Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN HUNIO 2011

 Isuroyo Dagiti Annakyo

Nariknam Kadi a Maipupueraka?

Nariknam Kadi a Maipupueraka?

MAIPUPUERA ti maysa no di maakseptar iti maysa a grupo. Mabalin a sabali ti pulina wenno kolor ti kudilna wenno naiduma ti panagsasao wenno panangaramidna iti bambanag. Napadasam kadin ti naipuera? *

Pagsaritaanta ti maysa a lalaki a kasta idi ti nariknana. Mefiboset ti naganna. Ammuenta no siasino ken apay a nariknana a kasla maipupuera. No mariknam ti kasta, adu ti masursurom ken Mefiboset.

Ni Mefiboset ket anak ni Jonatan, ti patpatgen a gayyem ni David. Sakbay a natay ni Jonatan iti pannakigubatna, kinunana ken David: ‘Kaasiam koma dagiti annakko.’ Nagbalin nga ari ni David. Sumagmamano a tawen kalpasanna nalagipna ti kinuna ni Jonatan, ket ni Mefiboset laengen ti nabati nga anak ti gayyemna. Idi ubing pay, di inggagara a natnag ket sipud idin marigatanen a magna. Maawatam kadi no apay a mabalin a nariknana a kasla maipupuera?

Kayat a tulongan ni David ti anak ni Jonatan a ni Mefiboset, isu nga inyurnosna nga agnaed iti asideg ti balayna idiay Jerusalem. Adda pay pribilehio ni Mefiboset a makipangan iti lamisaan ni David. Naited kas adipen ni Mefiboset ti lalaki a ni Ziba agraman ti annak ken adipenna. Talaga a pinadayawan ni David ti anak ni Jonatan! Ammom kadi ti simmaganad a napasamak?

Timmaud dagiti problema iti pagtaengan ni David. Nagtraidor ngamin ni Absalom a maysa kadagiti annak ni David, ket inagawna ti trono.  Pimmanaw ni David a kaduana dagiti gagayyemna tapno ikanawana ti biagna. Kayat met ni Mefiboset ti sumurot ken David, ngem saan a nakasurot ta marigatan a magna. Ammo dagitoy a gagayyem ni David nga isu ti talaga nga ari.

Kalpasanna, imbaga ni Ziba ken David a nagbati ni Mefiboset ta kayatna a talaga ti agbalin nga ari. Namati ni David iti dayta a kinaulbod! Isu nga intedna ken Ziba ti amin a sanikua ni Mefiboset. Idi agangay, ni David ti nangabak iti gubat maibusor ken Absalom ket nagsubli idiay Jerusalem. Idi nangngegna ti salaysay ni Mefiboset, inkeddeng ni David a pagbingayan da Mefiboset ken Ziba ti intedna a sanikua. Ania ngata ti inaramid ni Mefiboset?

Saan a nagreklamo iti di nainkalintegan a desision ni David. Ammo ni Mefiboset a saanna koman a pagparikuten ti ari tapno maasikasona a naimbag ti annongenna. Isu nga imbagana a kukua laengen ni Ziba ti amin a sanikua. Napatpateg ken Mefiboset ti pannakaisubli ni David nga adipen ni Jehova kas ari idiay Jerusalem.

Adu a rigat ti napasaran ni Mefiboset. Adda dagiti gundaway a nariknana a kasla maipupuera. Ngem inay-ayat ken inaywanan ni Jehova. Ania ti maadaltayo?— Mabalin a padpadaksendatayo ti dadduma a tattao uray no umiso ti ar-aramidentayo. Kinuna ni Jesus: “No guraennakayo ti lubong, ammoyo a ginuranak dayta sakbay a ginuranakayo.” Pinapatayda pay ketdi ni Jesus! Masiguradotayo a no umiso ti aramidentayo, ayatennatayo ti pudno a Dios a ni Jehova ken ti Anakna a ni Jesus.

^ par. 3 No adda ubing a kaduayo nga agbasa, ti uged ket pammalagip nga agsardengkayo biit ket paregtaenyo nga iyebkasna ti kapanunotanna.