Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN SEPTIEMBRE 2012

Panagraem ken Dignidad iti Panangaywan ti Dios

Panagraem ken Dignidad iti Panangaywan ti Dios

IDI adda ditoy daga ni Jesus, naan-anay nga imparangarangna ti personalidad ti nailangitan nga Amana ken iti panangaramidna kadagiti bambanag. Kinunana: “Awan ti aramidek iti bukodko a nakem; no di ket kas iti insuro kaniak ni Ama sawek . . . kankanayon nga aramidek ti bambanag a makaay-ayo kenkuana.” (Juan 8:28, 29; Colosas 1:15) Isu a no ammuentayo ti pannakilangen ken panangtrato ni Jesus kadagiti babbai, matarusantayo met ti panangmatmat ti Dios ken ti namnamaenna a pannakatrato dagiti babbai.

Bigbigen dagiti iskolar a naiduma unay ti panangmatmat ni Jesus kadagiti babbai no idilig iti panangmatmat dagiti tattao idi maisursurat dagiti Ebanghelio. Ania ti nakaidumaanna? Mangipaay pay laeng kadi ita iti ad-adu a wayawaya dagiti babbai ti pannursuro ni Jesus?

No Kasano a Nakilangen ni Jesus Kadagiti Babbai

Saan nga imbilang ni Jesus dagiti babbai nga agpaay laeng iti seksual a panggep. Sigun iti dadduma a Judio a panguluen ti relihion, mangituggod  iti imoralidad ti pannakilangen kadagiti babbai. Gapu ta ibilangda dagiti babbai a pakagargarian, naparitanda a makisarita kadagiti lallaki iti publiko wenno rummuar nga awan ti abbungotda. Iti sabali a bangir, binalakadan ni Jesus dagiti lallaki a teppelanda ti riknada ken tratuenda koma dagiti babbai iti nadayaw a pamay-an imbes a liklikanda a kalangen ida.—Mateo 5:28.

Kinuna pay ni Jesus: “Siasinoman a mangidiborsio iti asawana a babai ket mangasawa iti sabali makaaramid iti pannakikamalala maibusor kenkuana.” (Marcos 10:11, 12) Kinontrana ti pannursuro dagiti rabbi a mangipalubos kadagiti lallaki a mangidiborsio kadagiti assawada “iti tunggal kita ti pangibatayan.” (Mateo 19:3, 9) Saan nga ammo ti kaaduan a Judio ti kapanunotan a pannakikamalala maibusor iti asawa a babai. Isursuro ngamin dagiti rabbi a di pulos maibilang a nakikamalala ti lalaki uray saan a matalek, dagiti laeng babbai ti maibilang a nakabasol iti pannakikamalala! Kas kunaen ti maysa a komentario ti Biblia, “Impaayan ni Jesus dagiti babbai iti dayaw ken dignidad ta pinagpadana ti karbengan ti lalaki ken babai.”

Ti pagimbagan ti pannursurona ita: No aggigimong dagiti Saksi ni Jehova, nawaya dagiti babbai a makilangen kadagiti lallaki. Dida maamak a di umiso ti panangmatmat ken pannakilangen dagiti Kristiano a lallaki kadakuada, gapu ta dagiti lallaki tratuenda ti ‘babbaket a kas inna, dagiti ub-ubing a babbai a kas kakabsat a babbai buyogen ti isuamin a kinadalus.’1 Timoteo 5:2.

Sinuruan ni Jesus dagiti babbai. Saan a kas iti panangmatmat dagiti rabbi nga awan ti ammo dagiti babbai, insuro ken pinaregta ida ni Jesus a mangyebkas iti opinionda. Impakita met ni Jesus a saan laeng a panagtagibalay ti akem dagiti babbai. Imbes ketdi, adda met kalinteganda nga agsursuro kas iti inaramidna ken Maria. (Lucas 10:38-42) Nagunggonaan met ni Marta a kabsat ni Maria iti pannursurona kas ipakita ti sungbatna ken Jesus kalpasan ti ipapatay ni Lazaro.—Juan 11:21-27.

