Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Marso 2011

 Agsursuroka iti Sao ti Dios

Asino ni Jesu-Kristo?

Asino ni Jesu-Kristo?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Asino ni Jesu-Kristo?

Saan a kas iti siasinoman a tao, nagnaed ni Jesus idiay langit kas espiritu a persona sakbay a nayanak ditoy daga. (Juan 8:23) Isu ti kaunaan a pinarsua ti Dios, ken timmulong iti pannakaparsua ti amin a dadduma pay a bambanag. Isu ti kakaisuna a pinarsua ni Jehova, iti kasta naawagan iti “bugbugtong” nga Anak ti Dios. Nagserbi ni Jesus kas Pannakangiwat ti Dios, isu a naawagan met a “ti Sao.”—Juan 1:1-3, 14; basaem ti Proverbio 8:22, 23, 30; Colosas 1:15, 16.

2. Apay nga immay ni Jesus ditoy daga?

Ti Dios imbaonna ti Anakna ditoy daga babaen ti panangyallatiwna iti nailangitan a biagna iti aanakan ti birhen a Judio a ni Maria. Isu nga awan ti tao nga ama ni Jesus. (Lucas 1:30-35) Immay ni Jesus ditoy daga (1) tapno isurona ti kinapudno maipapan iti Dios, (2) tapno agbalin nga ulidan iti panagaramid iti pagayatan ti Dios, ken (3) tapno itedna ti perpekto a biagna kas “subbot.”—Basaem ti Mateo 20:28; Juan 18:37.

3. Apay a kasapulantayo ti subbot?

Ti subbot ket maysa a gatad a maibayad tapno maluk-atan ti maysa a tao. Saan a karaman ti ipapatay ken panaglakay iti orihinal a panggep ti Dios agpaay iti sangatauan. Kasanotayo nga ammo? Imbaga ti Dios a matay ti kaunaan a tao a ni Adan no aramidenna ti aw-awagan ti Biblia a “basol.” No saan a nagbasol ni Adan, saan koma a natay. Nupay sa la nagpatingga ti biag ni Adan kalpasan ti ginasgasut a tawen, nangrugin nga agturong iti ipapatay sipud idi nagsukir iti Dios. (Genesis 2:16, 17; 5:5) Impatawid ni Adan iti amin a kaputotanna ti basol ken ti supapakna, ti ipapatay. Ngarud, ti ipapatay “simrek” iti sangatauan babaen ken Adan. Dayta ti makagapu a kasapulantayo ti subbot.—Basaem ti Roma 5:12; 6:23.

 4. Apay a natay ni Jesus?

Asino ti makaipaay iti subbot a mangwayawaya kadatayo manipud iti ipapatay? Ti supapak ti bukodtayo a basol ket ipapatay. Yantangay imperpektotayo, saantay a maikaro ti basbasol ti asinoman.—Basaem ti Salmo 49:7-9.

Yantangay awan basol a natawid ni Jesus manipud iti natauan nga ama, natay saan a gapu iti bukodna a basbasol no di ket agpaay iti basbasol ti sabsabali. Imbaon ti Dios ti Anakna tapno matay para kadatayo kas ebkas ti naisangsangayan nga ayatna iti sangatauan. Impakita met ni Jesus ti ayatna kadatayo babaen ti panagtulnogna ken Amana ken panangtedna iti biagna gapu kadagiti basoltayo.—Basaem ti Juan 3:16; Roma 5:18, 19.

5. Ania itan ti ar-aramiden ni Jesus?

Idi pinaimbag ni Jesus dagiti masakit, pinagungarna dagiti natay, ken insalakanna dagiti tattao manipud iti basol ken ipapatay, impakitana no anianto ti aramidenna iti amin a natulnog a tattao. (Lucas 18:35-42; Juan 5:28, 29) Kalpasan ti ipapatay ni Jesus, isu ket pinagungar ti Dios kas espiritu a persona. (1 Pedro 3:18) Nagur-uray ni Jesus iti makannawan ti Dios agingga nga inted kenkuana ni Jehova ti pannakabalin nga agturay kas Ari iti intero a daga. (Hebreo 10:12, 13) Agturturayen ni Jesus kas Ari idiay langit, ket dagiti pasurotna ditoy daga ipakpakaammoda ti naimbag a damag iti intero a lubong.—Basaem ti Daniel 7:13, 14; Mateo 24:14.

Din agbayag, usarenton ni Jesus ti pannakabalinna kas Ari tapno ipatinggana ti amin a panagsagaba ken dagiti pakaigapuan dayta. Ti minilion a tattao a mamati ken agtulnog ken Jesus tagiragsakendanto ti agbiag iti paraiso a daga.—Basaem ti Salmo 37:9-11.

Ti minilion a tattao a mamati ken agtulnog ken Jesus tagiragsakendanto ti agbiag iti paraiso a daga

Ammuem ti Ad-adu Pay

ANIA A TALAGA TI ISURSURO TI BIBLIA?

Siasino ni Jesu-Kristo?

Ammuem no apay a ni Jesus ti naikari a Mesias, naggapuanna, ken no apay a naawagan iti bugbugtong nga Anak ti Dios.