Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HULIO 2010

No Ania ti Ramanen ti Panangammo iti Nagan ti Dios

No Ania ti Ramanen ti Panangammo iti Nagan ti Dios

ADDA kadi naisangsangayan a kaipapanan ti naganmo? Iti dadduma a paset ti lubong, kadawyan a maikkan ti ubing iti nagan a napnuan kaipapanan. Mabalin nga iparangarang ti napili a nagan no ania ti patpatien ken prinsipio dagiti nagannak wenno dagiti namnama ken arapaapda para iti anakda.

Nabayagen a kaugalian ti mangted kadagiti nagan a napnuan kaipapanan. Idi tiempo ti Biblia, kadawyan ti mangted kadagiti personal a nagan gapu iti kaipapanan dagita. Dagiti nagan mabalin nga ipasimudaagda ti agbalinto nga akem ti maysa a tao. Kas pagarigan, idi imbaga ni Jehova ken David ti agbalinto nga akem ti anakna a ni Solomon, kinuna ti Dios: “Solomon [a kaipapananna “Talna”] ti agbalinto a naganna, ket ti talna ken kinaulimek itedkonto iti Israel iti kaaldawanna.”—1 Cronicas 22:9.

No dadduma, mangted ni Jehova iti baro a nagan iti maysa a tao a maaddaan iti baro nga akem. Ti lupes nga asawa ni Abraham ket nanaganan iti Sara, a kaipapananna “Prinsesa.” Apay? Inlawlawag ni Jehova: “Isu bendisionakto ken kasta met nga ipaayanka iti maysa nga anak a lalaki manipud kenkuana; ket isu bendisionakto ket agbalinto a nasnasion; ti ar-ari dagiti ili agtauddanto kenkuana.” (Genesis 17:16) Nabatad a nasken a maawatantayo ti baro nga akem ni Sara tapno maawatantayo no apay a naikkan iti baro a nagan.

Ti ngay nagan a Jehova, nga isu ti kapatgan iti amin a nagan? Ania ti kaipapananna? Idi nagsaludsod ni Moises maipapan iti nagan ti Dios, insungbat ni Jehova: “Agbalinakto no anianto ti pagbalinak.” (Exodo 3:14) Iti patarus a Rotherham, kastoy ti mabasa: “Agbalinakto nga aniaman a kayatko a pagbalinan.” Ipalgak ti nagan a Jehova nga adu ti akem ti Dios. Kas simple nga ilustrasion: Mabalin nga adu ti akem nga itungpal ti maysa nga ina iti panangaywanna kadagiti annakna—maysa a nars, paraluto, mannursuro—sigun iti kasapulan. Kasta met laeng ken Jehova, nupay iti natantan-ok a pamay-an. Tapno maibanagna ti naayat a panggepna para iti sangatauan, kabaelanna ti agbalin nga aniaman a kayatna, nga ibanagna ti aniaman nga akem a kasapulan. Ngarud, ti panangam-ammo a talaga ken Jehova ramanenna ti panangtarus ken panangapresiar iti adu nga akemna.

Ngem makapaladingit ta dagidiay di makaam-ammo iti Dios sigun iti kaipapanan ti naganna, dida met ammo ti kinasayaat ti personalidadna. Nupay kasta, no agadalka iti Biblia, maapresiarmo dagiti akem ni Jehova kas masirib a Mammagbaga, mannakabalin a Manangisalakan, naparabur a Manangipaay, ken adu pay. No kasta, talaga a makapainteres ti napnuan kaipapanan a nagan ti Dios a Jehova.

Kaskasdi, saan a kanayon a nalaka a maam-ammo ti Dios sigun iti kaipapanan ti naganna. Ilawlawag ti sumaganad nga artikulo no apay.