Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN HULIO 2011

 Umadanika iti Dios

Adda Kadi Rikna ni Jehova a Dios?

Adda Kadi Rikna ni Jehova a Dios?

NO WEN ti sungbatmo, ania ngata ti epekto kenkuana ti kababalintayo? Maragsakan wenno maladingitan ngata ti Dios gapu iti ar-aramidtayo? Saan, kuna ti sumagmamano a nagkauna a pilosopo. Kinunada nga awan ti asinoman a makaapektar iti Dios ken awan met ti riknana. Maisupadi iti dayta, kunaen ti Biblia a nadungngo ken maseknan unay ni Jehova iti aramidentayo. Usigem ti sasao a nailanad iti Salmo 78:40, 41.

Salaysayen ti Salmo 78 ti pannakilangen ti Dios iti nagkauna nga Israel. Kalpasan nga inispal ni Jehova dagiti Israelita manipud Egipto, intukonna kadakuada ti maysa a naisangsangayan a relasion. Inkarina a no agtultuloyda a natulnog kadagiti lintegna, agbalindanto a ‘naisangsangayan a sanikuana’ ken aramatenna ida iti nagpaiduma a pamay-an tapno matungpal ti panggepna. Immanamong dagiti Israelita iti dayta a Linteg ti tulag. Tinungpalda kadi ti tulagan?—Exodo 19:3-8.

Awanen ti napatpateg pay a maipaaytayo ken Jehova no di ti panagbiagtayo a makaparagsak Kenkuana

Kinuna ti salmista: “Namin-adu nga agrebeldeda kenkuana iti let-ang!” (Bersikulo 40) Kuna pay ti sumaganad a bersikulo: “Maulit-ulit a subokenda ti Dios.” (Bersikulo 41) Iladladawan ti salmista ti maulit-ulit a panagrebeldeda iti Dios. Nagminar daytoy a kaawan panagraemda idi addada idiay let-ang kalpasan la unay a naispalda manipud Egipto. Inrugida ti agtanabutob iti Dios, a nagduaduaanda no kabaelanna wenno kayatna nga aywanan ida. (Numeros 14:1-4) Sigun iti maysa a reperensia dagiti agipatpatarus ti Biblia, ti sasao nga “agrebeldeda kenkuana” mabalin nga “ipatarus kas ‘pinatangkenda ti pusoda maibusor iti Dios’ wenno ‘“Saan” kinunada iti Dios.’” Kaskasdi, gapu iti asina, pakawanen ni Jehova ti ilina tunggal agbabawida. Nupay kasta, sinublianda dagiti dakes nga aramidda ken nagrebeldeda manen, ket maulit-ulit a kasta ti napasamak.—Salmo 78:10-19, 38.

Ania ti narikna ni Jehova tunggal agrebeldeda kenkuana ti ilina nga agbaliwbaliw ti panunotda? “Sinaktanda ti riknana,” kuna ti bersikulo 40. Kuna ti sabali a patarus nga “inikkanda ti pagladingitanna.” Ilawlawag ti maysa a Biblikal a reperensia: “Daytoy kaipapananna a nasaktan [ti Dios] gapu iti kababalin dagiti Hebreo,—kas iti kababalin ti nasukir ken rebelioso nga anak.” No kasano a masaktan dagiti nagannak iti kababalin ti nasubeg nga anakda, dagiti rebelioso nga Israelita “pinasakitanda uray Daydiay Santo ti Israel.”—Bersikulo 41.

Ania ti maadaltayo iti daytoy a salmo? Makapabileg a maammuan a dungdunguen ni Jehova dagiti adipenna ken saan a nalaka a mauma kadakuada. Ngem laglagipentayo nga adda rikna ni Jehova ken maapektaran met iti kababalintayo. Gapuna, ania ngarud ti aramidentayo?

Imbes nga agtultuloy nga agbasol ken pagladingitentayo ni Jehova, aramidentay koma ti naimbag tapno maragsakan. Talaga a dayta ti kidkiddawenna kadagiti agdaydayaw kenkuana: “Agmasiribka, anakko, ket pagrag-oem ti pusok.” (Proverbio 27:11) Awanen ti napatpateg pay a maipaaytayo ken Jehova no di ti panagbiagtayo a makaparagsak Kenkuana.

Singasing a basaen iti Biblia iti Hulio: