Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2011

Awanton ti Didigra!

Awanton ti Didigra!

  Awanton ti Didigra!

ANIA ti reaksionmo no adda mangibaga kenka, “Dandanin mapukaw dagiti didigra”? Mabalin a pagarupem nga ang-angawennaka. Wenno mabalin a kunaem, “Agtagtagainepkan sa? Kasinginen ti biag dagiti didigra.”

Nupay kasla agnanayon nga adda dagiti natural a didigra, manamnamatayo nga agbalbaliwto ti kasasaad, ngem saan a babaen iti panagregget ti tao. Saan a naan-anay a maawatan ti tao dagiti pasamak iti nakaparsuaan ken saanda a makontrol wenno mabalbaliwan dagita. Kastoy ti insurat ni Ari Solomon iti nagkauna nga Israel a nalatak gapu iti sirib ken laingna nga agpaliiw: “Ti sangatauan saanda a masarakan ti aramid a naaramid iti baba ti init; uray kasano kaadu ti panagtartrabaho a sipipinget ti sangatauan tapno agsapul, kaskasdi a saanda a masarakan. Ket uray no kunaenda nga umdasen ti siribda a mangammo, saandanto a masarakan dayta.”—Eclesiastes 8:17.

Asino ti makabael a mangkontrol kadagiti natural a didigra no saan a kabaelan ti tao? Kuna ti Biblia nga ipagteng ti Dios daytoy a panagbalbaliw. Isu ti nangaramid kadagiti sistema ti ekolohia iti daga, kas iti siklo ti danum. (Eclesiastes 1:7) Saan a kas iti tao, aglaplapusanan ti pannakabalin ti Dios. Pinatalgedan dayta ni mammadto Jeremias idi kinunana: “O Soberano nga Apo Jehova! Adtoy sika inaramidmo ti langlangit ken ti daga babaen ti dakkel a pannakabalinmo ken babaen ti siuunnat a takiagmo. Ti intero a banag saan a nakaskasdaaw unay kenka.” (Jeremias 32:17) Tangay inaramid ti Dios ti daga ken ti amin nga elemento, siempre ammona a kontrolen dagiti bambanag ditoy daga tapno sitatalna ken sitatalged a makapagnaed dagiti tattao.—Salmo 37:11; 115:16.

Kasano ngarud nga aramiden ti Dios dayta a panagbalbaliw? Ibaga ti maikadua nga artikulo a ti adu a nakabutbuteng a paspasamak ita buklenda ti “pagilasinan” iti “panungpalan ti sistema ti bambanag.” Kinuna ni Jesus: “Inton makitayo a mapaspasamak dagitoy a banag, ammuenyo a ti pagarian ti Dios asidegen.” (Mateo 24:3; Lucas 21:31) Daytoy a Pagarian ti Dios wenno ti nailangitan a gobierno a binukel ti Dios mangipagtengto iti dadakkel a panagbalbaliw ditoy daga ket daytanto ti mangkontrol kadagiti natural nga elemento. Nupay kabaelan daytoy ti Dios, dinutokanna ti Anakna a mangibanag iti dayta. Isu ti tinukoy ni mammadto Daniel idi kinunana: “Kenkuana adda naited a panagturay ken dayaw ken pagarian, tapno dagiti  ili, nasional a bungbunggoy ken pagsasao agserbida koma amin kenkuana a mismo.”—Daniel 7:14.

Ti Anak ti Dios, ni Jesu-Kristo, ti naipaayan iti pannakabalin a mangipagteng iti amin a panagbalbaliw tapno agbalin a makaay-ayo a pagnaedan ti daga. Idi adda ni Jesus ditoy daga, 2000 a tawen ti napalabasen, impakitana a kabaelanna a kontrolen dagiti natural nga elemento. Naminsan, idi adda iti barangay a kaduana dagiti adalanna iti Baybay ti Galilea, “giddato a dimteng ti dakkel a nadawel nga allawig, ket dagiti dalluyon immabla-ablatda iti barangay, iti kasta ngannganin matinep ti barangay.” Nagdanag dagiti adalanna di la ket ta malmesda, isu a nagpakaasida ken Jesus. Ania ti inaramidna? “Binabalawna [laeng] ti angin ken kinunana iti baybay: ‘Agtalnaka! Agulimekka!’ Ket nagtalna ti angin, ket naglinak.” Nasdaaw dagiti adalanna ket insaludsodda: “Siasino a pudpudno daytoy, agsipud ta uray ti angin ken ti baybay agtulnogda kenkuana?”—Marcos 4:37-41.

