Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2011

Jesus—Sadino ti Naggapuanna

Jesus—Sadino ti Naggapuanna

“Simrek manen [ni Pilato] iti palasio ti gobernador ket kinunana ken Jesus: ‘Sadino ti naggapuam?’ Ngem awan insungbat kenkuana ni Jesus.”—JUAN 19:9.

DAYTA ti insaludsod ti Romano a gobernador a ni Poncio Pilato idi maus-usig ti kaso ni Jesus. * Ammo ni Pilato no ania a paset ti Israel ti naggapuan ni Jesus. (Lucas 23:6, 7) Ammona met a saan nga ordinario a tao ni Jesus. Damdamagen kadi ni Pilato no nagbiag idin ni Jesus? Madadaan kadi daytoy a pagano nga agturay a mangawat iti kinapudno ken agbiag a mayannurot iti dayta? Saan a simmungbat ni Jesus, ket idi agangay, naibatad a mas interesado ni Pilato iti bukodna a saad ngem iti kinapudno ken kinahustisia.—Mateo 27:11-26.

Nalakam a maammuan ti nagtaudan ni Jesu-Kristo ta ibaga dayta ti Biblia. Usigem dagiti sumaganad a punto.

Nakayanakanna

Ipakita ti moderno a kalkulasion a naipasngay ni Jesus iti purok ti Betlehem idiay Judea iti nasapa a paset ti otonio ti tawen a maaw-awagan ita a 2 K.K.P. Gapu iti bilin ni Cesar Augusto a panagparehistro, ni Jose ken ti “agdadagsen” idi a ni Maria nga ina ni Jesus napanda idiay Betlehem, nga ayan ti kapuonan ni Jose. Gapu ta napusek iti tattao ti purok, awan ti pagdagusanda ket kapilitan a nagdagus dagiti agassawa iti apon dagiti animal, ket sadiay a nayanak ni Jesus ken naipaidda iti maysa a kulluong.—Lucas 2:1-7.

Adu a siglo sakbayna, impadto ti Biblia ti pakayanakan ni Jesus: “Sika, O Betlehem Efrata, daydiay nakabasbassit tapno mairaman kadagiti rinibu ti Juda, manipud kenka rummuarto nga umay kaniak daydiay agbalin nga agturay iti Israel.” * (Mikias 5:2) Bassit unay ti Betlehem isu a saan a naibilang a maysa kadagiti siudad iti teritoria ti Juda. Ngem maaddaan ti Betlehem iti naisangsangayan a dayaw ta agtaud sadiay ti naikari a Mesias, wenno Kristo.—Mateo 2:3-6; Juan 7:40-42.

Dimmakkelanna

Kalpasan ti apagbiit a panagyanda idiay Egipto, immakar ti pamilia ni Jesus idiay Nazaret, maysa a siudad iti probinsia ti Galilea nga agarup 100 a kilometro iti amianan ti Jerusalem. Awan pay idi ti tallo a tawen ni Jesus. Dakkel ti pamilia ni Jesus, ket nalabit simple ti panagbiagda iti daytoy napintas a rehion nga ayan dagiti mannalon, pastor, ken mangngalap.—Mateo 13:55, 56.

Sinigsiglo sakbay dayta, impadto ti Biblia nga agbalinto a “Nazareno” ti Mesias. Kinuna ni Mateo a mannurat ti Ebanghelio a nagnaed ti pamilia ni Jesus idiay “Nazaret, tapno matungpal ti naisao babaen kadagiti mammadto: ‘Isu  maawaganto iti Nazareno.’” (Mateo 2:19-23) Agparang a ti nagan a Nazareno ket nainaig iti Hebreo a sao para iti “tarubong.” Nalawag a tuktukoyen ni Mateo ti padto ni Isaias a nangawag iti Mesias kas “maysa a tarubong” manipud ken Jesse. Kaipapanan dayta a ti Mesias ket kaputotan ni Jesse, ti ama ni Ari David. (Isaias 11:1) Kinapudnona, ni Jesus ket kaputotan ni Jesse babaen ken David.—Mateo 1:6, 16; Lucas 3:23, 31, 32.

Orihinal a nagtaudanna

Isursuro ti Biblia a nabayagen a sibibiag ni Jesus sakbay a naipasngay iti maysa a kuadra idiay Betlehem. Ituloy a kunaen ti padto ni Mikias a naadaw itay a ti “namunganayan [ni Jesus] ket manipud kadagiti immuna a tiempo, manipud kadagiti aldaw ti tiempo a di nakedngan.” (Mikias 5:2) Kas inauna nga Anak ti Dios, maysa ni Jesus nga espiritu a parsua idiay langit sakbay a nayanak kas tao ditoy daga. Kinuna a mismo ni Jesus: “Bimmabaak manipud langit.” (Juan 6:38; 8:23) Kasano a napasamak daytoy?

Babaen iti nasantuan nga espiritu, simimilagro nga inyakar ni Jehova a Dios * ti biag ti nailangitan nga Anakna iti aanakan wenno matris ti Judio a birhen a ni Maria tapno mayanak kas perpekto a tao. Simple laeng dayta a milagro iti Mannakabalin-amin a Dios. Kas inlawlawag ti anghel ken Maria, “awan ti saan a kabaelan ti Dios nga aramiden.”—Lucas 1:30-35, 37, Ti Baro a Naimbag a Damag Biblia.

Saan laeng a ti naggapuan ni Jesus ti ibaga kadatayo ti Biblia. Adu pay ti dakamaten dagiti mannurat ti Ebanghelio a da Mateo, Marcos, Lucas, ken Juan maipapan iti nakaipamaysaan ti biagna.

^ par. 3 Para iti ad-adu pay nga impormasion maipapan iti pannakaaresto ken pannakausig ni Jesus, kitaem ti artikulo a “Ti Kaso a Kadaksan Pay Laeng ti Pannakatamingna,” iti panid 18-22 daytoy a magasin.

^ par. 6 Nabatad a ti Efrata (wenno Efrat) ket sigud a nagan ti Betlehem.—Genesis 35:19.

^ par. 10 Jehova ti nagan ti Dios sigun iti Biblia. Kunaen ti footnote ti Exodo 3:14 (Ti Baro a Naimbag a Damag Biblia): “Umasping ti pannakaibalikas ti ‘Siak’ iti nagan a Yahweh (wenno Jehova) iti Hebreo.”