Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2010

 Isuroyo Dagiti Annakyo

Ti Sekreto a Mabalinmo nga Ibaga iti Sabsabali

Ti Sekreto a Mabalinmo nga Ibaga iti Sabsabali

ADDA kadin sekreto a naibaga kenka?— * Adda sekreto a kayatko nga ibaga. Iti Biblia, naawagan dayta iti “sagrado a palimed a naidulin iti kinaulimek kadagiti nabayag a tiempo.” (Roma 16:25) Idi damo, ti Dios laeng ti makaammo iti “sagrado a palimed.” Kitaenta no kasano a sinigurado ti Dios a maammuan ti kaaduan daytoy a sekreto.

Sakbay ti amin, ammom kadi ti kaipapanan ti “sagrado”?— Kayatna a sawen ti nasantuan, nadalus, wenno espesial. Daytoy a sekreto ket naawagan iti sagrado a palimed gapu ta nagtaud iti nasantuan a Dios. Siasino dagiti ammom a mayat a mangammo iti daytoy nga espesial a sekreto?— Dagiti anghel. Kuna ti Biblia: “Dagitoy met laeng a banag ti tartarigagayan dagiti anghel a matmatan.” Wen, kayatda a matarusan daytoy a nasantuan a sekreto.—1 Pedro 1:12.

Idi immay ni Jesus ditoy daga, dinakamat ken inlawlawagna dayta a sagrado a palimed. Imbagana kadagiti adalanna: “Naited kadakayo ti sagrado a palimed ti pagarian ti Dios.” (Marcos 4:11) Naawatam kadi no ania dayta a sagrado a palimed?— Maipapan dayta iti Pagarian ti Dios nga insuro ni Jesus nga ikararagtayo.—Mateo 6:9, 10.

Ita, kitaenta no apay a nagbalin a sekreto ti Pagarian ti Dios “kadagiti nabayag a tiempo” agingga nga immay ni Jesus ditoy daga ken inlawlawagna dayta. Kalpasan a simmukir da Adan ken Eva iti linteg ti Dios ken naparuarda iti minuyongan ti Eden, naammuan dagiti adipen ti Dios a saan a nagbaliw ti panggepna a mamagbalin iti daga a paraiso. (Genesis 1:26-28; 2:8, 9; Isaias 45:18) Nagsuratda maipapan iti kinaragsak a sagrapento dagiti tattao ditoy daga iti sidong ti Pagarian ti Dios.—Salmo 37:11, 29; Isaias 11:6-9; 25:8; 33:24; 65:21-24.

Panunotem met no asino ti Agturay iti Pagarian ti Dios. Ammom kadi no asino ti pinili ti Dios nga Agturay?— Ti Anakna a “Prinsipe ti Kappia,” ni Jesu-Kristo. Kuna ti Biblia: “Ti naprinsipean a panagturay maiparabawto iti abagana.” (Isaias 9:6, 7) Masapul a maaddaanta iti “pannakaammo iti sagrado a palimed ti Dios, awan sabali, ni Kristo.” (Colosas 2:2) Napateg a maammuanta a ti biag ti immuna nga anghel (espiritu nga Anak) a pinarsua ti Dios ket inyakarna iti aanakan ni Maria. Dayta nga Anak a dati a mannakabalin nga anghel ket daydiay imbaon ti Dios ditoy daga kas sakripisio tapno maaddaantayo iti agnanayon a biag.—Mateo 20:28; Juan 3:16; 17:3.

Naammuanta a ni Jesus ti pinili ti Dios nga agbalin nga Agturay iti Pagarianna. Ngem adda pay nasken a maammuanta. Karaman iti dayta a sagrado a palimed ket addanto lallaki ken babbai a makikadua  iti napagungar a ni Jesus ken makipagturaydanto kenkuana idiay langit.—Efeso 1:8-12.

Ammuenta ngarud dagiti nagan ti sumagmamano a kaduanto ni Jesus nga agturay idiay langit. Imbaga ni Jesus kadagiti matalek nga apostolna a mapan sadiay tapno mangisagana iti lugar para kadakuada. (Juan 14:2, 3) No sukimatenta dagiti sumaganad a teksto, maammuam ti nagan ti sumagmamano a lallaki ken babbai a makipagturay ken Jesus iti Pagarian ni Amana.—Mateo 10:2-4; Marcos 15:39-41; Juan 19:25.

Nabayag a tiempo a saan a naipakaammo ti bilang dagiti kakadua ni Jesus nga agturay iti Pagarianna. Ngem ammotayo itan ti bilangda. Ammom kadi?— Kuna ti Biblia a 144,000 ti bilangda. Karaman met daytoy iti sagrado a palimed.—Apocalipsis 14:1, 4.

Mamatika kadi a daytoy a “sagrado a palimed ti pagarian ti Dios” ti kasayaatan pay laeng a sekreto a mabalin a maammuan ti maysa a tao?— No kasta, ikagumaam nga ammuen ti maipapan iti dayta tapno mailawlawagmo iti adu a tattao.

^ par. 3 No adda ubing a kaduam nga agbasa, ti uged ket pammalagip nga agsardengkayo biit ken paregtaem nga iyebkasna ti kapanunotanna.