Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN AGOSTO 2011

 Ti Biblia Balbaliwanna ti Biag

Ti Biblia Balbaliwanna ti Biag

APAY a nagbalin a Saksi ti dati nga adu ti asawana ken gumurgura kadagiti Saksi ni Jehova? Ania ti nangtignay iti maysa a pastor ti Pentecostal Church a mangbalbaliw iti pammatina? Ania ti nakatulong iti maysa a babai a namaltrato idi ubing tapno maiwaksina ti panagrurodna iti bagina ket umadani ken Jehova? Apay a ti lalaki a paggugustona ti musika a heavy metal nagbalin a ministro? Basaem dagiti sumaganad a salaysay tapno maammuam dagiti sungbat.

“Nagbalinakon a Nasaysayaat nga Asawa.”—RIGOBERT HOUETO

  • PANNAKAYANAKNA: 1941

  • NAKAYANAKANNA: BENIN

  • PAKASARITAANNA: ADU IDI TI ASAWANA KEN KAGURANA DAGITI SAKSI NI JEHOVA

TI NAPALABASKO:

Agnanaedak iti dakkel a siudad ti Cotonou, idiay Benin. Dimmakkelak iti pamilia a Katoliko ngem saanak a kanayon a makimisa. Adu a Katoliko a kalugarak ti aduan iti asawa, ta legal idi ti poligamia. Naaddaanak idi agangay iti uppat nga asawa.

Impagarupko a pagsayaatan ti pagilianmi ti rebolusion a nangrugi idi dekada 1970. Naan-anay a sinuportarak ti rebolusion ket nakinaminak iti politika. Gapu ta neutral dagiti Saksi ni Jehova iti politika, kagura ida dagiti rebolusionario. Maysaak kadagiti nangidadanes kadakuada. Siguradok a saanen nga agsubli dagiti misionero a Saksi idi naparuarda iti pagilian idi 1976.

NO KASANO A BINALBALIWAN TI BIBLIA TI BIAGKO:

Nagpatingga ti rebolusion idi 1990. Nasdaawak ta di nagbayag, adda manen dagiti misionero a Saksi. Pinanunotko a nalabit adda kadakuada ti Dios. Addan baro a trabahok iti daydi a tiempo. Saksi ti maysa kadagiti kabbaro a katrabahuak, ket dagus nga inranudna kaniak ti pammatina. Impakitana kaniak dagiti bersikulo ti Biblia a mangiladladawan ken Jehova kas Dios ti ayat ken hustisia. (Deuteronomio 32:4; 1 Juan 4:8) Nagustuak dagita a kualidad. Kayatko a manayonan ti ammok maipapan ken Jehova, isu a nagpayadalak iti Biblia.

Di nagbayag, tumabtabunoakon kadagiti gimong dagiti Saksi ni Jehova. Nasdaawak iti naimpusuan nga ayat a nakitak—awan ti panangidumdumada iti puli wenno kasasaad ti panagbiag. Iti kanayon a pannakilangenko kadagiti Saksi, nabataden kaniak nga isuda dagiti pudno a pasurot ni Jesus.—Juan 13:35.

Inkeddengko a no kayatko ti agserbi ken Jehova, masapul nga agikkatak a Katoliko. Narigat dayta ta maamakak iti kunaen ti dadduma. Babaen iti tulong ni Jehova, naaddaanak  iti tured idi agangay ket nagikkatak iti simbaan.

Ngem adda pay nasken a balbaliwak. Naammuak iti panagadalko iti Biblia a ti Dios saanna nga anamongan ti poligamia. (Genesis 2:18-24; Mateo 19:4-6) Anamonganna laeng ti umuna a panagasawak. Isu a dayta ti inrehistrok ket insinak ti dadduma nga assawak ngem sinustentuak ti material a kasapulanda. Idi agangay, nagbalin a Saksi ni Jehova ti dua kadagiti sigud nga assawak.

NO KASANO A NAGUNGGONAANAK:

Nupay nagtalinaed a Katoliko ti asawak, raemenna ti desisionko nga agserbi ken Jehova. Napaliiwmi a nagbalinakon a nasaysayaat nga asawa.

Impagarupko idi a mapasayaatko ti lugarmi babaen iti politika, ngem awan ti nagmaayan ti panagreggetko. Ammok itan a ti Pagarian ti Dios ti kakaisuna a solusion dagiti problema ti sangatauan. (Mateo 6:9, 10) Agyamyamanak ken Jehova ta impakitana kaniak no kasano ti maaddaan iti pudpudno a naragsak a biag.

