Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2010

 Isuroyo Dagiti Annakyo

Nasursuro ni Jesus ti Agtulnog

Nasursuro ni Jesus ti Agtulnog

ADDA kadi dagiti gundaway a marigatanka nga agtulnog?— * Saan a nakaskasdaaw dayta ta kastatay amin no dadduma. Ammom kadi nga uray ni Jesus kasapulanna met a sursuruen ti agtulnog?—

Ammom kadi no siasino ti rumbeng a pagtulnogan ti amin nga agtutubo?— Wen, ti tatang ken nanangtayo. Kuna ti Biblia: “Agtulnogkayo kadagiti nagannak kadakayo a maikaykaysa iti Apo, ta daytoy nalinteg.” (Efeso 6:1) Siasino ti ama ni Jesus?— ni Jehova a Dios, nga Amatayo met. (Mateo 6:9, 10) Ngem no kunaem a ni Jose ken Maria ti nagannak ni Jesus, saanka met a nagkamali. Ammom kadi no kasano a nagbalinda a nagannak ni Jesus?—

Inlawlawag ni anghel Gabriel no kasano nga agbalinto ni Maria nga ina uray no di nakidenna. Iti milagro a pamay-an, pinagbalin ni Jehova a posible dayta a panagsikog. Inlawlawag ni Gabriel ken Maria: “Ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan, Anak ti Dios.”—Lucas 1:30-35.

Innala ti Dios ti biag ti Anakna idiay langit sana inkabil iti aanakan ni Maria. Kalpasanna, dimmakkel ti biag iti aanakanna a kas iti idadakkel ti dadduma a maladaga iti aanakan ti innada. Kalpasan ti siam a bulan, naipasngay ni Jesus. Kabayatanna, ni Jose inkasarna ni Maria, isu nga impagarup ti kaaduan a ni Jose ti talaga nga ama ni Jesus. Ngem iti kinapudnona, nagserbi laeng ni Jose kas pannakaama. Maikuna ngarud a dua ti ama ni Jesus!

Idi 12 pay la ti tawen ni Jesus, adda inaramidna a mangipakita a patpatgenna unay ti nailangitan nga Amana a ni Jehova. Iti dayta a gundaway, kas kaugalian ti pamilia ni Jesus, nagdaliasatda iti adayo agingga iti Jerusalem para iti Paskua. Idi agawiddan idiay Nazaret, nadlaw da Jose ken Maria a saanda a kadua ni Jesus. Mapanunotmo kadi no apay a nalipatanda ni Jesus?—

Bueno, adda idin dadduma nga annak da Jose ken Maria. (Mateo 13:55, 56) Nalabit a kaduada pay a nagdaliasat dagiti kakabagianda a kas kada Santiago ken Juan. Karaman met ni Zebedeo nga ama da Santiago ken Juan ken ti inada a ni Salome, a mabalin a kabsat ni Maria. Isu a mabalin nga impagarup ni Maria a kimmuyog ni Jesus iti dadduma a kabagianda iti grupo.—Mateo 27:56; Marcos 15:40; Juan 19:25.

Idi nadlaw da Jose ken Maria nga awan ni Jesus, nagdardarasda a nagsubli idiay Jerusalem. Matartarantada a nangsapsapul iti anakda. Iti maikatlo nga aldaw, nasarakanda ni Jesus idiay templo. Kinuna ni Maria kenkuana: “Apay a kastoy ti inaramidmo kadakami? Adtoy ni amam ken siak a mariribukan ti panunotna sinapsapuldaka.” Ngem kinuna ni Jesus: “Apay a kasapulan a sapulendak? Saanyo aya nga ammo a masapul nga addaak iti balay ni Amak?”—Lucas 2:45-50.

Iti panagkunam, saan kadi a maiparbeng ti kasta nga isusungbat ni Jesus ken nanangna?— Bueno, ammo dagiti nagannakna  a pagaayat ni Jesus ti agdayaw iti balay ti Dios. (Salmo 122:1) Gapuna, saan kadi nga umiso laeng a panunoten ni Jesus a ti templo ti Dios ti umuna a lugar a pangsapulanda koma kenkuana?— Idi agangay, pinampanunot ni Maria ti naibaga ni Jesus.

Ania ti kababalin nga impakita ni Jesus kada Jose ken Maria?— Kuna ti Biblia: “Simmalog [ni Jesus] a kaduada ket dimteng idiay Nazaret, ket nagtultuloy a nagpasakup kadakuada.” (Lucas 2:51, 52) Ania ti masursurotayo iti ulidan ni Jesus?— Wen, rumbeng a natulnogtayo met kadagiti nagannaktayo.

Nupay kasta, saan a kanayon a nalaka ken Jesus ti agtulnog— uray iti nailangitan nga Amana.

Iti rabii sakbay ti ipapatayna, kiniddaw ni Jesus ken Jehova no mabalin nga agbaliw ti panunot ni Amana mainaig iti ipapaaramidna kenkuana. (Lucas 22:42) Ngem nagtulnog ni Jesus iti Dios uray narigat nga aramiden dayta. Kuna ti Biblia a “nasursurona ti panagtulnog manipud iti bambanag a sinagabana.” (Hebreo 5:8) Iti panagkunam, masursurotayo met kadi ti agtulnog uray iti gundaway a narigat nga aramiden dayta?—

^ par. 3 No adda ubing a kaduayo nga agbasa, ti uged ket pammalagip nga agsardengkayo biit ken paregtaenyo nga iyebkasna ti kapanunotanna.