Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2012

Ti Bileg ti Sao ti Dios iti Pamilia a Hindu

Ti Bileg ti Sao ti Dios iti Pamilia a Hindu

DIAK pulos malipatan ti sangapamiliaan a panammigatmi idi agsapa ti Lunes, Agosto 22, 2005. Agngangabit idi ti biagko ta adda dakkel a tumor iti utekko. Kalpasan a nagkararag ni lakayko a Krishna, kinasaritak ti pamiliak.

“Mapanak iti ospital para iti naselan nga operasion,” kinunak, “isu a nakasaganakayo koma aniaman ti mapasamak. Inyurnoskon ti pumponko no bilang ta saanak a makalasat. Kadakayo nga agserserbi ken Jehova, agtultuloykayo koma. Kadagiti dadduma, ipakaasik kadakayo nga agpayadalkayo iti Biblia ken tumabunokayo kadagiti Nakristianuan a gimong. Iti kasta, maaddaankayo met iti namnama iti umay a baro a lubong a sadiay dagiti pudno nga agdaydayaw iti Dios agbiagdanto nga agnanayon nga addaan perpekto a salun-at iti paraiso a daga.”

Sakbay nga estoriaek ti nagbanagan ti operasionko, palubosandak a mangisalaysay iti napalabasko ken no kasano a naam-ammok ti pudno a Dios.

Ti Pannakapadakkelko kas Maysa a Hindu

Ub-ubbaennak ni Nanang

Agnanaedkami a sangapamiliaan iti dakkel a balay a naaramid iti landok ken kayo, iti maysa a turod iti igid ti baybay iti siudad ti Durban, South Africa. Tapno makapankami iti makinsango a ruangan ti balaymi, umulikami iti 125 a tukad manipud iti kangrunaan a kalsada nga adda iti baba. Dayta nga agdan ket agturong iti naruot a dalan a mapan iti gate a landok. Iti maysa a sikigan ti gate, adda groto a pagdaydayawan ni lolak. Napno dayta iti ladawan ken imahen dagiti didios ti Hindu. Kinuna ni lolak a “nayanakak agpaay iti groto” (mandir kī baccā, iti Hindi) ken nayanakak kano gapu kadagiti didiosen a pagdaydayawanmi. Iti batog daytoy a groto, adda nasileng a nalabaga nga agdan nga agturong iti makinsango a ruangan. Nagdakkel ti balaymi ta adda atiddog a pasiliona, dakkel a kosina nga adda uging a paglutuanna, pito a siled, ken maysa pay a kuarto a naisilpo iti balay. Agkakabbalaykami amin a 27, agraman dagiti lolo ken lolak, ni tatangko, tallo nga angkelko, maysa nga antik, ken ti pamiliada.

Ti balaymi

Saan a nalaka nga ipaay ti kasapulan ti dakkel a pamilia. Ngem ti panagkakabbalaymi ti namagkaykaysa kadakami ken nangyeg iti adu a naragsak a pakalaglagipan. Pagtitinnulongan dagiti uppat nga agaabirat ti trabaho iti balay, a pakairamanan ni nanangko a Gargee Devi. Agsisinnublatda nga agdalus ken agluto. Ni Lolo ti ulo ti sangakabbalayan, ken isu ti mangipaay iti taraon ti intero a pamilia. Kada Mierkoles, mapan makitienda da Lolo ken Lola iti taraonmi iti makalawas. Nakaugalianmi ti agtugaw iti sirok ti saleng a tumannawag iti tanap iti baba bayat nga ur-urayenmi ida a sumangpet nga aggapu iti ili. Apaman a makitami ida a dumsaag iti bus a nakaawit iti dakkel a basket, agtaraykami nga umulog iti 125 a tukad tapno tulonganmi ida a mangawit kadagiti ginatangda.