“Saan a Nalaka ti Agbalbaliw.”—ALEX LEMOS SILVA

  • PANNAKAYANAKNA: 1977

  • NAKAYANAKANNA: BRAZIL

  • PAKASARITAANNA: DATI A PASTOR TI PENTECOSTAL CHURCH

TI NAPALABASKO:

Dimmakkelak iti away ti Itu, idiay São Paulo. Nalatak ti lugarmi gapu iti krimen.

Imoral idi ti panagbiagko ken nakaro ti kinaranggasko. Aglaklakoak pay iti droga. Idi agangay, nabigbigko a mabalin a maibaludak wenno matayak gapu iti kasta a biag, isu nga insardengko dayta. Kalpasanna, nagbalinak a miembro ti Pentecostal Church, ket idi agangay nagbalinak a pastor.

Pagarupko nga ad-adda a matulongak dagiti tattao no agserbiak iti simbaan. Nagipatangatangak pay kadagiti narelihiosuan a programa iti radio isu a nagbalinak a nalatak iti lugarmi. Ngem in-inut a nabigbigko a saan a maseknan ti simbaan iti pagimbagan dagiti miembrona ken nangnangruna iti panangpadayaw iti Dios. Maseknan laeng dayta iti panagurnong iti kuarta, isu a nagikkatak.

NO KASANO A BINALBALIWAN TI BIBLIA TI BIAGKO:

Idi inrugik ti makipagadal iti Biblia kadagiti Saksi ni Jehova, dagus a nabigbigko a naidumada iti sabali a relihion. Dua a banag ti nagustuak. Umuna, saanda laeng nga ibagbaga ti maipapan iti panagayat iti Dios ken iti kaarruba, no di ket ipakpakitada pay dayta. Maikadua, saanda a makinamnamin iti politika ken iti gubat. (Isaias 2:4) Dagitoy a kinapudno ti nangkombinsir kaniak a nabirokakon ti pudno a relihion, ti nailet a dalan nga agturong iti biag nga agnanayon.—Mateo 7: 13, 14.

Nabigbigko nga adu ti balbaliwak tapno maay-ayok ti Dios. Masapul nga ad-adda nga asikasuek ti pamiliak. Masapul met nga agbalinak a napakumbaba. Narigat ti agbalbaliw, ngem nagballigiak iti tulong ni Jehova.   Immun-una ni baketko a nagadal iti Biblia, ngem sa laeng pimmartak ti irarang-ayna idi nakitana ti panagbalbaliwko. Idi agangay, nabigbigmi a kayatmi ti agbalin a Saksi ni Jehova, ket naggiddankami a nagpabautisar.

NO KASANO A NAGUNGGONAANAK:

Maragsakankami nga agassawa a tumulong iti tallo nga annakmi tapno maaddaanda iti nasinged a relasion ken Jehova. Naragsak ti pamiliami. Agyamanak ken Jehova ta inturongnak iti kinapudno a linaon ti Saona, ti Biblia. Talaga a ti Biblia mabalbaliwanna ti biag dagiti tattao! Ket maysaak kadagita.

“Mariknakon a Nadalusak ken Naan-anay a Naragsak.”—VICTORIA TONG

  • PANNAKAYANAKNA: 1957

  • NAKAYANAKANNA: AUSTRALIA

  • PAKASARITAANNA: NAMALTRATO IDI UBING

TI NAPALABASKO:

Dimmakkelak idiay Newcastle, New South Wales. Siak ti inauna iti pito nga annak. Nauyong ken mammartek ni tatangko. Malmaltratuen ken pagsasawannak met ni Nanang. Kanayon nga ibugkawna a dakesak ken matutuokakto idiay impierno. Napabutnganak kadagita nga ibagbagana.

Masansan nga aglanganak idiay eskuelaan gapu iti panangkabkabil kaniak ni Nanang. Idi agtawenak iti 11, innaladak ti gobierno iti poder dagiti nagannakko sa impandak idi agangay iti maysa a kombento. Naglibasak iti kombento idi agtawenak iti 14. Diakon kayat ti agsubli idiay balaymi, isu a nagbalinak a walang iti kalkalsada ti Kings Cross idiay Sydney.

Nagusarak iti droga, nagin-inumak iti arak, nagbuybuyaak iti pornograpia, ken nagbalinak a prostitute. Napabutnganak iti maysa a rabii idi adda dua a lallaki a nakipagkita iti makinkukua iti nightclub a pagnanaedak. Imbaonnak iti kuarto, ngem mangngegko ti pagsasaritaanda. Makitultulag ti makinkukua iti club tapno ilakonak kadagitoy a lallaki. Ilemmengdak kano iti barko a mapan idiay Japan tapno agtrabahoak iti bar. Nagdanagak ket timpuakak iti balkon, sa timmarayak a nagpaarayat.

