Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN SEPTIEMBRE 2012

 Agsursuroka iti Sao ti Dios

Ania ti Mapasamak iti Aldaw ti Panangukom?

Ania ti Mapasamak iti Aldaw ti Panangukom?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Ania ti Aldaw ti Panangukom?

Kas makita iti ladawan iti kannawan, ipapan ti adu a tattao nga inton Aldaw ti Panangukom, binilion a kararua ti maipan iti saklang ti trono ti Dios tapno maukom sigun iti dati nga ar-aramidda. Magunggonaan ti dadduma iti biag idiay langit, idinto ta matutuok ti dadduma idiay impierno. Ngem ipakita ti Biblia a ti panggep ti Aldaw ti Panangukom ket tapno ispalen dagiti tattao iti pannakairurumen. (Salmo 96:13) Ni Jesus ti dinutokan ti Dios nga Ukom a mangisubli iti kinahustisia iti sangatauan.—Basaem ti Isaias 11:1-5; Aramid 17:31.

2. Kasano a maisubli ti kinahustisia iti Aldaw ti Panangukom?

Idi inggagara ti immuna a lalaki a ni Adan ti nagrebelde iti Dios, impatawidna ti basol, panagsagaba, ken ipapatay kadagiti annakna. (Roma 5:12) Tapno maipaay ni Jesus ti hustisia, pagungarennanto ti binilion a natay. Kuna ti libro nga Apocalipsis a mapasamakto daytoy iti sangaribu a tawen a panagturay ni Kristo Jesus.—Basaem ti Apocalipsis 20:4, 11, 12.

Saan a maukom dagiti mapagungar sigun iti inaramidda sakbay a natayda no di ket maibatay iti aramidenda inton maipalgak ti linaon dagiti “lukot” a nadakamat iti Apocalipsis kapitulo 20. (Roma 6:7) Kuna ni apostol Pablo a karaman “dagiti nalinteg ken dagiti nakillo” kadagiti mapagungar ken maaddaan iti gundaway nga agsursuro maipapan iti Dios.—Basaem ti Aramid 24:15.

 3. Anianto ti mapasamak iti Aldaw ti Panangukom?

Maikkan ti gundaway nga agbalbaliw ken agaramid iti naimbag dagidiay natay a saan nakapagserbi ken Jehova a Dios gapu ta dida pay naam-ammo. No agaramidda iti naimbag, “panagungar iti biag” ti sagrapenda. Ngem addanto dagiti napagungar a di mangayat nga agsursuro iti daldalan ni Jehova. Ti panagungarda ket agbalinto a “panagungar iti pannakaukom.”—Basaem ti Juan 5:28, 29; Isaias 26:10; 65:20.

Iti ngudo ti sangaribu a tawen a kapaut ti Aldaw ti Panangukom, naisublinton ni Jehova ti kinaperpekto iti natulnog a sangatauan. (1 Corinto 15:24-28) Anian a nagsayaat a namnama para iti amin a natulnog a tattao! Iti maudi a pannubok, luk-atanto ti Dios ni Satanas a Diablo kalpasan ti sangaribu a tawen a pannakaipupokna iti mangliwengliweng nga abut. Padasento manen ni Satanas nga iyadayo dagiti tattao manipud ken Jehova, ngem dagidiay saan a sumurot ken Satanas, sagrapendanto ti biag nga agnanayon ditoy daga.—Basaem ti Isaias 25:8; Apocalipsis 20:7-9.

4. Ania pay ti sabali nga aldaw a panangukom ti pakagunggonaan ti sangatauan?

Usaren met ti Biblia ti termino nga “aldaw a panangukom” a tumukoy iti panagpatingga ti agdama a sistema ti bambanag. Kellaat a dumteng daytoy nga aldaw ti panangukom kas iti Layus idi kaaldawan ni Noe, a nangpukaw iti amin a dakes a tattao. Makaparagsak ta asidegen ti pannakadadael ti “di nadiosan a tattao” a mangiruangan iti baro a kagimongan dagiti tattao ditoy daga a sadiay nga “agtaeng ti kinalinteg.”—Basaem ti 2 Pedro 3:6, 7, 13.

 

Ammuem ti Ad-adu Pay

Ania ti Aldaw ti Panangukom?

Ammuem no kasano a ti Aldaw ti Panangukom ket pakabendisionan dagiti matalek a tattao.