Napateg ken Jesus dagiti kapanunotan ti babbai. Patien idi dagiti babbai a Judio a ti kaadda ti anak a lalaki ket gubuayan ti ragsak, nangruna no maysa a propeta. Idi kinuna ti maysa a babai: “Naragsak ti aanakan a nangawit kenka!” impakita ni Jesus nga adda pay banag a nasaysayaat. (Lucas 11:27, 28) Dinakamat ni Jesus a napatpateg ti panagtulnog iti Dios ngem iti gagangay nga akem dagiti babbai.—Juan 8:32.

Ti pagimbagan ti pannursurona ita: Dagiti mannursuro iti kongregasion Kristiano ikkanda iti gundaway dagiti babbai nga agkomento kadagiti gimong ti kongregasion. Mararaem dagiti nataengan a babbai kas “mannursuro iti naimbag,” iti man tigtignay ken ulidanda. (Tito 2:3) Ammoda met a dakkel ti maaramidanda a mangiwaragawag iti naimbag a damag ti Pagarian ti Dios.—Salmo 68:11; kitaem ti kahon nga  “Imparit  Kadi ni Apostol Pablo nga Agsao Dagiti Babbai?” iti panid 9.

Impateg ni Jesus dagiti babbai. Idi tiempo ti Biblia, saan unay a maipatpateg dagiti annak a babbai a kas kadagiti annak a lallaki. Iparangarang ti Talmud daytoy a panangmatmat a kunana: “Naragsak daydiay lallaki ti annakna ken asi pay daydiay babbai ti annakna.” Ibilang ti dadduma a nagannak a dadagsen dagiti annak a babbai ta isapulanda iti asawa a makaipaay iti sab-ong, ken saanda a manamnama ti tulongna inton lumakay ken bumaketda.

Impakita ni Jesus nga agpada a napateg ti ubing a babai ken ubing a lalaki ta pinagungarna ti balasang ni Jairo kas iti panangpagungarna iti baro nga anak ti balo idiay Nain. (Marcos 5:35, 41, 42; Lucas 7:11-15) Kalpasan a pinaimbagna ti babai a riniribuk ti maysa nga ‘espiritu ti kinakapuy iti sangapulo ket walo a tawen,’ inawagan ni Jesus ti “babai nga anak ni Abraham,” termino a saan a pagaammo iti sursurat dagiti Judio. (Lucas 13:10-16) Idi inusarna dayta a nadayaw ken naasi a sasao, binigbigna ti nabileg a pammati ti babai nga imbilangna a napateg a kameng ti kagimongan a kas met iti dadduma.—Lucas 19:9; Galacia 3:7.

Ti pagimbagan ti pannursurona ita: Kuna ti maysa a pagsasao iti Asia: “Ti panangpadakkel iti anak a babai kayariganna ti panangsibug iti hardin ti kaarruba.” Dagiti naayat a Kristiano nga amma saanda koma a maimpluensiaan iti dayta a kapanunotan no di ket aywananda koma a naimbag dagiti annakda a lallaki ken babbai. Siguraduen dagiti Kristiano a nagannak a maaddaan iti umdas nga edukasion ken maaywanan ti salun-at dagiti annakda.

Ni Maria Magdalena ti pinili ni Jesus a mangipadamag kadagiti apostol maipapan iti panagungarna

Nagtalek ni Jesus kadagiti babbai. Iti pangukoman dagiti Judio, maibilang ti testimonia ti maysa a babai a kasla testimonia ti maysa nga adipen. Kuna ti historiador idi umuna a siglo a ni Josephus maipapan kadakuada: “Saan koma a maawat ti pammaneknek dagiti babbai gapu ta saanda a mapagtalkan.”

