Mapan iti linaonna

Mapan iti listaan dagiti linaonna

Ti Agpayso Maipapan iti Armagedon

Ti Agpayso Maipapan iti Armagedon

 Ti Agpayso Maipapan iti Armagedon

“Dagiti sairo . . . mapanda iti ar-ari iti intero a mapagnaedan a daga . . . , ket inurnongda ida a sangsangkamaysa iti disso nga iti Hebreo maaw-awagan iti Har–Magedon.”​—APOCALIPSIS 16:14, 16.

TI Armagedon, wenno Harmagedon, ket nagan ti maysa a disso. Ngem saan a literal a lugar dayta a masarakan ditoy daga.

Ania ngarud ti agpayso a kaipapanan ti sao nga “Armagedon”? Apay a masansan a mainaig dayta iti maysa a pasamak, kas iti gubat?

Maurnong iti Disso a Maaw-awagan iti Armagedon

Ti orihinal a Hebreo a sao a Har–Magedon literal a kaipapananna ti “Bantay ti Megiddo.” Nupay awan ti kasta a literal a bantay, talaga nga adda disso a Megiddo. Masarakan dayta iti pagsabatan ti dua a kangrunaan a kalsada iti amianan a laud ti nagnaedan ti nagkauna a nasion ti Israel. Adu a nakallalagip a gubat ti napasamak iti asideg dayta, isu a nainaig iti gubat ti nagan a Megiddo. *

Ngem ti talaga a napateg iti Megiddo ket no apay a naggugubatda sadiay, saan ketdi a no ania dagiti gubat a napasamak sadiay. Ti Megiddo ket paset ti Naikari a Daga nga inted ni Jehova a Dios kadagiti Israelita. (Exodo 33:1; Josue 12:7, 21) Inkarina kadakuada nga isalakanna ida kadagiti kabusorda, ket tinungpalna dayta. (Deuteronomio 6:18, 19)  Kas pagarigan, idiay Megiddo, simimilagro nga insalakan ni Jehova dagiti Israelita iti iraraut ti buyot ni Ari Jabin ti Canaan ken ti panguluen ti buyotna a ni Sisera.​—Uk-ukom 4:14-16.

No kasta, adda napateg nga iladladawan ti sao a “Har–Magedon,” wenno “Armagedon.” Nainaig dayta iti panagdangadang ti dua a nabileg a puersa.

Dakamaten ti padto ti Apocalipsis nga addanto tiempo a ni Satanas ken dagiti demoniona gutugotenda dagiti agtuturay tapno urnongenda ti buyotda. Ipakpakitada ngarud a busbusorenda ti pagayatan ti Dios. Minilmilion a tattao ti matay inton rumaut dagitoy a buyot gapu ta abaken ida ti Dios.​—Apocalipsis 19:11-18.

Apay nga adu a tattao ti gudasen ti Dios, a nadeskribir iti Biblia kas “naasi, nabannayat nga agunget ken naruay iti naayat a kinamanangngaasi.” (Nehemias 9:17) Tapno matarusantayo no apay a kastoy ti aramiden ti Dios, nasken a masungbatan dagitoy a saludsod: (1) Siasino ti mangirugi iti gubat? (2) Apay a bumallaet ti Dios? (3) Ania ti pagimbagan daytoy a dangadang agpaay iti daga ken dagiti agindeg iti dayta?

1. SIASINO TI MANGIRUGI ITI GUBAT?

Saan a ti Dios ti mangirugi iti gubat ti Armagedon. Kayatna laeng a salakniban dagiti naimbag a tattao. Dagiti “ar-ari iti intero a mapagnaedan a daga” wenno dagiti lider iti lubong ti mangirugi iti daytoy a dangadang. Apay a rumautda? Gapu ta ni Satanas, a mangkonkontrol kadagiti natauan a gobierno ken dagiti puersa militar, tignayenna ida a mangraut kadagiti agdaydayaw ken Jehova a Dios.​—Apocalipsis 16:13, 14; 19:17, 18.