Nasabatko ti maysa a lalaki a bumisbisita idiay Sydney ket inlawlawagko kenkuana ti kasasaadko. Namnamaek nga ikkannak iti kuarta, ngem inawisnak ketdi iti pagnanaedanna tapno agdigus ken manganak, ket sadiay metten ti nagbalin a pagtaengak. Nagasawakami kalpasan ti makatawen.

NO KASANO A BINALBALIWAN TI BIBLIA TI BIAGKO:

Idi nangrugiak a makipagadal iti Biblia kadagiti Saksi ni Jehova, agduduma ti riknak. Naimula idi iti panunotko a parparigatennatayo ti Dios, isu a marurodak idi naammuak a ni gayam Satanas ti makagapu iti kinadakes. Nabayag met a pagbutbutngak ti sursuro a dusdusaen ti Dios dagiti tattao idiay impierno, ngem nabang-aranak idi naammuak a saan nga agpayso dayta.

 Magustuak dagiti Saksi ta ibatayda iti Biblia dagiti desisionda iti biag. Agbibiagda sigun iti pammatida. Narigatak a kalanglangen, ngem aniaman ti sawen ken aramidek, naayat ken raemendak latta dagiti Saksi.

Imbilangko nga awan serserbik ket dayta ti karirigatan nga inwaksik iti panunotko. Nagtultuloy a kasta ti riknak uray idi nabautisaranakon a Saksi. Ay-ayatek ni Jehova ngem kombinsidoak a dina ayaten ti tao a kas kaniak.

Nagbalbaliw laeng ti riknak 15 a tawen kalpasan a nabautisaranak. Iti maysa a palawag iti Kingdom Hall dagiti Saksi ni Jehova, binasa ti ispiker ti Santiago 1:23, 24. Inyarigna ti Sao ti Dios iti sarming a pakakitaantayo iti bagitayo sigun iti panangmatmat ni Jehova. Isu a naisaludsodko iti bagik, ‘Naiduma ngata ti panangmatmat ni Jehova no idilig iti panangmatmatko iti bagik?’ Idi damo, narigatko latta a patien a mabalin nga ayatennak ni Jehova.

Sumagmamano nga aldaw kalpasanna, nabasak ti Isaias 1:18, ket dayta a teksto ti nangbalbaliw iti biagko. Kastoy ti mabasa: “Umaykayo, ita, ket ilintegtayo koma ti bambanag iti nagbabaetantayo. . . . Uray no ti basbasolyo kasla koma eskarlata, mapapudawdanto a kasla niebe.” Mariknak a kasla kasasaonak ni Jehova, a kunkunana: “Umayka, Vicky, ilintegta koma ti bambanag iti nagbaetanta. Am-ammoka, ammok dagiti basolmo, ammok ti naguneg ita pusom—ken ipatpategka.”

Diak nakaturog iti dayta a rabii. Saanak pay a kombinsido a maayatnak ni Jehova, ngem pinampanunotko ti daton a subbot ni Jesus. Kellaat a naamirisko a nabayagen nga an-anusannak ni Jehova, ta impakitana nga ay-ayatennak iti adu a pamay-an. Kaskasdi, kasla ibagbagak kenkuana: “Saan a makadanon kaniak ti panagayatmo. Saan nga umdas ti daton ti Anakmo a mangabbong kadagiti basolko.” Arigna isubsublik ken Jehova ti subbot. Ngem mariknak itan nga ay-ayatennak ni Jehova gapu iti panangut-utobko iti sagut a subbot.

NO KASANO A NAGUNGGONAANAK:

Mariknakon a nadalusak ket naan-anay a naragsakak. Simmayaat ti biagmi nga agassawa, ken maragsakanak a mangiburay iti kapadasak tapno matulongak ti sabsabali. Mariknak a nasingsingedak itan ken Jehova.

“Daytoy ti Sungbat ti Kararagko.”—SERGEY BOTANKIN

  • PANNAKAYANAKNA: 1974

  • NAKAYANAKANNA: RUSSIA

  • PAKASARITAANNA: PAGGUGUSTONA IDI TI MUSIKA A HEAVY METAL

TI NAPALABASKO:

Nayanakak idiay Votkinsk, a sadiay met a nayanak ti nalatak a composer a ni Pyotr Ilich Tchaikovsky. Napanglaw ti pamiliami. Adu ti nasayaat a kababalin ni Tatang, ngem gapu ta mammartek, kanayon a makapadanag iti uneg ti pagtaenganmi.