Naiduma ni Jesus gapu ta pinilina dagiti babbai a mangsaksi iti panagungarna. (Mateo 28:1, 8-10) Nupay naimatangan dagitoy matalek a babbai ti pannakapapatay ken pannakaitabon ti Apoda, kasla saan a nakappapati kadagiti apostol ti sasao dagiti babbai. (Mateo 27:55, 56, 61; Lucas 24:10, 11) Ngem babaen ti panagparangna nga immuna kadagiti babbai, imbilang ti napagungar a Kristo a maikarida a mangsaksi a kas iti dadduma pay nga apostolna.—Aramid 1:8, 14.

Ti pagimbagan ti pannursurona ita: Dagiti lallaki nga addaan responsabilidad iti kongregasion dagiti Saksi ni Jehova, ipakpakitada ti konsiderasion kadagiti babbai babaen ti panangikabilanganda  iti kapanunotanda. Kadagiti met Kristiano nga assawa a lallaki, padayawanda dagiti assawada babaen ti panagimdengda kadakuada.—1 Pedro 3:7; Genesis 21:12.

Dagiti Prinsipio ti Biblia—Mangparagsak Kadagiti Babbai

Dagidiay mangyap- aplikar kadagiti prinsipio ti Biblia ipaayanda ti panagraem ken dignidad dagiti babbai

No tuladen dagiti lallaki ti ulidan ni Kristo, maipaayanda ti panagraem ken wayawaya dagiti babbai sigun iti orihinal a panggep ti Dios agpaay kadakuada. (Genesis 1:27, 28) Imbes nga ibilangda a nalalaing ti lallaki ngem iti babbai, agpaiwanwan dagiti Kristiano nga assawa a lallaki kadagiti prinsipio ti Biblia a mangparagsak met kadagiti assawada.—Efeso 5:28, 29.

Idi nangrugi ni Yelena nga agadal iti Biblia, inib-ibturanna ti naranggas a panangtrato ni lakayna. Dimmakkel ni lakayna iti naranggas nga aglawlaw. Gagangay iti lugarda ti panangkabil, ken ti panangkidnap kadagiti babbai a kayatda nga agbalin nga asawa. “Nakapagibturak gapu kadagiti nasursurok iti Biblia,” kuna ni Yelena. “Ammok nga adda mangay-ayat, mangipatpateg, ken maseknan unay kaniak. Ammok nga agbalbaliwto ni lakayko no agadal iti Biblia.” Natungpal ti arapaapna idi immanamong ni lakayna a mayadalan iti Biblia ken nagpabautisar kas maysa kadagiti Saksi ni Jehova. “Mapagwadan ti panagteppelna,” kuna ni Yelena. “Nasursuromi ti sibubulos nga agpinnakawan.” Ti konklusionna? “Nariknak a napateg ti akemko ken masalsalaknibanak kas asawa a babai gapu kadagiti prinsipio ti Biblia.”—Colosas 3:13, 18, 19.

Saan laeng a ni Yelena ti makapaspasar iti kasta. Adu a Kristiano nga assawa a babbai ti naragsak gapu ta ikagkagumaanda ken ti assawada nga iyaplikar dagiti prinsipio ti Biblia iti panagasawada. Naragsakda a makitimpuyog kadagiti padada a Kristiano gapu ta adda panagraem, pannakaliwliwa ken wayawayada.—Juan 13:34, 35.

Bigbigen dagiti Kristiano a lallaki ken babbai a gapu iti kinaimperpekto, karamanda kadagiti parsua ti Dios a “naipasakup iti kinabarengbareng.” Ngem babaen ti panagbalinda a nasinged iti naayat a Dios ken Amada a ni Jehova, addaanda iti namnama a “mawayawayaanto iti pannakaadipen iti panagrupsa” ken tagiragsakendanto ti “nadayag a wayawaya ti annak ti Dios.” Nagsayaat ketdin dayta a namnama dagiti lallaki ken babbai nga adda iti panangaywan ti Dios!—Roma 8:20, 21.