Iti dadduma a pagilian ita, napateg kadagiti tattao ti wayawaya ti panagsao ken ti relihion. Isu a kasla saan a maaramid dagiti gobierno nga istriktuan wenno pukawen ti aniaman a relihion. Ngem adda dagiti kasta a panangraut iti relihion bayat ti maika-20 a siglo ket saan pay a nagpatingga agingga ita. * Nupay kasta, adda dua a dakkel a pagdumaan dagiti napalabas a panangraut ken ti mapasamak inton Armagedon. Umuna, mapasamak  ti panangraut iti intero a lubong. Maikadua, ti panagtignay ni Jehova a Dios ket nakarkaro ngem iti aniaman nga inaramidna iti napalabas. (Jeremias 25:32, 33) Deskribiren ti Biblia dayta a dangadang kas “gubat ti naindaklan nga aldaw ti Dios a Mannakabalin-amin.”

2. APAY A BUMALLAET TI DIOS?

Ibilin ni Jehova kadagiti adipenna nga agbalinda a mannakikappia ken ayatenda dagiti kabusorda. (Mikias 4:1-3; Mateo 5:43, 44; 26:52) Isu a saanda nga agusar iti armas a mangidepensa iti bagida inton dumteng daytoy naranggas nga iraraut. Matalipupos la ketdi ti ili ti Dios no saan a bumallaet a mangisalakan kadakuada. No kasta, nainaig ditoy ti nagan wenno reputasion ni Jehova a Dios. No agballigi dagiti rumaut iti ili ti Dios, agparangen a di naayat, awanan hustisia, wenno nakapuy ti Dios. Dinto pulos mapasamak ti kasta!​—Salmo 37:28, 29.

Saan a kayat ti Dios a dadaelen ti asinoman, isu a pakpakdaaranna ti amin maipapan iti aramidennanto. (2 Pedro 3:9) Babaen kadagiti salaysay a nairekord iti Biblia, ipalagip ti Dios a binalesna idi dagidiay nangdangran iti ilina. (2 Ar-ari 19:35) Mangpakdaar met ti Biblia nga inton ni Satanas ken dagiti pasurotna rautenda ti ili ti Dios, usarento manen ni Jehova ti pannakabalinna a mangispal iti ilina. Kinapudnona, nabayagen nga impadto ti Sao ti Dios a dadaelento ni Jehova dagiti nadangkes. (Proverbio 2:21, 22; 2 Tesalonica 1:6-9) Iti dayta a gundaway, sigurado a mabigbigto dagiti rumaut a ti gayam Mannakabalin-amin a Dios ti lablabananda.​—Ezequiel 38:21-23.

3. ANIANTO TI PAGIMBAGAN DAYTOY A DANGADANG?

Minilion a biag ti maisalakan inton gubat ti Armagedon. Kinapudnona, dayta ti mangiruangan iti panawen ti talna ditoy daga.​—Apocalipsis 21:3, 4.

Kuna ti libro nga Apocalipsis nga addanto di mabilang a “dakkel a bunggoy” a makalasat iti daytoy a dangadang. (Apocalipsis 7:9, 14) Iti panangiwanwan ti Dios, tumulongdanto a mamagbalin a Paraiso ti daga sigun iti orihinal a panggep ni Jehova.

Ammotayo kadi no kaano a maraut ti ili ti Dios?

[Footnotes]

^ par. 6 Uray iti kaaldawantayo, adda dagiti lugar a nainaig iti gubat. Kas pagarigan, ti siudad ti Hiroshima iti Japan, a napukaw gapu iti panagbettak ti bomba atomika, ket simbolo itan ti pangta ti nuklear a gubat.

^ par. 13 Ti Holocaust ket maysa a pagarigan ti panagregget ti gobierno a mangpukaw iti relihion ken mangikisap iti nagduduma a puli. Iti nagbaetan ti 1917 ken 1991, nakaro ti pannakairurumen dagiti narelihiosuan a grupo iti dati a turay ti Russia. Kitaem ti artikulo a “Natalna a Tattao Idepensada ti Naimbag a Naganda,” iti Pagwanawanan a Mayo 1, 2011, nga impablaak dagiti Saksi ni Jehova.

[Ladawan iti panid 6]

Insalakan idi ni Jehova a Dios ti ilina

[Ladawan iti panid 7]

Isalakanto manen ni Jehova ti ilina inton gubat ti Armagedon