Iti asideg ti 125 a tukad

Adda natayag a kayo ti palma iti hardinmi a nangaramidan dagiti billit a mynah iti umokda. Mangngegmi a kanayon ti unida ta tumanayabda iti paraangan. Masansan nga agtugaw ni Lola iti agdan iti makinsango a ruangan sa agestoria kadakami, a kasla ibagbagana ti kaipapanan ti uni dagiti mynah. Adu dagiti  nagsasayaat a pakalaglagipak iti dayta a pagtaengan! Naragsakkami nga agkakabbalay kas maysa a dakkel a pamilia. Agkakatawa, agsasangit, agririnnanud, ken agaayamkami. Kangrunaan ti amin, ditoy a naammuanmi ti maipapan iti Namarsua kadatayo a ni Jehova, ken ti Anakna a ni Jesu-Kristo.

Sakbay a naammuanmi ti maipapan ken Jehova, adu a ritual ti inan-annurotmi iti panagdayawmi kas Hindu. Kanayon met a mangangaykami kadagiti dadakkel a padaya, sa mangawiskami kadagiti bisita tapno agdayaw kadagiti nadumaduma a didiosen. No dadduma, maluganan ni lolak ken makikomunikar kadagiti espiritu, ket iti katengngaan ti rabii, mangidatonkami kadagiti animal tapno maay-ayomi dagiti espiritu. Nalatak met ni lolok iti komunidad gapu iti kontribusionna iti pannakaibangon dagiti eskuelaan ken templo dagiti Hindu.

No Kasano a Nasarakanmi ti Kinapudno Maipapan ken Jehova

Idi 1972, nagsakit ni lolok ket natay. Kalpasan laeng ti sumagmamano a bulan, ni antik nga Indervathey a maawagan met iti Jane, inawatna dagiti magasin a Pagwanawanan ken Agriingkayo! a naggapu iti dua a Saksi ni Jehova. Makonsiensia ta dina pinastrek ida iti balaymi. Saankami ngamin a makisarsarita kadagiti Saksi. Ngem iti simmaruno nga ibibisitada, pinastrek ida ni Anti Jane ken inyebkasna kadakuada ti problemana maipapan iti panagbarbartek ni angkelko. Sugsugsogan ngamin dagiti kaarruba ken kakabagianmi nga idiborsionan ni angkelko. Inlawlawag dagiti Saksi ti panangmatmat ti Dios iti panagasawa. (Mateo 19:6) Nagustuan ni antik ti balakad ken kari ti Biblia maipapan iti nasaysayaat a biag ditoy daga iti masanguanan. * Inkeddengna ti saan a makisina ken angkelko, sa nangrugin nga agpayadal iti Biblia kadagiti Saksi. Nupay iti salas ti balaymi ti pagad-adalanda, dumdumngeg met ti dadduma nga abiratna kadagiti kuartoda.

Idi agangay, nakipagadal metten iti Biblia ti amin nga abiratna. Masansan met nga estoriaen ken ilawlawag kadakami ni Anti Jane dagiti naammuanna ken nabasana iti libro a Panagimdeng iti Naindaklan a Mannursuro. * Bimmusor dagiti angkelko idi naammuanda a makipagad-adal iti Biblia dagiti antik. Innala ti maysa kadagiti angkelko ti amin a literatura agraman ti Biblia sa pinuoranna. Pinagsasawandakami ken kinabkabildakami gapu iti pannakigimongmi. Ni Tatang laeng ti saan a bimmusor ken dinakam pulos linapdan nga agadal maipapan ken Jehova. Intultuloy ti uppat nga agaabirat ti nakigimong isu nga immuneg ti panagayatda ken Jehova a Dios.

Idi 1974, nabautisaran ni Anti Jane kas maysa kadagiti Saksi ni Jehova, kalpasanna simmaruno met ni Nanang ken ti dadduma nga antik. Idi agangay, insardengen ni lolak dagiti ritual ti relihion dagiti Hindu. Adu a tawen a simmursurotak a tumabuno kadagiti Nakristianuan a gimong. Kalpasanna, iti dakkel a kombension dagiti Saksi ni Jehova, maysa a Saksi nga agnagan iti Shameela Rampersad ti nagsaludsod,  “Kaanoka nga agpabautisar?” Kinunak, “Diak pay mabalin ti agbautisar ta awan met ti nangyadal iti Biblia kaniak.” Imbagana nga iyadalannak. Iti simmaruno a kombension, idi Disiembre 16, 1977, nabautisaranakon. Kamaudiananna, 18 ti nabautisaranen kadagiti 27 a miembro ti pamiliami. Ngem idi maoperaanak, maysa pay laeng a Hindu ni tatangko a Sonny Deva.

