbalbaliwak, masapul nga isardengkon ti makikadua kadagiti dati a gagayyemko ket makikaduaakon kadagidiay padak a mangan-annurot iti pagalagadan ti Dios.

Saan a kaskarina ti agbalbaliw. Ngem rinugiakon ti makigimong iti Kingdom Hall dagiti Saksi ken maaddaan iti baro a gagayyem iti kongregasion. Intultuloyko met ti napasnek a personal a panagadalko iti Biblia. Dagita ti nangtignay kaniak a mangbalbaliw iti musika a pagay-ayatko idi, ti panggepko iti biag, ken ti langak. Idi 1995, nabautisaranak kas maysa kadagiti Saksi ni Jehova.

NO KASANO A NAGUNGGONAANAK:

Umiso itan ti panangmatmatko iti kuarta ken sanikua.  Dati a managpungpungtotak, ngem ita saanen. Saanak met unayen a madanagan iti masakbayak.

Agyamanak unay ta kamengak iti internasional a grupo dagiti agserserbi ken Jehova. Makitak a dadduma kadakuada ti mangan-andur kadagiti problema ngem matalekda latta nga agserserbi ken Jehova. Maragsakanak unay ta saankon a saysayangen ti tiempo ken pigsak a mangpennek iti bukodko a tarigagay, no di ket us-usarek daytan nga agdayaw ken Jehova ken tumulong kadagiti tattao.

 “Adda met Laengen Panggep ti Biagko.”—IAN KING

  • PANNAKAYANAKNA: 1963
  • NAKAYANAKANNA: ENGLAND
  • PAKASARITAANNA: DISMAYADO TI BIAGNA

TI NAPALABASKO:

Naipasngayak idiay England, ngem immakar ti pamiliami idiay Australia idi agtawenak iti pito. Nagnaedkami iti Gold Coast, maysa a lugar a pagpasiaran dagiti turista idiay Queensland, Australia. Nupay saankami a nabaknang, adda a kanayon dagiti kasapulanmi.

Nupay dimmakkelak a nanam-ay ti biagko, saanak a pudpudno a naragsak. Nagbalin a dismayado ti biagko. Mammartek ni tatangko. Adayo ti riknak kenkuana gapu iti panagin-inumna ken iti panangtratona ken Nanang. Idi agangay, naawatak no apay a kasta ti kababalinna idi naammuak dagiti napasaranna kas soldado idiay Malaya.

Nangrugi ti nalabes a panaginumko idi haiskulak. Nagsardengak nga ageskuela idi agtawenak iti 16, ket simrekak iti navy. Nangrugiak nga agdroga ken nagbalinak nga adikto iti sigarilio ken alkohol. Idi damo, iti laeng ngudo ti lawas ti panagin-inumko ngem idi agangay, inaldawen.

Idi agtutuboak, pagduaduaakon ti kaadda ti Dios. Kinunak, ‘No talaga nga adda Dios, apay ngarud nga ipalpalubosna nga agsagaba ken matay dagiti tattao?’ Nangputarak pay iti daniw a mangpabpabasol iti Dios gapu iti amin a kinadakes ditoy lubong.

Immikkatak iti navy idi agtawenak iti 23. Simrekak iti nagduduma a trabaho ken nagbiaheak pay iti sabali a pagilian iti makatawen, ngem nalidayak latta. Awan ti aniaman a paginteresak ken panggepko iti biag. Awan serserbina kaniak ti maaddaan iti bukod a balay, natalged a trabaho ken nasaysayaat a biag. Ti laeng panaginum ken panagdengngeg iti musika ti “pakaliwliwaak.”

Malagipko ti gundaway a tinarigagayak a maaddaan iti panggep ti biagko. Addaak idi idiay Poland, a bumisbisita iti nalatak a kampo a pagbaludan idiay Auschwitz. Nabasbasak idin ti maipapan iti nakaro a kinaranggas iti dayta a lugar. Ngem idi addaakon sadiay a nakatakder ken nakitak ti naglawa a kampo, maladingitanakon. Mariribukanak a mangpanunot no apay a maitured ti tao a parigaten ti padana a tao. Malaglagipko pay nga agsangsangitak bayat a magmagnaak iti kampo a salsaludsodek, ‘Apay?’

 NO KASANO A BINALBALIWAN TI BIBLIA TI BIAGKO:

Idi nakaawidakon idi 1993, rinugiak a binasa ti Biblia gapu ta kayatko a maammuan ti sungbat ti saludsodko. Di nagbayag, dua a Saksi ni Jehova ti bimmisita iti pagtaengak ken inawisdak a tumabuno iti kombension a naangay iti asideg nga istadium. Inkeddengko ngarud ti tumabuno.

Addaak iti dayta met laeng nga istadium sumagmamano a bulan ti napalabas tapno agbuya iti ay-ayam, ngem dakkel ti nakaidumaan daytoy a kombension. Nasayaat ti kababalin ken panagkawkawes dagiti Saksi ken nasingpet dagiti annakda. Nasdaawak pay iti nakitak idi mangaldawdan. Ginasut a Saksi ti mangmangan iti pagay-ayaman, ngem idi nagsublidan iti pagtugawanda, awan man la uray maysa a basura a nabati iti nangananda a lugar. Kangrunaanna, makitak a kontento ken natalna dagitoy a tattao—banag a tartarigagayak unay. Awan ti malagipko iti aniaman a palawag iti dayta nga aldaw, ngem nagtalinaed iti panunotko ti nasayaat a kababalin dagiti Saksi.

Karabiyanna, nalagipko ti kasinsinko nga agbasbasa iti Biblia ken nangadal iti nagduduma a relihion. Sumagmamano a tawen sakbayna, imbagana kaniak a kinuna ni Jesus a mailasin ti pudpudno a relihion babaen iti bungada. (Mateo 7:15-20) Napanunotko a masapul nga ammuek no apay a naiduma dagiti Saksi. Idi laeng a nagbalinak a positibo ken addaan namnama.

Iti sumaruno a lawas, nagsubli ti dua a Saksi a nangawis kaniak iti kombension. Imbagada nga iyadalandak iti Biblia nga inawatko met. Idi agangay, rinugiak metten ti tumabuno kadagiti Nakristianuan a gimong.

Bayat ti panagadalko iti Biblia, naan-anay a nagbaliw ti panangmatmatko iti Dios. Naammuak a saan nga isu ti makinggapuanan iti kinadakes ken panagsagaba ken masaktan ti riknana no agaramid ti dakes dagiti tattao. (Genesis 6:6; Salmo 78:40, 41) Determinadoakon a mangliklik iti aniaman a banag a pagsakitan ti rikna ni Jehova. Kayatko a paragsaken ti pusona. (Proverbio 27:11) Insardengkon ti nalabes a panaginum ken panagsigariliok. Insardengko metten ti imoral a panagbiagko. Idi 1994, nagpabautisarakon kas maysa a Saksi ni Jehova.

NO KASANO A NAGUNGGONAANAK:

Naragsak ken kontentoak itan. No adda problemak idi, uminumak iti arak, ngem ita, nasursurokon nga iyallatiw ken Jehova dagiti problemak.—Salmo 55:22.

Iti naglabas a sangapulo a tawen, adda asawakon a maysa a napintas a Saksi nga agnagan Karen, ken nasingpet a siuman a ni Nella. Maragragsakankami a tallo a mangbusbusbos iti adu a tiempomi iti Nakristianuan a ministerio a tumultulong iti sabsabali tapno maammuanda ti kinapudno maipapan iti Dios. Adda met laengen panggep ti biagko.

^ par. 11 Impablaak dagiti Saksi ni Jehova.