Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2012

Ti Biblia Balbaliwanna ti Biag

Ti Biblia Balbaliwanna ti Biag

KASANO a nagbalin a naragsak ken naballigi nga asawa ken ama ti maysa a lalaki a nakalkaldaang ti panagubingna? Ania ti nangtignay iti maysa a babai nga adu ti bisiona a mangbalbaliw iti biagna? Basaem ti salaysayda.

“Panagriknak, Awan Serserbik.”—VÍCTOR HUGO HERRERA

  • PANNAKAYANAKNA: 1974
  • NAKAYANAKANNA: CHILE
  • PAKASARITAANNA: DATI A MANGNGINUM

TI NAPALABASKO:

Naipasngayak iti siudad ti Angol iti makin-abagatan a Chile. Diak pulos am-ammo ni tatangko. Idi tallo pay la ti tawenko, immakarkami nga agiina iti Santiago. Nagnaedkami iti barongbarong iti lugar dagiti iskuater. Maymaysa ti kasilias iti iskuater ken agsakdokami iti fire hydrant.

Kalpasan ti agarup dua a tawen, inikkannakami ti gobierno iti bassit a balay. Nakalkaldaang ta nagraira ditoy ti panagdroga, panagbartek, krimen, ken prostitusion.

Naminsan, adda naam-ammo ni Nanang a maysa a lalaki, nga idi agangay, isu ti nakiasawaanna. Mammartek ti agsiuman kaniak. Kabkabilennakami ken Nanang. Masansan nga agsangsangitak no awan makakitkita, ket tartarigagayak nga adda koma amak a mangsalaknib kaniak.

Nupay nagaget nga agtrabaho ni Nanang tapno para iti kasapulanmi, napanglawkami latta. No kasta a mabisinkami, pulbos a gatas laeng ken asukar ti kanenmi. Pasaray agtan-awkami ken manong iti tawa ti kaarruba tapno makabuyakami iti TV. Ngem naminsan, natiliwannakami ti kaarrubami, isu a daydin ti maudi a panagbuyami.

Sagpaminsan, no saan a nakainum ti agsiuman kadakami, igatangannakami iti kanenmi ken manongko. Naminsan, inggatangannakami iti bassit a TV. Dayta ti maysa kadagiti tiempo a malagipko a naragsakak.

Agtawenakon iti 12 idi nasursurok ti agbasa. Makatawen kalpasanna, nagsardengakon nga ageskuela ket nangrugiakon nga agtrabaho. Kalpasan ti trabaho, makikaduaak kadagiti nataengan a katrabahuak a mapan kadagiti party. Sadiay nga agbartek ken agdrogakami, agingga a naadiktoakon.

Idi agtawenakon iti 20, naam-ammok ni Cati, idi agangay nagkasarkami. Idi damo, nasayaat ti kasasaadmi. Idi kuan, nagsubliak manen iti dati a kabibiagko ket dakdakes pay ti nagbalinak. Ngem napampanunotko a mabalin a maibaludak wenno matayak gapu iti ar-aramidek, ta ipalpalak-amko iti anakko a ni Víctor dagiti napasarak idi ubingak pay. Maladingitanak, kagurak ti bagik, ken panagriknak, awan serserbik.

 Idi 2001, dua a Saksi ni Jehova ti simmarungkar iti pagtaenganmi, ket nangrugi ni Cati a nakipagadal iti Biblia kadakuada. Iranranudna met kaniak ti maad-adalna. Gapu ta kayatko a maammuan ti maad-adalna, nangrugiak met nga agadal ti Biblia. Idi 2003, nabautisaran ni Cati kas maysa kadagiti Saksi ni Jehova.

NO KASANO A BINALBALIWAN TI BIBLIA TI BIAGKO:

Naminsan, nabasak ti Ruth 2:12 a kunaenna a gunggonaan ni Jehova dagidiay addaan pammati nga agkamang kenkuana. Naamirisko a no agbalbaliwak, maay-ayok ti Dios ket gunggonaannak. Masansan a mabasak iti Biblia a kondenarenna ti panagbartek. Nakatulong kaniak ti sasao iti 2 Corinto 7:1. Iparegta dayta a teksto a “dalusantayo koma ti bagbagitayo iti tunggal pakatulawan.” Isu nga insardengkon dagiti bisiok ken dakes a kababalinko. Idi damo, marigatanak nga agteppel ngem kanayon a suportarannak ni Cati.

Nagikkatak iti trabahok gapu ta dakkel ti impluensia dagiti katrabahoak nga agsigarilio ken uminum. Nupay awan makukuartami bayat ti kaawan ti trabahok, ad-adu ti tiempok nga agadal iti Biblia. Idi laeng a rimmang-ayak iti naespirituan. Saan a pulos nagsapul ni Cati iti ad-adu a material ngem iti kabaelak nga ipaay. Saan met a nagreklamo iti simple a panagbiagmi. Agyamanak unay iti naayat a suportana.

In-inut a simmingedak kadagiti Saksi. Tinulongandak a mangtarus a nupay nababa ti adalko, ipatpateg ni Jehova ti napasnek a tarigagayko nga agserbi kenkuana. Dakkel ti naitulongna iti pamiliami ti nakitami nga ayat ken panagkaykaysa iti kongregasion Kristiano. Ita pay laeng a napasaranmi ti kasta a talna. Idi Disiembre 2004, nagpabautisarak met.

NO KASANO A NAGUNGGONAANAK:

Napaneknekak nga agpayso dagiti sasao ni Jehova a nairekord iti Isaias 48:17 a kunana: “Siak, ni Jehova, ti Diosmo, Daydiay mangisursuro kenka tapno magunggonaam ti bagim.” Napalalo ti siddaaw ni Nanang ken adingko iti panagbalbaliwko, isu a nagadalda metten iti Biblia. Maragsakan met uray dagiti kaarrubak a naidumaak itan, ken nakaragragsaken ti pamiliami.

Addaanak iti asawa a mangay-ayat iti Dios ken mangibilang kaniak kas mapagtalkan a kadua ken gayyem. Nupay diak am-ammo ni tatangko, insuronak ti Biblia a mangpadakkel iti tallo nga annakko. Raraemendak, ngem ti kapatgan, am-ammoda ni Jehova kas pudno a persona, ken dimmakkelda a mangay-ayat kenkuana.

“Nupay diak am-ammo ni tatangko, insuronak ti Biblia a mangpadakkel iti tallo nga annakko”

Agyamanak unay ta iti laksid ti saan a nasayaat a kasasaadko idi ubingak, inikkannak ni Jehova iti gundaway nga agbalin a naragsak.

 “Nagbalinak a Managpungpungtot ken Agresibo.”—NABIHA LAZAROVA

  • PANNAKAYANAKNA: 1974
  • NAKAYANAKANNA: BULGARIA
  • PAKASARITAANNA: AGLAKLAKO IDI ITI DROGA

TI NAPALABASKO:

Naipasngayak idiay Sofia, Bulgaria. Kalkalainganna ti kasasaad ti panagbiag ti pamiliami. Innem laeng ti tawenko idi pinanawannakami ni Tatang ket kasta unay ti leddaangko. Panagriknak, kasla nabaybay-anak ken di maikari a maipakitaan iti ayat. Bayat nga agmatmataenganak, nagbalinak a rebelioso, managpungpungtot ken agresibo.

Nagtalawak iti pagtaenganmi idi agtawenak iti 14. Masansan a takawek ti kuarta ni Nanang ken dagiti apongko. Kanayon nga adda makaririk iti eskuelaan gapu ta agresiboak. Kas resultana, nayakar-akarak iti lima a nagduduma nga eskuelaan iti sumagmamano laeng a tawen. Tallo laeng koman a tawen malpasakon nga ageskuela, ngem simmardengak. Imoral ti panagbiagko. Nagbalinak nga adikto iti sigarilio ken marihuana. Nalaingak nga uminum, ayuyangko dagiti party, ken naglakoakon iti droga. Panagriknak, awan serserbi ti agbiag ditoy lubong nga ayan dagiti agsagsagaba ken matmatay a tattao, isu nga agragragsakak lattan iti inaldaw.

Idi 1998, idi 24 ti tawenko, naarestoak iti airport ti São Paulo, Brazil, gapu iti panaglakok iti droga. Nasentensiaanak iti 4 a tawen a pannakaibalud.

NO KASANO A BINALBALIWAN TI BIBLIA TI BIAGKO:

Idi 2000, nangrugi a bumisita dagiti Saksi ni Jehova iti pagbaludan, maminsan iti makalawas. Nakaan-anus kaniak ni Marines a maysa kadagiti Saksi, isu a natignayak a mangammo iti ad-adu pay maipapan iti Biblia. Gapu ta awan pay ammok idi maipapan kadagiti Saksi ni Jehova, dinamagko kadagiti padak a balud no ania ti makunada. Nasdaawak ta negatibo ti imbaga ti kaaduan kadakuada. Kinuna ti maysa a balud a mabalinko ti makimiembro iti aniaman a relihion malaksid kadagiti Saksi ni Jehova. Gapu iti imbagana, ad-adda pay a kayatko a maammuan no apay a kagurada unay dagitoy a tattao. Idi agangay, naamirisko a gapu gayam ta pudno ti relihionda. Kinapudnona, kunaen ti Biblia a maidadanesto dagidiay napasnek a pasurot ni Jesus.—2 Timoteo 3:12.