“Dikay Maringgoran iti Aniaman”

Dakkel ti naitulong kaniak ti sasao iti Filipos 4:6, 7 nangruna idi nadayagnos nga adda dakkel a tumor iti utekko. Kastoy ti mabasa kadagita a bersikulo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” Kasla imposible ti saan a “maringgoran” nangruna no naibaga kenka nga agngangabiten ti biagmo. Nagsangitak idi damo, ngem kalpasanna, nagkararagak ken Jehova. Sipud idin, nariknak “ti talna ti Dios a mangringbaw iti isuamin a panunot.”

Arigna iniggaman ni Jehova a Dios ti makannawan nga imak ket pudno nga indalannak. (Isaias 41:13) Tinulongannak a situtured a mangilawlawag kadagiti doktor a masapul nga agtulnogak iti bilin ti Biblia a liklikan ti dara. (Aramid 15:28, 29) Kas resultana, immanamong ti siruhano ken ti anestesiologo a mangopera kaniak a saan a mangyalison iti dara. Kalpasanna, imbaga ti siruhano a naballigi ti operasion ken naikkaten ti tumor. Imbagana pay nga ita laeng a nakakita iti pasiente a nagpartak a naimbagan iti maysa a naselan nga operasion ti utek.

Tallo a lawas kalpasanna, bayat nga agpapaimbagak pay laeng iti pagtaenganmi, nangyadalakon iti Biblia uray addaak pay laeng iti kamak. Iti ngudo ti maikapito a lawas, nakapagmanehoakon, nakaruarakon a mangasaba, ken nakigimongakon. Agyamanak unay iti tulong dagiti Kristiano a kakabsatko a nangkadua kaniak iti panangasaba. Siguraduenda nga adda kaduak ken natalged a makaawidak. Napartak ti panagimbagko gapu iti kanayon a panagimdengko kadagiti audio recording ti Biblia ken ti panangipamaysak kadagiti naespirituan a bambanag.

Maragsakanak met ta kalpasan ti operasionko, nagpayadal metten ni Tatang iti Biblia kadagiti Saksi. Nabautisaran idi agtawen iti 73, ken sireregta itan nga agserserbi ken Jehova. Nasurok nga 40 a miembro ti pamiliami ti kaduamin nga agdaydayaw ken Jehova. Nupay naapektaran ti panagkita ti makannigid a matak ken napagkakamang laengen iti metal ti bangabangak, segseggaak ti tiempo inton ni Jehova pagbalinenna “a baro ti amin a bambanag” iti Paraiso ditoy daga.—Apocalipsis 21:3-5.

Kaduak ni lakayko (kannigid), ti balasangko, ken nagannakko

Agyamanak ta addaanak iti nadungngo nga asawa nga agserserbi kas Kristiano a panglakayen. Tultulongannak met ti napintas a balasangko a ni Clerista bayat nga itultuloyko ti agserbi kas amin-tiempo nga ebanghelisador. Sibabaknang a binendisionan ni Jehova a Dios ti ministeriok. Adu ti natulongak nga iyad-adalak iti Biblia a makapasar iti bileg ti Sao ti Dios. Nasuroken a 30 kadakuada ti nagdedikar iti Dios ken nabautisaran.

Aglaplapusanan ti namnamak a mangsegsegga iti tiempo inton ispalennatayo ni Jehova a Dios iti sistema ti bambanag a napno iti panagsagaba ken iturongnatayo iti paraiso a daga.

^ par. 12 Para iti kanayonan nga impormasion maipapan iti panggep ti Dios ditoy daga, kitaem ti kapitulo 3 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 13 Impablaak dagiti Saksi ni Jehova ngem saanen a mayim-imprenta.