Saanak a nalaing nga estudiante, ket nagbalin a nababa ti panangmatmatko iti bagik idi agangay. Diak kalanglangen ti sabsabali ken  nagbalinak a managsuspetsa. Masikoranak nga ageskuela. Kas pagarigan, no adda report nga iparangko iti sango ti klase, masansan a diak mayebkas ti kayatko nga ibaga. Idi nalpaskon ti maikawalo a grado, kastoy ti naisurat iti kardko: “Limitado ti bokabulariona, saanna a mayebkas ti kapanunotanna.” Naupayak kadagita a sasao ket kimmaro ti pannakariknak nga awan serserbik. Gapuna, nagduaduaak no adda met laeng panggep ti biagko.

Inrugik ti aginum iti arak bayat ti kinaagtutubok. Mayat ti riknak no makainumak, ngem makonsiensiaak no mabartekak. Kasla awan serserbi ti biagko. Kimmaro ti depresionko, a no dadduma adu nga aldaw nga agpupokak iti balaymi. Nagbanaganna, pinanunotkon ti agpakamatay.

Idi agtawenakon iti 20, nakabirokak iti baro ngem temporario a pakabang-arak, ti musika a heavy metal. Sumarantaak no dengdenggek dayta a musika ket binirokko dagiti padak nga aggusto iti dayta. Pinaatiddogko ti buokko, tinebbengak dagiti lapayagko, ket nagkawesak a kas kadagiti miembro ti banda a heavy metal. In-inut a nagbalinak a barumbado, ket masansan metten a karirik ti pamiliak.

Impagarupko a rumagsakak iti panagdengngegko iti musika a heavy metal, ngem baliktad ti napasamak. Nagbalinakon a naiduma a tao! Naupayak idi naammuak ti dakes a pakasaritaan dagiti banda a magusgustuak.

Nagbanaganna, pinanunotko a paypaysuekon ti agpakamatay ngem napanunotko ti mabalin a mapasamak ken nanangko no aramidek dayta. Dungdungnguennak unay, ket adu ti naimbag a naaramidanna kaniak. Maburiboranak ket kayatkon ti agpakamatay, ngem diak met maaramid dayta.

Namrayak ti agbasa iti napipintas a nobela a Ruso. Ti maysa nga estoria ket maipapan iti bida a nagserbi iti maysa a simbaan. Kellaat a nariknak a kayatko ti agserbi iti Dios ken iti tattao. Naimpusuan a nagkararagak iti Dios, nga idi laeng nga inaramidko. Kiniddawko iti Dios nga ipakitana kaniak ti aramidek tapno maaddaanak iti makagunggona a biag. Nasdaawak ta nabang-aranak iti dayta a panagkararagko. Ngem ad-adda pay a nakaskasdaaw ti simmaruno a napasamak. Dua nga oras kalpasanna, maysa a Saksi ni Jehova ti nagtuktok iti ridawko ket sinaludsodna no kayatko ti agpayadal iti Biblia. Patiek a daytoy ti sungbat ti kararagko. Daytan ti umuna nga aldaw ti baro ken naragsak a biagko.

NO KASANO A BINALBALIWAN TI BIBLIA TI BIAGKO:

Nupay nakarigrigat para kaniak, imbellengko ti amin nga alikamenko a mainaig iti musika a heavy metal. Ngem narigatanak a mangiwaksi iti dayta a musika iti isipko. Iti sadinoman a pakangngegak iti kasta a musika, dagus a maipalagip kaniak ti napalabasko. Diak kayat a mailaok dagita a di makaay-ayo a lagip iti amin a naimbag a mayuk-ukuok iti isip ken pusok, isu a liniklikak dagita a lugar. Sipapasnek nga agkararagak no malagipko ti napalabasko. Nakatulong dayta tapno maaddaanak iti “talna ti Dios a mangringbaw iti isuamin a panunot.”—Filipos 4:7.

Iti panagadalko iti Biblia, naammuak nga obligasion dagiti Kristiano nga iranud ti pammatida. (Mateo 28:19, 20) Siguradok a diak pulos kabaelan nga aramiden dayta. Ngem naaddaanak iti dakkel a ragsak ken talna gapu kadagiti baro a banag a maad-adalko. Ammok a masapul a maammuan ti sabsabali dagitoy a kinapudno. Nupay bumdengak, inrugik nga iranud ti bambanag a maad-adalko. Nasdaawak ta timmibker ti panagtalekko iti bagik gapu iti panangiranudko iti kinapudno a linaon ti Biblia ken bimmileg pay ti pammatik.

NO KASANO A NAGUNGGONAANAK:

Addaanakon iti asawa ken naragsakak a tumultulong iti adu a tattao a mangadal iti Biblia, agraman ti adingko ken ti nanangko. Nasarakak ti pudpudno a panggep ti biag iti panagserbik iti Dios ken iti panangtulongko iti sabsabali.