Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Oktubre 2012

 Umadanika iti Dios

“Nagtugaw ti Kadaanan iti Al-aldaw”

“Nagtugaw ti Kadaanan iti Al-aldaw”

“AWAN ti tao a nakakita iti Dios uray kaano,” kuna ti Biblia. (Juan 1:18) Nakadaydayag ti langa ti Dios ta awan ti tao a makakita kenkuana nga agbiag. (Exodo 33:20) Ngem pinili ni Jehova ti dadduma a lallaki a makasirmata iti kasasaad idiay langit. Maysa kadagita ni propeta Daniel. Nagamanga la ketdi iti nakitana, ket rumbeng a kastatayo met. Kastoy ti panangdeskribir ni Daniel iti nakitana a sirmata. *Basaem ti Daniel 7:9, 10.

“Ti Kadaanan iti Al-aldaw.” Ni laeng Daniel ti nangusar iti titulo a “Kadaanan iti Al-aldaw.” Dayta a termino kaipapananna “maysa nga aduan (wenno lakayen) iti al-aldaw.” (Daniel 7:9, 13, 22) Kasano kabayagen ti kaadda ni Jehova? Yantangay isu ti “Ari ti kinaagnanayon,” ti kaaddana ket sipud pay awan inggana agingga iti agnanayon. (1 Timoteo 1:17; Judas 25) Patalgedan kadatayo ti agnanayon a kaadda ti Dios nga awan inggana ti siribna, ta ti Biblia inaigna ti edad iti sirib. (Job 12:12) Pudno a narigattayo a maawatan ti agnanayon a kaadda ti Dios. Ngem talaga kadi a matarusantayo a naan-anay ti kasisiriban a Dios?—Roma 11:33, 34.

Paliiwem ta “nagtugaw” ti Kadaanan iti Al-aldaw. Apay? Maammuantayo ti sungbat kadagiti konteksto a nagusar kadagiti termino a “ti Pangukoman” ken “panangukom.” (Daniel 7:10, 22, 26) Gapuna, iti sirmata, nakatugaw ni Jehova kas Ukom. Siasino ti ukomenna? Dagiti nasion ditoy daga a nakita ni Daniel iti sirmatana kas an-animal. * (Daniel 7:1-8) Ania a kita ti Ukom ni Jehova?

“Ti pagan-anayna napudaw a kasla niebe, ket ti buok ti ulona kasla nadalus a delana.” Ti puraw isimbolona ti kinalinteg ken kinasin-aw. Puraw ti gagangay a kolor ti delana, isu a puraw ti buok a nayarig iti delana. Mailadawanmo kadi ti nakita ni Daniel a puraw ti buokna nga Ukom a nakakawes iti puraw a kas iti niebe? Dagitoy a panangiladawan ipasiguradona kadatayo a nalinteg ken nainsiriban ti panangukom ni Jehova. Isu ti Ukom a maikari a pagtalkan ken pagraemantayo.

Isu ti Ukom a maikari a pagtalkan ken pagraemantayo

“Adda sangaribu a rinibu a nagtultuloy a nagserbi kenkuana, ken sangapulo a ribu a maminsangapulo a ribu a nagtalinaed a sitatakder iti mismo a sanguananna.” Siasino dagitoy nailangitan a ministro? Tukoyen ti Biblia dagiti anghel kas ‘ministro’ ti Dios. (Salmo 104:4) Nalabit agdagup dagiti anghel iti ginasut a milion nga okupado a “mangitungtungpal iti saona” ken “agar-aramid iti pagayatanna.” (Salmo 103:20, 21) Saan kadi a kanayonan a pammaneknek dayta iti di matukod a kinasirib ti Dios? Ni laeng Jehova ti makaorganisar iti kasta kadakkel a nailangitan a buyot a makapagtultuloy nga okupado iti nakapapaut a tiempo.

Ti sirmata ni Daniel pabilgenna ti panagtalektayo ken Jehova, ti Kadaanan iti Al-aldaw. Nalinteg ti panangukomna ken mapagtalkan ti kinasiribna. Ammuem ti ad-adu pay maipapan iti kasisiriban a Dios iti kasta agbalinka a nasinged kenkuana.

Singasing a basaen iti Biblia iti Oktubre:

Daniel 4-12Oseas 141-14

^ par. 3 Saan a literal a nakita ni Daniel ti Dios. Imbes ketdi, inkabil ti Dios iti isipna ti nalawag a ladawan. Kalpasanna, idi inladawan ni Daniel ti nakitana, nagusar iti piguratibo a sasao agraman ti anthropomorphism—ti panangdeskribir iti Dios babaen kadagiti natauan a galad. Makatulong dayta a panangdeskribir tapno mailadawantayo ti Dios ken saan a rumbeng a tarusan a literal.

^ par. 5 Para iti pannakailawlawag ti sirmata ni Daniel maipapan kadagiti animal, kitaem ti kapitulo 9 ti libro nga Ipangagyo ti Padto ni Daniel! nga impablaak dagiti Saksi ni Jehova.