Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2011

Dagiti Aramiden No Adda Natural a Didigra

Dagiti Aramiden No Adda Natural a Didigra

  Dagiti Aramiden No Adda Natural a Didigra

Gapu ta masansan ken nakaro dagiti natural a didigra, kasano a makapagsaganatayo? Usigentayo dagiti praktikal a pamay-an.

Lisian ti dalan ti kalamidad. “Nasaldet daydiay nakakita iti didigra ket rugianna ti aglemmeng, ngem daydiay awanan kapadasan limmasat ket masapul a sagabaenna ti pannusa,” kuna ti Biblia. (Proverbio 22:3) Nasayaat nga ipangagtayo daytoy a nainsiriban a balakad no dumteng dagiti didigra. Kas pagarigan, no naipakdaar a bumtak ti bulkan, umay ti layus, wenno dumteng ti bagyo, nainsiriban nga agkamangtayo iti nataltalged a lugar. Napatpateg ti biag ngem iti balay wenno dadduma a material a bambanag.

Pinili ti dadduma ti agnaed iti natalged a lugar. Kuna ti maysa nga autoridad: “Bassit laeng dagiti napeggad a paset ti Daga a pakapasamakan dagiti nakaro a didigra.” Kas pagarigan, napeggad dagiti nababa a lugar iti igid ti baybay wenno iti asideg dagiti rengngat ti daga (fault line). Mabalin a malisianyo dagiti didigra no saankayo nga agnaed kadagiti napeggad a lugar wenno umakarkayo iti nataltalged a lugar.

Agplano. Uray kasano ti annadyo, dumtengto latta ti di ninamnama a didigra. Ngem nalaklaka a malasatanyo ti didigra no nakasaganakayo. Kasta ti naibalakad itay iti Proverbio 22:3. Naisagana kadin ti emergency kit a mabalinmo a bitbiten no adda didigra? Irekomenda ti libro a 1-2-3 of Disaster Education nga iramanyo dagitoy: First aid kit, naibotelia a danum, napreserba a taraon, ken napapateg a dokumento. Nasayaat met no usigen ti pamiliam dagiti tumaud a kasasaad ken dagiti mabalin nga aramiden no adda didigra.

Agtalinaed a nasinged iti Dios. Makatulong daytoy iti aniaman a gundaway. Ibaga ti Biblia a ti Dios ket “Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi.” Iti sabali a bersikulo, nailadawan met kas Dios a “mangliwliwa kadagidiay naipababa.”—2 Corinto 1:3, 4; 7:6.

Wen, talaga a maseknan ti Dios iti kasasaad dagidiay agtalek kenkuana. Isu ket naayat a Dios a mangpabileg kadatayo iti nadumaduma a pamay-an. (1 Juan 4:8) Makatulong iti aniaman a kasasaad ti panangikararag iti nasantuan nga espiritu ti Dios, saan nga iti milagro. Ti nasantuan nga espiritu ipalagipna dagiti makaliwliwa a teksto ti Biblia kadagidiay agsagsagaba. Mabalin a marikna dagiti matalek nga adipen ti Dios ti kinuna ni David  nga ari ti nagkauna nga Israel: “Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak; ti baston ken sarukodmo isuda ti bambanag a mangliwliwa kaniak.”—Salmo 23:4.

Agtitinnulong dagiti Kristiano. Idi umuna a siglo, imbaga ti Kristiano a mammadto a ni Agabo nga adda “dakkel a panagbisin [nga] asideg idin a mapagteng iti intero a mapagnaedan a daga; a no maipapan iti dayta a banag, pudno a naaramid idi tiempo ni Claudio.” Adu nga adalan ni Jesus idiay Judea ti naapektaran. Ania ti inaramid dagiti Kristiano iti sabali a lugar idi nadamagda ti nakaay-ay-ay a kasasaad dagiti padada a Kristiano? Kuna ti salaysay: “Inkeddeng [dagiti adalan], tunggal maysa kadakuada sigun iti kabaelan ti asinoman, a mangipatulodda iti tulong a pagserbi kadagiti kakabsat nga agnanaed idiay Judea.” (Aramid 11:28, 29) Siaayat a nangipaayda iti material a tulong.

Kasta met ita ti aramiden dagiti adipen ti Dios no mapasamak dagiti nakaro a kalamidad. Pagaammo dagiti Saksi ni Jehova gapu iti panagtitinnulongda nga agkakapammatian. Kas pagarigan, idi napasamak ti napigsa a ginggined idiay Chile idi Pebrero 27, 2010, dagus a timmulong dagiti Saksi ni Jehova kadagiti naapektaran. Kuna ni Karla nga inyanud ti tsunami ti balayda: “Anian a makaliwliwa ken makaparegta a makita [dagiti pada a Saksi] manipud sabali a lugar nga umay tumulong kadakami. Liniwliwanakami ni Jehova babaen iti kinaimbag dagidiay a boluntario. Nariknak ti ayat ken pannalaknib.” Naimatangan ti saan a Saksi a lolona ti tulong a naipaay kadakuada ket kinunana: “Nagpaiduma daytoy iti makitkitak a kababalin dagiti karelihionak iti adun a tawen.” Gapuna, natignay nga agpayadal iti Biblia kadagiti Saksi ni Jehova.

Ti pannakikadua kadagiti mangay-ayat iti Dios ket dakkel a tulong iti tiempo ti rigat. Ngem addanto kadi tiempo nga awanen dagiti didigra? Kitaentayo ti kunaen ti Biblia.

[Ladawan iti panid 6]

Nakaisaganaka kadin iti emergency kit a mabalinmo a bitbiten no adda didigra?

[Ladawan iti panid 7]

Makatulong iti aniaman a kasasaad ti panangikararag iti nasantuan nga espiritu ti Dios, saan nga iti milagro

[Ladawan iti panid 7]

Agtitinnulong dagiti Kristiano no adda didigra

[Ladawan iti panid 7]

“Nariknak ti ayat ken pannalaknib”