Mapan iti linaonna

Mapan iti listaan dagiti linaonna

“Agtalinaedkayo iti Saok”

“Agtalinaedkayo iti Saok”

 “Agtalinaedkayo iti Saok”

“No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.”​—JUAN 8:31, 32.

Ania ti Kaipapananna? Ti ‘sao’ ni Jesus ket isu dagiti pannursurona a nagtaud iti Dios. “Ti met laeng Ama a nangibaon kaniak inikkannak iti bilin maipapan iti ibagak ken iti sawek,” kinuna ni Jesus. (Juan 12:49) Kinunana iti kararagna iti nailangitan nga Amana a ni Jehova a Dios: “Ti saom ket kinapudno.” Masansan a nagadaw iti Sao ti Dios tapno paneknekanna dagiti insurona. (Juan 17:17; Mateo 4:4, 7, 10) Dagiti ngarud pudno a Kristiano ‘agtalinaedda iti saona,’ kayatna a sawen akseptarenda ti Sao ti Dios, ti Biblia, kas “kinapudno” ken ti kakaisuna a pakaibatayan dagiti patpatien ken pagalagadanda.

Kasano nga Impakita Dayta Dagiti Nagkauna a Kristiano? Kas ken Jesus, rinaem met ni apostol Pablo ti Sao ti Dios. Insuratna: “Amin a Kasuratan impaltiing ti Dios ken makagunggona.” (2 Timoteo 3:16) Dagiti lallaki a nadutokan a mangisuro iti padada a Kristiano masapul a ‘kumpetda a sititibker iti sao [ti Dios].’ (Tito 1:7, 9) Nabalakadan dagiti nagkauna a Kristiano a liklikanda dagiti “pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.”​—Colosas 2:8.

Siasinoda Ita ti Mangan-annurot iti Dayta? Kastoy ti nailanad iti Catechism of the Catholic Church a naadaw iti Dogmatic Constitution on Divine Revelation ti Vatican a naannurot idi 1965: “Saan laeng nga iti Sagrado a Kasuratan ti nagibasaran ti Iglesia [Katolika] iti panangilawlawagna iti bambanag a naipalgak. Gapuna, agpada a ti sagrado a tradision ken ti Sagrado a Kasuratan ket masapul nga akseptaren ken annuroten buyogen ti kinasungdo ken panagraem.” Iti maysa nga artikulo iti magasin a Maclean’s idiay Toronto, Canada, nadakamat ti kinuna ti maysa a ministro: “Apay pay laeng a kasapulantayo ti . . . sao a nagtaud dua ribu a tawenen ti napalabas? Nagsasayaat dagiti kapanunotantayo ngem kumapkapuy laeng gapu ta kanayon nga inaigtayo dagitoy ken Jesus ken iti Kasuratan.”

No maipapan kadagiti Saksi ni Jehova, kastoy ti kuna ti New Catholic Encyclopedia: “Ibilangda ti Biblia kas kakaisuna a pagtaudan dagiti patpatien ken pagalagadanda.” Itay laeng nabiit idiay Canada, makiam-ammo pay laeng koma ti maysa a Saksi ni Jehova iti maysa a lalaki idi dagus a kinuna ti lalaki: “Ammok a maysaka a Saksi ni Jehova. Dakayo ngamin ti kanayon a mangus-usar iti Biblia.”