Mapan iti linaonna

Mapan iti listaan dagiti linaonna

Abraham—Ulidan ti Nabileg a Pammati

Abraham—Ulidan ti Nabileg a Pammati

 Abraham​—Ulidan ti Nabileg a Pammati

Agtaktakder ni Abraham iti ruar ti toldana bayat ti naulimek a rabii. Bayat a matmatmatanna ti naraniag ken namituen a langit, pampanunotenna ti kari ti Dios nga umadunto ti kaputotanna a kas kadagiti bituen. (Genesis 15:5) Dagiti bituen ti mangipalagip ken mangpatalged ken Abraham a sigurado a tungpalen ni Jehova ti karina. No nabaelan ni Jehova a pinarsua ti naglawaan nga uniberso ken amin nga adda iti dayta, saanna met ngata a kabaelan nga ikkan da Abraham ken Sara iti anak? Kasta kabileg ti pammati ni Abraham.

ANIA TI PAMMATI? Ti sao a “pammati” iti Biblia ket tumukoy iti natibker a panamati iti banag a di pay nakita. Naibasar dayta iti natibker nga ebidensia. Ti tao a nabileg ti pammatina iti Dios naipamaysa ti panunotna iti kaitungpalan dagiti kari ni Jehova, ta ibilangna a kasla natungpalen dagitoy.

KASANO NGA IMPAKITA NI ABRAHAM TI NABILEG A PAMMATI? Impakita ni Abraham a mamati kadagiti kari ti Dios. Gapu iti nabileg a pammati ni Abraham, pinanawanna ti ili a nakayanakanna, ta agtalek a tungpalen ni Jehova ti karina a mangipakita kenkuana iti maysa a daga. Dinaliasat met ni Abraham ti intero a daga ti Canaan, ta masiguradona nga inton agangay tagikuaen dayta dagiti kaputotanna. Situtulnog met nga idaton koman ni Abraham ni Isaac, ta agtalek a pagungaren ni Jehova no kasapulan.​—Hebreo 11:8, 9, 17-19.

Pinampanunot ni Abraham ti masanguanan, saan a ti napalabas. Nupay nanam-ay ti biag da Abraham ken Sara idiay Ur no idilig idiay Canaan, “saan a ti daga a pinanawanda ti pampanunotenda.” (Hebreo 11:15, Ti Baro  a Naimbag a Damag Biblia) Pinampanunotda ketdi no kasanonto a bendisionan ida ti Dios ken dagiti tumaud a kaputotanda.​—Hebreo 11:16.

Adda kadi natalged a pangibasaran ni Abraham iti pammatina? Adda. Tinungpal ni Jehova ti amin a karina. Idi agangay, immadu ti kaputotan ni Abraham a nagbalin a nasion a naawagan iti Israel. Kalpasanna, nagnaed dagiti Israelita iti Canaan, ti mismo a daga nga inkari ni Jehova ken Abraham.​—Josue 11:23.

ANIA DAGITI PUNTO A MAADALTAYO? Agtalektayo a tungpalen ni Jehova dagiti karina. Uray pay no dadduma kadagitoy ti kasla imposible iti tao, agtalektayo nga “iti Dios amin a banag mabalin.”​—Mateo 19:26.

Ipakita met kadatayo ti ulidan ni Abraham a panunotentayo koma dagiti banag a sagrapentayo iti masanguanan, imbes a dagiti napalabas. Kasta ti nasursuro ti maysa a lalaki nga agnagan Jason. Nagbalin a paralisado gapu iti grabe a sakitna. Kinunana: “Aminek a no dadduma pampanunotek ti napalabas. Kailiwko ti babassit a banag a kas ti panangarakupko iti asawak a ni Amanda.”

Nupay kasta, nabileg ti pammati ni Jason a tungpalento ni Jehova dagiti karina, a kas iti karina nga agbalin a paraiso ti daga ken maipaayan iti biag nga agnanayon ken naan-anay a salun-at dagiti matalek a tattao. * (Salmo 37:10, 11, 29; Isaias 35:5, 6; Apocalipsis 21:3, 4) “Palagipak ti bagik nga iti pay laeng masanguanan a maadda dagiti nasayaat a tiempo,” kuna ni Jason. Sana inlawlawag: “Mabiit laengen, agnanayonton nga awan ti sikor, danag, liday, ken maduddudog a rikna.” Nagsayaat ketdin nga ulidan iti natibker a pammati, kas ken Abraham!

[Footnote]

^ par. 9 Tapno maammuam ti ad-adu pay maipapan iti masanguanan a paraiso ditoy daga, kitaem ti kapitulo 3, 7, ken 8 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.