Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2011

Jesus—Apay a Natay?

Jesus—Apay a Natay?

 Jesus—Apay a Natay?

“Ti Anak ti tao immay . . . tapno itedna ti kararuana [wenno, biagna] kas subbot a kasukat dagiti adu.”—MARCOS 10:45.

AMMO ni Jesus ti mapasamak kenkuana—a saanto a kanayon a natalna ti panagbiagna. Iti sabali a bangir, ammona nga agpatingga ti biagna inton nasurok a 30 ti tawenna, ngem sisasagana a mangsango iti dayta.

Nakapatpateg ti ipapatay ni Jesus iti salaysay ti Biblia. Kuna ti maysa a reperensia a ti ipapatay ni Jesus ket direkta a nadakamat iti agarup 175 a daras iti Kristiano a Griego a Kasuratan, wenno Baro a Tulag. Ngem apay a masapul nga agsagaba ken matay ni Jesus? Napateg a maammuantayo ti rason ta adda dakkel nga epekto kadatayo ti ipapatay ni Jesus.

Ti ekspektaren ni Jesus Bayat ti maudi a tawen ti panagbiagna, namin-adu nga impakauna ni Jesus kadagiti adalanna nga isu ket agsagaba ken matayto. Iti dalan nga agpa-Jerusalem tapno rambakanna ti Paskua iti maudi a gundaway, imbagana kadagiti 12 nga apostolna: “Ti Anak ti tao mayawatto iti panguluen a papadi ken kadagiti eskriba, ket kondenarendanto a matay ket iyawatdanto kadagiti tattao iti nasnasion, ket pagang-angawandanto ken tupraandanto ken saplitenda ken papatayenda.” * (Marcos 10:33, 34) Apay a masiguradona a mapasamak dayta kenkuana?

Ammo ni Jesus ti adu a padto iti Hebreo a Kasuratan a nangipakauna no kasano nga agpatingga ti biagna. (Lucas 18:31-33) Usigem ti sumagmamano a padto agraman dagiti teksto ti Biblia a mangilawlawag no kasano a natungpal dagita.

Ti Mesias ket . . .

▪ Maliputan babaen ti 30 a kapisi ti pirak.—ZACARIAS 11:12; MATEO 26:14-16.

▪ Makabkabil ken matuptupraan.—ISAIAS 50:6; MATEO 26:67; 27:26, 30.

▪ Mailansa.—SALMO 22:16, Ti Biblia; MARCOS 15:24, 25.

▪ Marabrabngis bayat a nakabitin iti kayo.—SALMO 22:7, 8; MATEO 27:39-43.

▪ Mapapatay nga awan tulangna a matukkol.—SALMO 34:20; JUAN 19:33, 36.

Natungpal dagitoy ken Jesus agraman ti adu pay a padto. Saanna la ketdi a naaramidan daytoy no awan ti tulong ti Dios. Ti pannakatungpal ken Jesus amin dagitoy a padto ti mangpaneknek a pudno nga imbaon ti Dios. *

Ngem apay a kasapulan nga agsagaba ken matay ni Jesus?

Natay ni Jesus tapno marisut dagiti napateg nga isyu Ammo ni Jesus dagiti isyu a mangapektar iti intero nga uniberso a naibangon idiay hardin ti Eden. Pinili da Adan ken Eva ti agsukir iti Dios gapu iti impluensia ti maysa a rebelde nga espiritu a parsua. Gapuna, nakuestionaran ti kinalinteg ti panangituray wenno soberania ni Jehova ken napagduaduaan ti panagmatalek ti tao iti Dios no maipasango iti pannubok.—Genesis 3:1-6; Job 2:1-5.

Ni Jesus ti nakaipaay iti naan-anay a sungbat kadagita nga isyu—ti soberania ni Jehova ken ti  kinatarnaw ti tao. Babaen iti naan-anay a panagtulnogna “agingga iti ipapatay . . . iti kayo a pagtutuokan,” intandudo ni Jesus ti soberania ti Dios. (Filipos 2:8) Pinaneknekan met ni Jesus a kabaelan ti perpekto a tao ti agbalin a natarnaw ken Jehova uray kadagiti karirigatan a pannubok.

Natay ni Jesus tapno masubbot ti sangatauan Impakpakauna ni mammadto Isaias nga agsagaba ken matay ti naikari a Mesias tapno maabbongan dagiti basol ti tattao. (Isaias 53:5, 10) Nalawag nga ammo daytoy ni Jesus, ket situtulok nga ‘intedna ti kararuana kas subbot a kasukat dagiti adu.’ (Mateo 20:28) Ti sakripisio nga ipapatayna ti nangilukat iti gundaway tapno maaddaan dagiti imperpekto a tattao iti nasayaat a relasion ken Jehova ken tapno maispalda manipud basol ken ipapatay. Ti ipapatay ni Jesus impaayannatayo iti gundaway a mangpasubli iti napukaw da Adan ken Eva—ti panagbiag nga agnanayon kadagiti perpekto a kasasaad ditoy daga. *Apocalipsis 21:3, 4.

Ti mabalinmo nga aramiden Kadagiti nagsasaganad nga artikulo, inusigtayo ti kunaen ti Biblia maipapan ken Jesus—ti nagtaudanna, ti nakaipamaysaan ti biagna, ken no apay a natay. Ti pannakaammo kadagitoy a kinapudno saanna laeng a lawlawagan dagiti di umiso a pannakaawat maipapan ken Jesus. Ti panangannurot kadagita mangyeg pay kadagiti bendision—nasaysayaat a biag ita ken agnanayon a biag iti masanguanan. Ibaga kadatayo ti Biblia no ania ti masapul nga aramidentayo tapno apitentayo dagita a bendision.

▪ Ammuem ti ad-adu pay maipapan ken Jesu-Kristo ken ti akemna iti panggep ni Jehova.—JUAN 17:3.

▪ Mamatika ken Jesus, nga ipakitam iti wagas ti panagbiagmo nga awatem kas Manangisalakan.—JUAN 3:36; ARAMID 5:31.

Maragsakan dagiti Saksi ni Jehova a tumulong kenka a mangammo iti ad-adu pay maipapan ken Jesu-Kristo, ‘ti bugbugtong nga Anak’ ti Dios, a babaen kenkuana mabalin nga awatentayo ti sagut nga “agnanayon a biag.”—Juan 3:16.

[Dagiti Footnote]

^ par. 5 Masansan a tukoyen ni Jesus ti bagina kas “ti Anak ti tao.” (Mateo 8:20) Ipakita daytoy a sasao a talaga a nagbalin a tao ni Jesus ken isu met ti “anak ti tao” a tuktukoyen ti padto iti Biblia.—Daniel 7:13, 14.

^ par. 13 Para iti ad-adu pay nga impormasion maipapan kadagiti padto a natungpal ken Jesus, kitaem ti artikulo a “Ni Jesu-Kristo—Ti Naikari a Mesias” iti apendise ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 17 Para iti ad-adu nga impormasion maipapan iti pateg ti ipapatay ni Jesus, kitaem ti artikulo a “Ti Subbot—Kapatgan a Sagut ti Dios,” iti kapitulo 5 ti libro nga Ania a Talaga ti Isursuro ti Biblia?

 

Ammuem ti Ad-adu Pay

Siasino ni Jesu-Kristo?

Ammuem no apay a ni Jesus ti naikari a Mesias, naggapuanna, ken no apay a naawagan iti bugbugtong nga Anak ti Dios.