Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN SEPTIEMBRE 2012

 Umadanika iti Dios

“Kasapulanto a Maammuan Dagiti Nasion a Siak ni Jehova”

“Kasapulanto a Maammuan Dagiti Nasion a Siak ni Jehova”

ANIA ti mariknam no mapabasolka iti krimen a saanmo met nga inaramid? Ken no ngay dayta ti nakaigapuan ti panagsagaba ti sabsabali agraman dagiti inosente a tattao? Sigurado a kayatmo a dalusan ti naganmo! Ammom kadi a kasta ti maipabpabasol ken Jehova? Adu a tattao ita ti mangpabpabasol iti Dios gapu iti panagsagaba ken kinaawan hustisia ditoy lubong. Kayat kadi ni Jehova a dalusan ti naganna? Siempre! Usigem ti mabasa iti libro nga Ezequiel.—Basaem ti Ezequiel 39:7.

“Saankonton a palubosan a matabbaawan ti nasantuan a naganko,” kuna ni Jehova. No isu ti pabasolen dagiti tattao iti kinaawan hustisia, tabtabbaawanda ti nasantuan a naganna. Kasano? Iti Biblia, ti “nagan” masansan nga ipasimudaagna ti reputasion. Kuna ti maysa a reperensia a tumukoy ti nagan ti Dios iti “pakabigbiganna—ti panangyam-ammona iti bagina; irepresentar met dayta ti kinatan-ok ken ti dayawna.” Ti nagan ni Jehova iramanna ti reputasionna. Ania ti panangmatmat ni Jehova iti kinaawan hustisia? Kagurana dayta! Maasian met kadagiti biktima ti kinaawan hustisia. * (Exodo 22:22-24) No dagiti tattao pabasolenda ti Dios kadagiti bambanag a kagurana, daddadaelenda ti reputasionna. ‘Saanda ngarud a raraemen ti naganna.’—Salmo 74:10.

Paliiwem ta namindua nga inusar ni Jehova ti ebkas a “nasantuan a naganko.” (Bersikulo 7) Iti Biblia, namin-adu a nadakamat ti termino a “santo” ken “nasantuan” a nainaig iti nagan ni Jehova. Ti sao a “santo” kaipapananna ti naisina; ipasimudaagna met ti kinadalus ken kinasin-aw. Nasantuan a Dios ni Jehova isu a nasantuan ti naganna, kayatna a sawen, naan-anay a naisina iti aniaman a basol ken kinarugit. Ammom kadi ti rason no apay a dagidiay mangpabpabasol a gapuanan ni Jehova ti kinadakes ket tabtabbaawanda ti ‘nasantuan a naganna’?

Ti kangrunaan a tema ti Biblia ket panggep ni Jehova a dalusan ti naganna babaen iti Pagarianna. Naipaganetget dayta iti libro nga Ezequiel, a maulit-ulit a kunaenna a “kasapulanto a maammuan dagiti nasion a siak ni Jehova.” (Ezequiel 36:23; 37:28; 38:23; 39:7) Paliiwem ta saan a dagiti nasion ti mangikeddeng no ammuenda ni Jehova wenno saan. Imbes ketdi, ‘kasapulan a maammuanda.’ Iti sabali a pannao, agtignay ni Jehova tapno mapilitan dagiti nasion ditoy daga a mangbigbig nga isu daydiay agnagan Jehova—ti Soberano nga Apo a ti naganna irepresentarna ti kinasanto, kinasin-aw, ken kinadalus.

Ti masansan a maulit a kari a “kasapulanto a maammuan dagiti nasion a siak ni Jehova” ket naimbag a damag kadagidiay mangsegsegga iti panagpatingga ti kinaawan hustisia ken panagsagaba. Asidegen a tungpalen ni Jehova dayta a karina a mangdalus iti amin a panangtabbaaw iti naganna. Pukawennanto ti kinadakes ken dagidiay mangisungsungsong iti dayta ngem ispalenna dagidiay mangbigbig ken mangraem iti naganna ken ti itaktakderan dayta. (Proverbio 18:10) Saanka kadi a magutugot a mangammo no kasano nga ad-adda a sumingedka ken Jehova, ti nasantuan a Dios a “managayat iti kinahustisia”?—Salmo 37:9-11, 28.

Singasing a Basaen iti Biblia iti Setiembre:

Ezequiel 39-48Daniel 1-3

^ par. 4 Kitaem ti artikulo nga “Umadanika iti Dios—Managayat iti Hustisia” iti Nobiembre 1, 2008 a ruar Ti Pagwanawanan.