Mapan iti linaonna

Mapan iti segundario a pagpilian

Dagiti Saksi ni Jehova

Iloko

Ti Pagwanawanan  |  Hunio 2012

 Isuroyo Dagiti Annakyo

Nagtulnog ti Dati a Nasukir

Nagtulnog ti Dati a Nasukir

NO MAMINSAN, dimo kadi kayat ti agtulnog? * Nalabit nagbuyaka iti programa iti TV nupay imbaga dagiti nagannakmo a dimo buybuyaen. Ngem nagbabawika met laeng idi agangay. Adda maysa a tao a saan a nagtulnog idi damo. Isu ni Naaman. Ammuentayo no kasano a nagbalbaliw.

Ipapantayo a nagbiagtayo agarup 3,000 a tawen ti napalabasen. Ni Naaman ket natan-ok a komander iti militar ti Siria. Nairuam nga agmanmandar kadagiti soldadona ket agtungpalda kenkuana. Ngem nagkukutel ni Naaman. Immalas ti itsurana ken mabalin a naut-ot pay dagiti sugatna.

Adda balasitang nga Israelita nga adipen ti asawa ni Naaman. Naminsan, imbaga ti adipenna ti maipapan iti lalaki idiay Israel nga agnagan Eliseo a makabael a mangpaimbag ken Naaman. Idi naammuan dayta ni Naaman, kayatna a dagus ti mapan ken Eliseo. Nangitugot iti adu a sagut ket napan idiay Israel a kaduana dagiti soldadona. Napan iti ari ti Israel tapno ipakaammona ti panggepna.

Naammuan dayta ni Eliseo isu a nangibaon ti mensahero iti ari tapno ibaonna ni Naaman a mapan kenkuana. Idi dimteng ni Naaman iti pagtaengan ni Eliseo, nangibaon laeng iti mensahero a mangibaga ken Naaman a mamimpito a bumatok iti Karayan Jordan. Kinuna ni Eliseo a no aramidenna dayta, maimbaganto  ni Naaman. Ania ngata ti reaksion ni Naaman?

Nakapungtot. Isu a nagsukir ken dina kayat ti agtulnog iti propeta ti Dios. Kinunana kadagiti buyotna: ‘Adu met ti nasaysayaat a karayan a pagdigusan iti lugartayo.’ Isu nga agawid koman ni Naaman. Ngem ammom kadi no ania ti imbaga dagiti soldadona?— ‘No narigat ti kidkiddawen kenka ti propeta, aramidem kadi? Apay ngarud a dika agtulnog iti ipapaaramidna idinto ta nalaka met laeng?’

Nagtulnog ni Naaman iti imbaga dagiti soldadona. Bimmatok iti namimpito ket idi rimkuas iti maikapito a daras, nasdaaw ni Naaman—awanen ti kukutelna! Naimbaganen! Dagus a nagsubli ni Naaman iti pagtaengan ni Eliseo agarup 48 a kilometro ti kaadayona. Kas panagyamanna, kayatna nga ikkan ni Eliseo iti nangingina a sagut, ngem saan nga innala dayta ti propeta.

Isu a nagkiddaw ni Naaman ken Eliseo. Ammom kadi no ania ti kiniddawna?— ‘Adda koma maited a daga kaniak a maawit ti dua a mulo.’ Ammom kadi no apay a kiniddawna dayta?— Kinuna ni Naaman a kayatna ti agidaton iti Dios iti daga nga ayan ti ili ti Dios, ti Israel. Inkari ni Naaman a saanen nga agdayaw iti aniaman a dios malaksid ken Jehova! Saanen a nasukir no di ket nagtulnogen iti pudno a Dios.

No dadduma, kaslaka kadi ken Naaman?— No marigatanka nga agtulnog, mabalinmo ti agbalbaliw. Agpatulongka, iti kasta agbalinka a natulnog.

Basaem iti Bibliam

^ par. 3 No adda kaduayo nga ubing nga agbasa, ti uged ket pammalagip nga agsardengkayo biit ket paregtaenyo nga iyebkasna ti kapanunotanna.