Natudinganak idi nga agtrabaho iti administration building ti pagbaludan. Naminsan, bayat nga addaak iti bodega, nakasarakak kadagiti kahon a naglaon kadagiti daan a magasin * a Pagwanawanan ken Agriingkayo! Innalak dagiti magasin iti seldak ket binasak. Bayat ti panagbasak, kas man la nakasarakak iti ubbog iti tengnga ti desierto. Yantangay adu ti tiempok, adu nga oras nga agbasaak iti Biblia iti inaldaw.

Naminsan, pinaayabandak iti opisina. Ninamnamak a mawayawayaanakon, isu nga inurnongko amin a gargaretko, nagpakadaak  kadagiti padak a balud, sa nagtarayak a napan iti opisina. Ngem idi dimtengak sadiay, naammuak nga adda manen baro a kasok. Addaanak kano kadagiti peke a dokumento. Kas resultana, nasentensiaanak manen iti dua a tawen a pannakaibalud.

Naupayak idi damo, ngem kalpasan ti sumagmamano nga aldaw, nabigbigko a bendision gayam dayta. Nupay adun ti naammuak maipapan iti Biblia, kayatko latta idi nga itultuloy ti dati a wagas ti panagbiagko kalpasan a mawayawayaanak. Kasapulak ti ad-adu pay a tiempo tapno agbalbaliw.

No dadduma mariknak a saanak a maikari kas maysa nga adipen ti Dios. Ngem inut-utobko dagiti sasao iti 1 Corinto 6:9-11. Mabasa iti dayta a teksto nga idi umuna a siglo C.E., dadduma a Kristiano ti dati a mannanakaw, managbarbartek, ken manangkikil sakbay a nagserbida ken Jehova. Ngem nagbalbaliwda babaen ti tulong ni Jehova. Naparegtaak iti ulidanda.

Nalaka laeng a naisardengko ti dadduma a bisiok kas iti panagdroga. Ngem narigatanak a nangisardeng iti panagsigariliok gapu ta naglabas pay ti nasurok a makatawen sakbay a naisardengko dayta. Nakatulong kaniak ti panangammok iti dakes nga epekto ti panagsigarilio iti salun-at. Ngem ti kangrunaan a nakatulong kaniak ket ti masansan a panagkararag ken Jehova.

“Nasarakakon ti kasayaatan nga Ama—daydiay saan a pulos mangbaybay-a kaniak!”

Bayat a sumingsingedak ken Jehova, in-inut a mariknakon a napategak. Natukay ti riknak kadagiti sasao iti Salmo 27:10 a kunana: “No kas pagarigan ti bukodko nga ama ken ti bukodko nga ina pinanawandak, ni met laeng Jehova pidutennakto.” Nabigbigko a nasarakakon ti kasayaatan nga Ama—daydiay saan a pulos mangbaybay-a kaniak! Adda panggep itan ti biagko. Idi Abril 2004, innem a bulan kalpasan a nawayawayaanak, nabautisaranakon kas maysa kadagiti Saksi ni Jehova.

NO KASANO A NAGUNGGONAANAK:

Naragsakak itan. Awanen ti bisiok ken nasaysayaat metten ti salun-at ken riknak ngem idi agtutuboak pay. Naragsak ti panagasawak ken nasingedak iti nailangitan nga Amak a ni Jehova. Nakasarakak iti adu nga amma, inna, kakabsat a lallaki ken babbai iti ummong dagiti agdaydayaw kenkuana. (Marcos 10:29, 30) Agyamanak ta adda nakitada a naimbag kaniak, sakbay pay a naamirisko dayta.

No dadduma, makonsiensiaak gapu iti napalabasko. Ngem maliwliwaak ta iti kari ti Dios a baro a lubong, ‘saanton a malagip’ dagiti dakes a kapadasan. (Isaias 65:17) Kabayatanna, nakatulong kaniak dagiti kapadasak tapno agbalinak a naasi kadagidiay addaan iti kasta a parikut. Gapuna, adda met pagimbagan ti napalabasko. Kas pagarigan, no makipaspasetak iti Nakristianuan a ministerio, saanak a marigatan a makisarita kadagiti adikto iti droga, mammartek, wenno kriminal ken awan ti idumdumak. Kombinsidoak a no nakapagbalbaliwak tapno maay-ayok ni Jehova, ammok a kabaelan met ti asinoman!

^ par. 29 Impablaak dagiti Saksi ni Jehova.