Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2012

Awanton ti Kurapsion!

Awanton ti Kurapsion!

“Manginanamaka ken Jehova ket salimetmetam ti dalanna . . . Inton magessat dagidiay nadangkes, makitamto dayta.”—SALMO 37:34.

KAS iti kaaduan a tao, maamakka kadi nga addanto latta kurapsion ken dinto pulos agpatingga? No wen, normal laeng dayta. Iti intero a pakasaritaan, napadasanen dagiti tattao ti amin a kita ti gobierno. Ngem dida pulos nagballigi a nangikkat iti kurapsion. Addanto kadi tiempo a mapagpiaranton dagiti tattao?

Makaparagsak ta wen ti sungbat ti Biblia! Salaysayenna a dandanin agtignay ti Dios a mangikkat iti kurapsion ditoy daga. Kasano? Aramidenna dayta babaen ti Pagarian, maysa a nailangitan a gobierno a naan-anay a mangbalbaliw iti daga. Daytoy ti Pagarian nga insuro ni Jesus nga ikararag dagiti pasurotna. Iti kararag a maaw-awagan iti Amami, kinuna ni Jesus: “Umay koma ti Pagariam; Matungpal koma ti pagayatam ditoy daga.”—Mateo 6:10, Naimbag a Damag Biblia.

Kastoy ti impadto ti Biblia maipapan iti Agturay iti Pagarian a ni Jesus-Kristo: “Ispalennanto daydiay napanglaw nga  agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada.” (Salmo 72:12-14) Paliiwem ta maawatan ni Jesus ti rikna dagiti biktima ti kurapsion, ken agtignayto a mangpukaw iti panangirurumen. Makaliwliwa la ketdi dayta!

Ikkatenton ti Pagarian ti Dios ti kurapsion ditoy daga babaen ti naasi ken mannakabalin nga Agturay. Kasano? Babaen ti panangikkatna iti tallo a pakaigapuan ti kurapsion.

Ti Impluensia ti Basol

Iti agdama, masapul a pagreggetantayo amin a liklikan ti pagannayasan nga agbasol a mangituggod kadatayo nga agbalin a naagum. (Roma 7:21-23) Ngem adda latta naimbag a tattao a mayat nga agaramid iti umiso. Mamatida a napateg ti mangsubbot a dara ni Jesus, tapno mapakawan dagiti basolda. * (1 Juan 1:7, 9) Magunggonaan dagita a tattao iti naindaklan nga ayat ti Dios kas mabasa iti Juan 3:16: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”

Mangaramidto ti Dios iti nakaskasdaaw a banag kadagiti matalek a tattao. Iti asidegen a baro a lubong, ikkatennanto ti amin nga epekto ti basol, in-inut nga isublina ti perpekto a kasasaad ti sangatauan ken maibilangda a nalinteg iti imatangna. (Isaias 26:9; 2 Pedro 3:13) Mapukawton ti epekto ti basol a mangitugtuggod iti tao nga agaramid ti dakes. Inton agturay ti Pagarian ti Dios, mawayawayaanton dagiti matalek a tattao iti pannakaadipen iti panagrupsa.

Ti Impluensia ti Dakes a Lubong

Nakalkaldaang ta adu ita ti mangigagara a mangbiktima iti sabsabali. Gundawayanda dagiti nababa ken marigrigat, ken impluensiaanda met ti sabsabali nga agaramid iti dakes. Iparegta ti Biblia kadagita nga indibidual: “Ti nadangkes a tao panawanna koma ti dalanna, ken ti makadangran a tao ti pampanunotna.” No agbabawi dagita a tattao, ikari ti Biblia a sidadaanto a mamakawan ti Dios.—Isaias 55:7.

Ngem sigurado a pukawen ti Dios dagidiay mangitultuloy iti dakes nga aramidda. Matungpalton ti kari ti Biblia babaen ti Pagarian ti Dios: “Manginanamaka ken Jehova ket salimetmetam ti dalanna . . . Inton magessat dagidiay nadangkes, makitamto dayta.” * (Salmo 37:34) Isu a no awanton dagidiay nadangkes a madi nga agbalbaliw, saanton a mabiktima iti kurapsion dagiti matalek nga agdaydayaw iti Dios.

Ti Impluensia ni Satanas a Diablo

Ni Satanas a Diablo ti kangrunaan kadagidiay awanan panagbabawi a managbasol. Makaparagsak ta dandanin lapdan ni Jehova ni Satanas a mangimpluensia kadagiti tattao. Inton agangay, madadaelton a naan-anay ni Satanas. Daytoy nakadakdakes nga espiritu dinanton pulos maimpluensiaan dagiti tattao nga agaramid iti dakes.

Ipapantayon nga arapaap laeng ti panangikkat ti Dios iti amin a pakaigapuan ti kurapsion. Ngem nalabit maisaludsodmo, ‘Talaga kadi a kabaelan ti Dios nga aramiden dagita a panagbalbaliw? No wen, apay ngarud a dina pay la inaramid?’ Mangipaay ti Biblia kadagiti makapnek a sungbat kadagita a nagsayaat a saludsod. * Awisendaka a mangusig a mismo iti isursuro ti Biblia maipapan iti masanguanan, inton awanen ti kurapsion.

^ par. 8 Para iti kanayonan a pannakailawlawag ti kinapateg ti mangsubbot nga ipapatay ni Jesus, kitaem ti kapitulo 5 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 12 Jehova ti nagan ti Dios sigun iti Biblia.