Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2010

6 Makatulong Kadi?

6 Makatulong Kadi?

 Kararag

6 Makatulong Kadi?

ADDA kadi pagimbagan nga itden kadatayo ti panagkararag? Adda, yantangay ipakita ti Biblia a talaga a nagunggonaan dagiti matalek nga adipen ti Dios iti panagkararagda. (Lucas 22:40; Santiago 5:13) Kinapudnona, ti panagkararag ket makayeg iti adu a pagimbagan—iti man naespirituan, emosional, ken uray iti pisikal a salun-attayo. Kasano?

Ipapantayon nga adda anakmo a nakaawat iti regalo. Isurom kadi nga umdasen a mariknana ti panagyaman? Wenno isurom nga iyebkasna ti panagyamanna? No isawangtayo dagiti napateg a marikriknatayo, ad-adda a mayukuok dagita iti panunot ken pusotayo. Saan kadi nga agaplikar met dayta iti pannakisaotayo iti Dios? Sigurado a kasta! Usigem ti sumagmamano a pagarigan.

Panagkararag tapno agyaman. No iyebkastayo ti panagyaman iti Amatayo gapu kadagiti impaayna a nasayaat a bambanag, agbalintayo a sipapanunot kadagita a bendision. Pagangayanna, agbalintayo nga ad-adda a managyaman, naragragsak, ken positibo.—Filipos 4:6.

Pagarigan: Inyebkas ni Jesus ti panagyamanna gapu ta inimdengan ken sinungbatan ni Amana dagiti kararagna.—Juan 11:41.

Panagkararag tapno agkiddaw iti pammakawan. No agkiddawtayo iti pammakawan ti Dios, bumileg ti konsiensiatayo, ad-adda a mariknatayo ti panagbabawi, ken ad-adda a mabigbigtayo ti kinaserioso ti basoltayo. Mabang-aran met ti masidsidir a konsiensiatayo.

Pagarigan: Nagkararag ni David tapno iyebkasna ti panagbabawi ken ladingitna.—Salmo 51.

Panagkararag tapno agkiddaw iti pannakaiwanwan ken sirib. Ti panagkiddaw ken Jehova nga iwanwannatayo wenno ipaayannatayo iti sirib tapno makaaramidtayo kadagiti nasayaat a desision ket makatulong kadatayo nga agbalin a pudpudno a napakumbaba. Dayta ti mangipalagip kadagiti limitasiontayo ken makatulong a mangpabileg iti panagtalektayo iti nailangitan nga Amatayo.—Proverbio 3:5, 6.

Pagarigan: Sipapakumbaba a nagkiddaw ni Solomon iti pannakaiwanwan ken sirib iti panangiturayna iti Israel.—1 Ar-ari 3:5-12.

Panagkararag no adda pakariribukan. Mabang-aran ti pusotayo no ipeksatayo iti Dios ti pakariribukantayo, ket bumileg ti panagtalektayo ken Jehova imbes nga iti bagitayo.—Salmo 62:8.

Pagarigan: Nagkararag ni Ari Asa idi naipasango iti napeggad a kabusor.—2 Cronicas 14:11.

Panagkararag para iti pagimbagan ti sabsabali. Makatulong dagiti kasta a kararag tapno maliklikantayo ti agbalin nga agimbubukodan ken agbalintayo nga ad-adda a naasi ken mannakipagrikna.

Pagarigan: Inkararagan ni Jesus dagiti pasurotna.—Juan 17:9-17.

Panagkararag tapno agdayaw. No itan-oktayo ni Jehova gapu kadagiti nakaskasdaaw nga aramid ken galadna, dumakkel ti apresasion ken panagraemtayo kenkuana. Makatulong pay dagita a kararag tapno ad-adda a sumingedtayo iti Dios ken Amatayo.

Pagarigan: Sipapasnek ni David a nangidaydayaw iti Dios gapu kadagiti parsuana.—Salmo 8.

Ti sabali pay a bendision a nainaig iti kararag ket “ti talna ti Dios a mangringbaw iti isuamin a panunot.” (Filipos 4:7) Iti daytoy nariribuk a lubong, talaga a naisangsangayan a bendision ti maaddaan iti talna ti panunot. Pagimbagan pay dayta ti pisikal a bagitayo. (Proverbio 14:30) Ngem magun-odantayo kadi ti talna ti panunot babaen ti bukodtayo a panangikagumaan? Wenno adda kadi napatpateg pay a banag a nainaig?

[Blurb iti panid 10]

Ti panagkararag ket makayeg iti adu a pagimbagan—iti man pisikal, emosional, ken nangnangruna iti naespirituan