Di nagbayag, nagsubli ni Jesus idiay langit ket naikkan iti dakdakkel a pannakabalin ken autoridad. Kas Ari ti Pagarian ti Dios, rebbengenna ken kabaelanna nga ipagteng ti amin a panagbalbaliw a kasapulan tapno maipaayan dagiti tattao iti natalna ken natalged a biag ditoy daga.

Ngem kas nakitatayon, gapuanan ti naagum a tattao ti adu a problema ken didigra. Anianto ti aramiden ti Pagarian kadagidiay naagum ken saan nga agbalbaliw? Kuna ti Biblia nga umayto ni Apo Jesus “manipud langit a kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay saan a makaammo iti Dios ken kadagidiay saan nga agtulnog iti naimbag a damag maipapan ken Apotayo a Jesus.” Wen, ‘dadaelennanto dagidiay mangdaddadael iti daga.’—2 Tesalonica 1:7, 8; Apocalipsis 11:18.

Kalpasanna, ni Jesu-Kristo, nga “Ari ti ar-ari,” naan-anayton a kontrolenna dagiti natural a puersa ditoy daga. (Apocalipsis 19:16) Siguraduenna a saanton nga agsagaba iti aniaman a kalamidad dagiti iturayan ti Pagarianna. Usarennanto ti pannakabalinna a mangkontrol iti bambanag iti tangatang tapno magunggonaan ti sangatauan iti nadumaduma a paniempo ken panawen. Matungpalton ti nabayagen nga inkari ni Jehova a Dios kadagiti adipenna: “Sigurado nga ipaaykonto met dagiti dumayasadas a tudoyo iti umiso a tiempoda, ket pudno nga ipaayto ti daga ti bungana, ket ti kayo iti tay-ak ipaaynanto ti bungana.” (Levitico 26:4) Saanton nga agamak dagiti tattao a mangbangon iti balay ta awanen ti kalamidad a mangdadael iti dayta: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.”—Isaias 65:21.

Ania ti Masapul nga Aramidem?

Awan duadua a kayatmo met ti agbiag iti lubong nga awanen dagiti didigra. Ania ngarud ti aramidem tapno addakanto sadiay? Saan nga agbiag iti awanan-didigra a lubong ‘dagidiay saan a makaammo iti Dios ken dagidiay saan nga agtulnog iti naimbag a damag.’ Gapuna, masapul nga adalem ti maipapan iti Dios, suportaram ti panangiturayna iti daga, ken agtulnogka iti naimbag a damag ti Pagarian nga impasdekna babaen iti Anakna. Kasta ti kalikaguman ti Dios kadatayo.

Ti panangadal a naimbag iti Biblia ti kasayaatan a pamay-an tapno maammuam dagitoy. Naglaon ti Biblia kadagiti instruksion tapno maikarika nga agbiag iti natalged a daga nga iturayan ti Pagarian. Agpatulongka kadagiti Saksi ni Jehova tapno maammuam ti isursuro ti Biblia. Sidadaanda a tumulong kenka. No agreggetka a mangam-ammo iti Dios ken agtulnogka iti naimbag a damag, sigurado a matungpalto kenka ti sasao ti Proverbio 1:33: “No maipapan iti daydiay umim-imdeng kaniak, agtaengto iti kinatalged ket saanto a masinga manipud alinggaget ti didigra.”

 

Ammuem ti Ad-adu Pay

Ania ti Naimbag a Damag?

Ammuem no ania ti damag manipud iti Dios, apay a nakapatpateg a maipakaammo dayta, ken no ania ti aramidentayo.

Ania ti Pagarian ti Dios?

Siasino ti Ari ti Pagarian ti Dios, ken anianto ti aramiden ti Pagarian?

Agkiddaw iti Panagadal iti Biblia

Libre nga adalem ti Biblia iti oras ken lugar a kombeniente kenka.