Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2009-08-01

Ti Umiso a Relihion Isurona ti Panagraem iti Sao ti Dios

Ti Umiso a Relihion Isurona ti Panagraem iti Sao ti Dios

INSURO ni Jesus ti panagraem iti Sao ti Dios, ti Biblia. Nabatad dayta iti sungbatna idi sinulisog ti Diablo. (Mateo 4:4-11) Kas pagarigan, ania ti inaramid ni Jesus idi sinulisog ni Satanas a pagbalinenna a tinapay ti dadduma a bato? Inlaksid dayta ni Jesus babaen ti panangadawna iti naipaltiing a sasao ni Moises, a mabasa iti Deuteronomio 8:3. Ania ti insungbat ni Jesus idi intukon kenkuana ti Diablo ti amin a turay ditoy lubong kasukat ti uray maysa laeng a tignay ti panagdayaw? Pinagkedkedanna ti tukon babaen ti panangdakamatna iti Nainkasuratan a prinsipio a masarakan iti Deuteronomio 6:13.

Panunotem daytoy! Nupay ni Jesus ket Anak ti Dios, ti Biblia ti kangrunaan a nagpannurayanna no mangisursuro. Ken saanna a pulos nga inkompromiso ti Sao ti Dios tapno laeng maay-ayona dagiti tattao. (Juan 7:16-18) Ngem adu a lider ti relihion idi kaaldawan ni Jesus ti saan a mangraraem iti Sao ti Dios. Apay? Impangpangrunada dagiti tradision ti tao imbes a ti Sagrado a Kasuratan. Sipaprangka a kinuna ni Jesus kadagita a lider ti relihion: “Iti kasta, laksidenyo ti pannursuro ti Dios tapno surotenyo ti bukodyo a pannursuro. Dakayo nga aginsisingpet! Pudno unay ti impadto ni Isaias maipapan kadakayo: ‘Kuna ti Dios, dagitoy a tattao kunkunada a dayawendak, ngem adayo ti pusoda kaniak. Awan serserbi ti panagdaydayawda kaniak gapu ta isursuroda dagiti linteg nga aramid ti tao ket ibilangda a bilinko.’”—Mateo 15:6-9, Ti Baro a Naimbag a Damag Biblia.

Adu a relihion ditoy lubong, Kristiano man wenno saan, ti mangibagbaga a raemenda ti  Biblia. Ngem mano a relihion ti ammom a mangilaksid kadagiti tradision ti tao no saan a maitunos dagita kadagiti pannursuro ti Sao ti Dios? Usigem ti uray dua laeng a pagarigan.

TOPIKO: Narelihiosuan a titulo.

NO ANIA TI ISURSURO TI BIBLIA:

Kinondenar ni Jesus dagiti lider ti relihion idi kaaldawanna gapu iti panagayatda iti titulo ken panagtarigagayda iti kinalatak. Kinunana a “magustoanda dagiti katan-okan a lugar kadagiti fiestaan ken kangrunaan a tugaw kadagiti sinagoga. Magustoanda ti makablaawan iti publiko ken maawagan iti ‘Maestro.’” Kalpasanna, kinuna ni Jesus kadagiti adalanna: “Ngem saancay coma a managan ti Rabbi; ta maymaysa laeng ti mannursuroyo, ket dacay amin agcacabsatcayo. Ket awan ti naganenyo ti amayo itoy rabaw ti daga; ta maymaysa ti Amayo, isu nga adda sadi langit.”—Mateo 23:1-10, Ti Biblia, PBS.

SALUDSOD:

Dagiti kadi lider daytoy a relihion kaay-ayoda dagiti pammadayaw a titulo ken tarigagayanda ti agbalin a nalatak iti komunidad, wenno likliklikanda dagita kas panangtungpal iti bilin ni Jesus?

TOPIKO: Panagusar kadagiti ladawan iti panagdayaw.

NO ANIA TI ISURSURO TI BIBLIA:

“Dica mangaramid iti maipaay kenca a ladawan a kinitikitan, uray ania a catulad ti adda idiay ngato sadi langit, wenno ti adda iti baba ditoy daga, wenno ti adda iti danum iti uneg ti daga: Dica irucnoy ti bagim cadacuada wenno pagservian ida.”—Exodo 20:4, 5, Ti Biblia, PBS.

Insurat ni apostol Juan kadagiti Kristiano: “Adaywanyo dagiti didiosen.”—1 Juan 5:21, Naimbag a Damag, 1983 nga edision.

SALUDSOD:

An-annuroten kadi daytoy a relihion ti nalawag a bilin ti Biblia a saan a panagusar kadagiti ladawan ken idolo iti panagdayaw iti Dios?

Mabirokam ti Umiso a Dalan

Iti laksid ti nagadu a relihion ita, mabirokam daydiay agturong iti biag. Adu ti pakabigbigan “ti pudno a relihion nga awan pakapilawanna iti imatang ti Dios.” (Santiago 1:27, Naimbag a Damag) Dagiti teksto a nailawlawag kadagitoy nga artikulo ket mabalin nga agserbi kas tanda a mangiturong kenka iti dayta a relihion.

Apay a dimo kiddawen kadagiti Saksi ni Jehova nga ilawlawagda dagiti sungbat kadagiti saludsod a nadakamat kadagitoy nga artikulo? Bayat a pampanunotem ti sungbatda, surotem ti nasayaat nga ulidan dagiti agnanaed iti siudad ti Berea idi umuna a siglo. Kalpasan a nangngegda ti inkasaba ni apostol Pablo, ‘inadalda dagiti Nasantoan a Sursurat tapno ammoenda no pudno met laeng ti sasawen ni Pablo.’ (Aramid 17:11, Naimbag a Damag) No raraemem ti Sao ti Dios ken sipapasnek nga adalem dayta kas iti inaramid dagiti taga-Berea, mabirokam ti dalan nga agturong iti biag. Kalpasanna, sika ti agdesision no kayatmo ti magna iti dayta a dalan.

Ania a relihion ti mangiparparegta kadagiti tattao nga agadalda iti Biblia tapno makitada no umiso ti maad-adalda?