Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NOBIEMBRE 2012

 Umadanika iti Dios

“Ania ti Kidkiddawen Kenka ni Jehova?”

“Ania ti Kidkiddawen Kenka ni Jehova?”

ANIA ti inanamaen ni Jehova kadagidiay agdayaw kenkuana iti pamay-an nga anamonganna? Kalikagumanna kadi ti kinaperpekto, isu a ditay maay-ayo ti Dios gapu ta imperpektotayo? Wenno kalikagumanna laeng ti kabaelantayo nga aramiden? Napateg ti sungbat dagita a saludsod tapno naragsaktayo nga agserbi iti Dios. Usigentayo no ania ti kinuna ni propeta Mikias a kalikaguman ti Dios.—Basaem ti Mikias 6:8.

“Imbagana kenka . . . no ania ti naimbag.” Saanen a masapul a pugtuan pay no ania ti kalikaguman ti Dios kadatayo. Nalawag nga imbagana dagita iti Biblia. Ti kidkiddawen kadatayo ti Dios ket “naimbag,” saan a pagdaksan. “Ti Dios ket ayat,” isu a maseknan iti pagimbagantayo. (1 Juan 4:8; 5:3) Maay-ayotayo ti Dios no agtulnogtayo kadagiti bilinna ket agpaay a pagimbagantayo dayta.—Deuteronomio 10:12, 13.

“Ania ti kidkiddawen kenka ni Jehova?” Adda kadi kalintegan ti Dios nga agkiddaw kadatayo? Wen, adda! Maikari a pagtulnogantayo ti Dios gapu ta isu ti Gubuayan ken Mangsustiner iti biag. (Salmo 36:9) Ania ngarud ti kidkiddawenna kadatayo? Dinakamat ni Mikias ti tallo a banag a kalikaguman ti Dios. Ti umuna ken maikadua ket mainaig iti pannakilangentayo iti padatayo a tao. Ti maikatlo ket mainaig ti relasiontayo iti Dios.

“Panangwatwat iti kinahustisia.” Ti Hebreo a sao para iti “kinahustisia,” sigun iti maysa a reperensia, “ramanenna ti nasayaat a pannakilangen iti komunidad.” Kidkiddawen ti Dios a nasayaat ti pannakilangentayo iti sabsabali, maitunos iti pagalagadanna. Maipakitatayo ti kinahustisia no agbalintayo a nalinteg, mapagpiaran, ken ditay mangidumduma. (Levitico 19:15; Isaias 1:17; Hebreo 13:18) No nasayaat ti pannakilangentayo iti sabsabali, nasayaat met ti panangtratoda kadatayo.—Mateo 7:12.

“Panangayat iti kinamanangngaasi.” Kidkiddawen ti Dios kadatayo a saantayo laeng nga ipakita ti kinamanangngaasi no di ket ayaten wenno ipategtayo dayta. Ti Hebreo a sao a “kinamanangngaasi” (che′sedh) ket naipatarus met kas “naayat a kinamanangngaasi” wenno “nasungdo nga ayat.” Kuna ti maysa nga eskolar ti Biblia: “Ti ayat, asi, ken kinamanangngaasi ket saan nga eksakto a patarus ti [che′sedh]; saan a matupagan ti maysa kadagita a galad, no di ket agtitipon amin dagita.” Saantayo a mapilpilit a mangipakita iti kinamanangngaasi no napateg dayta kadatayo; maragsakantayo a tumulong kadagiti agkasapulan. Kas resultana, sagrapentayo ti ragsak ti panangted.—Aramid 20:35.

“Panagbalin a naemma iti pannakipagna iti Diosmo.” Iti Biblia, ti sasao a “pannakipagna” kaipapananna ti “panangsurot iti maysa a dana.” Makipagnatayo iti Dios babaen ti panangsurot iti wagas ti panagbiag a dinakamat ti Biblia. Masapul nga agbalintayo a “naemma” a mangsurot iti maysa a dana. Kasano? No naemmatayo iti imatang ti Dios, sipapasnek nga usigen ken bigbigentayo ti limitasiontayo iti sanguananna. Gapuna, ti “naemma a pannakipagna” kaipapananna nga ammotayo no ania ti kalikagumanna ken no ania ti kabaelantayo nga ipaay.

Makaparagsak ta saanna a kalikaguman ti nalablabes ngem iti kabaelantayo nga ipaay. Maragsakan ni Jehova no aramidentayo ti amin a kabaelantayo nga agserbi kenkuana. (Colosas 3:23) Ammona ti limitasiontayo. (Salmo 103:14) No sieemma a bigbigentayo ti limitasiontayo, maragsakantayo a makipagna kenkuana. Apay a dimo sursuruen no kasano ti makipagna iti Dios? Ti kasta a pannakipagna mangyeg iti aglaplapusanan a bendision.—Proverbio 10:22.

Singasing a basaen iti Biblia iti Nobiembre:

Joel 1-3Mikias 1-7