Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN 2009-12-01

 Isuroyo Dagiti Annakyo

Saan a Simmuko ni Jeremias

Saan a Simmuko ni Jeremias

ADDA kadi gundaway a naupayka ket kayatmon ti sumuko?— * Adu ti nakarikna iti kasta. Kasta met ti narikna ni Jeremias. Nupay kasta, saan a simmuko ni Jeremias iti laksid ti makapaupay a sasao wenno ar-aramid ti dadduma. Pagsaritaantayo no kasano a nagbalin ni Jeremias a naisangsangayan iti Dios, nupay no nakarikna met idi iti pannakaupay ket kayatnan ti isusuko.

Sakbay pay a naipasngay, ni Jeremias ket pinilin ti pudno a Dios a ni Jehova nga agbalin a mammadto a mangpakdaar kadagiti tattao a saan a makaay-ayo iti Dios ti wagas ti panagbiagda. Ammom kadi no ania ti imbaga ni Jeremias ken Jehova adu a tawen kalpasanna?— “Adtoy pudno a saanko nga ammo ti agsao, ta maysaak laeng nga ubing.”

Iti panagkunam, kasano a sinungbatan ni Jehova ni Jeremias?— Iti naasi ngem natibker a pamay-an, kinuna ni Jehova: “Dika sawen, ‘Maysaak laeng nga ubing.’ No di ket kadagidiay amin a pangibaonakto kenka, rebbeng a mapanka; ket ti isuamin nga ibilinkonto kenka, rebbeng a sawem. Dika agbuteng.” Apay? “Addaak kenka tapno ispalenka,” kuna ni Jehova.—Jeremias 1:4-8.

Ngem kas iti nadakamaten, naupay ni Jeremias idi agangay. Inuy-uyawda ngamin gapu iti panagserbina iti Dios. “Nagbalinak a katkatawaan iti intero nga agmalem; tunggal maysa aramidennak a mauy-uyaw,” kinunana. Isu a kayatnan ti sumardeng. “Saanko a dakamaten [ni Jehova], ket saanakton nga agsao iti naganna,” kinunana. Ngem talaga kadi a simmuko?

“Iti pusok” kinuna ni Jeremias, “nagbalin dayta [ti sao ni Jehova] a kas sumsumged nga apuy a napupok kadagiti tulangko; ket nabannogak a nangmedmed.” (Jeremias 20:7-9) Nupay addada gundaway a nagbuteng ni Jeremias, saan a simmuko gapu iti panagayatna ken Jehova. Kitaentayo no kasano a nasalakniban ni Jeremias gapu ta saan a simmuko.

Imbilin ni Jehova ken Jeremias nga ipakdaarna kadagiti tattao a madadael ti Jerusalem no saanda a balbaliwan ti dakes a daldalanda. Idi pinakdaaran ni Jeremias dagiti tattao, nagpungtotda ket kinunada: “Iti daytoy a lalaki agpaay ti pannakaukom nga ipapatay.” Ngem impakaasi ni Jeremias kadakuada nga ‘agtulnogda iti timek ni Jehova.’ Kalpasanna, kinunana: ‘Ammoyo a no papatayendak,  awanan basol a tao ti papatayenyo, ta ni Jehova ti nangibaon kaniak a makisao kadakayo.’ Ammoyo kadi no ania ti napasamak kalpasan dayta?—

Kuna ti Biblia: “Dagiti prinsipe ken amin dagiti umili kinunada iti papadi ken kadagiti mammadto: ‘Awan pannakaukom nga ipapatay nga agpaay iti daytoy a lalaki, ta iti nagan ni Jehova a Diostayo nga isu nagsao kadatayo.’” Isu a ni Jeremias ket sinalakniban ni Jehova idi saan a simmuko iti laksid ti panagbutengna. Kitaentayo no ania ti napasamak ken Uria, ti sabali pay a propeta a naiduma ti panagtignayna.

‘Nagipadpadto ni Uria maibusor iti Jerusalem maitunos iti sasao ni Jeremias,’ kuna ti Biblia. Ngem idi nakaunget ni Ari Jehoiaquim ken ni Uria, ammom kadi no ania ti inaramid ti propeta?— Nagbuteng, saannan nga inaramid ti pagayatan ti Dios, ken nagtalaw a napan idiay Egipto. Isu a nagibaon ti ari kadagiti mangbirok ken mangisubli kenkuana. Idi nakemmegda ni Uria, ammom kadi no ania ti inaramid ti nadangkes nga ari?— Pinapatayna ni Uria babaen ti kampilan!—Jeremias 26:8-24.

Iti panagkunam, apay a ni Jehova sinalaknibanna ni Jeremias ngem saanna a sinalakniban ni Uria?— Bueno, mabalin a nagbuteng ni Jeremias a kas ken Uria, ngem saan a simmardeng ni Jeremias nga agserbi ken Jehova ken saan a nagtalaw. Saan a simmuko ni Jeremias. Ania ti mapanunotmo a leksion a masursurotayo iti ulidan ni Jeremias?— Masursurotayo a mabalin a narigat no dadduma nga aramiden ti ibagbaga ti Dios, ngem rumbeng a kanayon nga agtalek ken agtulnogtayo kenkuana.

^ par. 3 No adda ubbing a kaduam nga agbasa, ti uged ket pammalagip nga agsardengka biit ket iturongmo ti saludsod kadakuada.