Mapan iti linaonna

Mapan iti listaan dagiti linaonna

 Saludsod Dagiti Agbasbasa

Agpatingganto Kadi ti Daga?

Agpatingganto Kadi ti Daga?

▪ Adda dagiti mamati nga agpatingga ti daga idi Oktubre 21, 2011. Ngem saan a napasamak dayta. Napaay ngarud ti padto ni Harold Camping a maysa a brodkaster iti radio iti U.S. Impadtona a dumteng ti Aldaw a Panangukom iti Mayo 21, 2011​—adda kano napigsa a ginggined a mangdayyeg iti intero a lubong, ket lima a bulan kalpasanna, iti Oktubre 21, matalipupos ti daga.

Ngem saanto a pulos nga agpatingga ti daga. Dinto ipalubos dayta ti Namarsua iti Daga. Kuna ti Saona: “Impasdekmo a sititibker ti daga, tapno makapagtalinaed dayta.”​—Salmo 119:90.

Ngem saan nga umanamong iti dayta ti dadduma nga agbasbasa iti Biblia ta kunada a madadael daytoy a planeta babaen iti apuy. Dakamatenda ti 2 Pedro 3:7, 10 kas pammaneknek iti kasta a panangmatmat: “Babaen iti isu met laeng a sao naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao. . . . Nupay kasta, ti aldaw ni Jehova umayto a kasla mannanakaw, nga iti dayta aglabasto ti langlangit buyogen ti sumayetset a daranudor, ngem marunawto dagiti elemento yantangay nakapudpudotda unay, ket ti daga ken ti ar-aramid nga adda iti dayta matakuatanto.” Literal kadi ti kaipapanan ti sasao ni apostol Pedro?

Saan a literal ti kinunana. Apay? Agsipud ta ti kaipapanan dagitoy a bersikulo masapul a maitunos iti imbaga ni Pedro iti dadduma pay a paset ti suratna ken iti dadduma pay a paset ti Biblia. No tarusantayo a literal dagitoy a teksto, kaipapananna a madadael iti apuy ti langlangit, wenno uniberso​—a buklen ti binilbilion a bituen ken dadduma a banag​—gapu laeng ta adda nadangkes a tattao iti maysa a nagbassit a pasetna. Dadaelem kadi ti kinilkilometro a kadaratan iti igid ti baybay gapu laeng ta saanmo a magustuan ti maysa a binukel ti darat? Saan, ta di nainkalintegan dayta. Kasta met, saan a dadaelen ni Jehova ti intero nga uniberso a pinarsuana gapu laeng ta adda panagrebelde a napasamak ditoy daga.

Kasta met, maikontra daytoy a kapanunotan iti kinuna ni Jesu-Kristo: “Naragsak dagiti naalumamay ti kababalinda, yantangay tawidendanto ti daga.” (Mateo 5:5; Salmo 37:29) Mangaramid kadi ti maysa a naayat nga ama iti komportable a balay para iti pamiliana tapno puorannanto laeng? (Salmo 115:16) Minamaag dayta! Ni Jehova ti Namarsua ken maysa met a naayat nga Ama.​—Salmo 103:13; 1 Juan 4:8.

Inusar ni Pedro ti termino a “daga” iti piguratibo a pamay-an, a tuktukoyenna ti kagimongan ti tao​—dagiti dakes a tattao. Kitaem ta indilig ni Pedro daytoy iti Layus idi kaaldawan ni Noe. (2 Pedro 3:5, 6) Ti laeng nadangkes idi a tattao ti nadadael; nakalasat ti daga ken ni nalinteg a Noe ken ti pamiliana. Inusar met ni Pedro ti sao a “langlangit” iti piguratibo a pamay-an. Iti daytoy a kaso, ti “langlangit” tumukoy iti panangituray ti tao kadagiti di nadiosan a tattao. No kasta, dagiti laeng nadangkes agraman ti amin a dakes a gobierno ti pukawen ken sukatan ti nailangitan a turay wenno Pagarian ti Dios.​—Daniel 2:44.

Ngarud, agpatingganto kadi ti planeta a daga? Saan. Ti agpatingga isu ti simboliko a daga, wenno dagiti nadangkes a tattao. Ngem agtalinaedto iti agnanayon ti mismo a daga ken ti nalinteg a tattao.​—Proverbio 2:21, 22.