Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Marso 2011

“Kailiwmonto”

“Kailiwmonto”

 Umadanika iti Dios

“Kailiwmonto”

NAKALKALDAANG a makita ti panagsagaba ken ipapatay ti maysa nga ay-ayaten. Gagangay laeng a maladingitantayo iti kasta a pasamak. Ngem makaliwliwa a maammuan a ti Namarsua, ni Jehova a Dios, maawatanna ti panagladingittayo. Maysa pay, tarigagayanna nga usaren ti awan inggana a pannakabalinna tapno pagungarenna dagiti natay. Usigem ti namnama a nayebkas iti sasao ni Job, a nailanad iti Job 14:13-15.

Ni Job ket maysa a lalaki a naisangsangayan ti pammatina. Ngem nagsagaba kadagiti nakaro a rigat—a pakairamanan ti pannakapukaw ti amin a sanikuana, ipapatay ti amin nga annakna, ken ti naut-ot nga an-annayenna. Gapu iti nakaro a ladingitna, inyararawna iti Dios: “O italimengnak koma iti Sheol [ti gagangay a tanem ti sangatauan]!” (Bersikulo 13) Patien ni Job a mabang-aran iti Sheol. Kas iti gameng nga intalimeng ti Dios, mapukaw sadiay ti marikriknana a rigat ken ut-ot. *

Agnanayonto kadi a maitalimeng ni Job iti Sheol? Saan a kasta ti ammo ni Job. Intuloyna a kinuna iti kararagna: “Itudingannak [koma] iti naikeddeng a tiempo ket lagipennak!” Mangnamnama ni Job a temporario laeng ti kaaddana iti Sheol ken saanto a lipaten ni Jehova. Impadis ni Job ti panawen a kaaddana iti Sheol iti ‘inkapilitan a panagtrabaho’—maysa nga inkapilitan a panagur-uray. Kasano kabayag? “Agingga a ti gin-awak dumteng,” kunana. (Bersikulo 14) Dayta a gin-awa kaipapananna ti pannakawayawaya manipud iti Sheol—kayatna a sawen, panagungar!

Apay a kombinsido ni Job a dumteng kenkuana ti gin-awa? Agsipud ta ammona ti rikna ti naayat a Namarsuatayo kadagidiay natay a matalek nga agdaydayaw Kenkuana. Kinuna ni Job: “Umawagkanto, ket siak sungbatankanto. Kailiwmonto ti aramid dagita imam.” (Bersikulo 15) Bigbigen ni Job nga isu ket inaramid ti Dios. Ti Gubuayan ti Biag a makinggapuanan iti pannakabukel ni Job iti aanakan sigurado a pagungarenna ni Job no matay.—Job 10:8, 9; 31:15.

Masursurotayo iti sasao ni Job ti kinadungngo ni Jehova: Naisangsangayan ti kinasingedna kadagidiay agtaltalek kenkuana a kas ken Job, nga ipalubosda a tubayenna ida tapno agbalinda a tattao a makaay-ayo unay iti imatangna. (Isaias 64:8) Ipatpateg ni Jehova dagiti matalek nga agdaydayaw kenkuana. ‘Kailiwna’ dagidiay natayen a nasungdo kenkuana. Ti Hebreo a sao a naipatarus a “kailiw” ket “nabatad a maysa kadagiti sasao a mangyebkas iti kasta unay a gagar,” kuna ti maysa nga eskolar. Wen, saan laeng a malagip ni Jehova dagiti agdaydayaw kenkuana no di ket kailiwna met a pagungaren ida.

Makaparagsak ta iti libro a Job—maysa kadagiti immuna a naisurat a paset ti Biblia—impalgak ni Jehova ti panggepna a mangpagungar kadagiti natay. * Kayatna a makikaduaka manen kadagiti pimmusayen nga ay-ayatem. Ket nalaklakam nga ibturan ti ipupusayda no panunotem dayta a pannakaseknan ni Jehova. Kayatmo kadi a maammuan ti ad-adu pay maipapan iti daytoy a naayat a Dios ken no kasano a palubosam a tubayennaka tapno maimatangamto ti pannakatungpal ti panggepna?

Singasing a basaen iti Biblia iti Marso:

Ester 1Job 15

[Dagiti Footnote]

^ par. 4 Sigun iti sumagmamano a reperensia, dagiti sasao ni Job nga “italimengnak” mabalin a kaipapananna ti “idulinnak a sitatalged kas maysa a napateg a gameng.”

^ par. 8 Tapno ad-adu pay ti maammuam maipapan iti kari ti Biblia a panagungar dagiti tattao iti maysa a nalinteg a baro a lubong, kitaem ti kapitulo 7 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.