Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN ABRIL 2011

Asino a Talaga ni Jesu-Kristo?

Asino a Talaga ni Jesu-Kristo?

 Asino a Talaga ni Jesu-Kristo?

“Itan idi simrek idiay Jerusalem, ti intero a siudad nagkakaribuso, a kunkunada: ‘Asino daytoy?’ Imbagbaga dagiti bunggoy: ‘Daytoy ti mammadto a ni Jesus, manipud Nazaret ti Galilea!’” —MATEO 21:10, 11.

APAY nga adda kasta nga ariwawa idi simmangpet ni Jesu-Kristo * idiay Jerusalem iti maysa nga aldaw ti primavera idi 33 K.P.? Nagdinamagen iti siudad ti maipapan ken Jesus ken dagiti nakaskasdaaw nga inaramidna. Pagsasaritaanda ti maipapan kenkuana. (Juan 12:17-19) Nupay kasta, saan nga ammo ti bunggoy nga adda iti tengngada ti lalaki a mangimpluensia iti intero a lubong iti adu a siglo agingga iti kaaldawantayo!

Usigem ti sumagmamano a nabileg nga impluensia ni Jesus iti pakasaritaan ti tao.

▪ Ti kalendario a gagangay nga us-usaren ti kaaduan a tao iti intero a lubong ket naibatay iti tawen a maipagarup a pannakayanak ni Jesus.

▪ Agarup dua a bilion a tattao—mapattapatta a kakatlo ti populasion ti lubong—ti agkunkuna a Kristiano.

▪ Ti Islam, a nasurok a maysa a bilion ti miembrona iti intero a lubong, isursurona a ni Jesus ket “mammadto a dakdakkel ngem da Abraham, Noe, ken Moises.”

▪ Adu a nainsiriban a sasao ni Jesus ti inaldaw nga ar-aramaten dagiti tattao. Adtoy ti sumagmamano:

‘Ayatem ti kabusormo.’MATEO 5:44.

‘No tungpaenda ti makannawan a pingpingmo, iparangmo ti bangir.’MATEO 5:39.

Aramidem iti padam a tao ti kayatmo nga aramidenda kenka.’MATEO 7:12.

‘Naimbag a Samaritano.’LUCAS 10:33.

Talaga a nabileg ti impluensia ni Jesus. Nupay kasta, nadumaduma ti kapanunotan ken patpatien dagiti tattao maipapan kenkuana. Gapuna, mabalin a maisaludsodmo, ‘Asino a talaga ni Jesu-Kristo?’ Ti laeng Biblia ti makaibaga kadatayo no sadino ti naggapuan ni Jesus, no ania ti nakaipamaysaan ti biagna, ken no apay a natay. Ti panangammom kadagitoy a kinapudno ket adda dakkel nga epektona iti agdama a biagmo ken iti masanguanam.

[Footnote]

^ par. 3 Ti “Jesus,” a personal a nagan daytoy a mammadto a taga-Nazaret, kaipapananna “Ni Jehova ti Mangisalakan.” Ti sao a “Kristo” ket titulo a kaipapananna “Daydiay Napulotan,” a mangipamatmat a ni Jesus ket napulotan, wenno dinutokan ti Dios para iti naisangsangayan a saad.