Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2009-08-01

Ti Umiso a Relihion Isurona ti Nangato a Moral a Pagalagadan

Ti Umiso a Relihion Isurona ti Nangato a Moral a Pagalagadan

TI UMISO a relihion isuronatayo a mangpasayaat iti panagpampanunot ken konduktatayo. Tulongannatayo nga agaramid iti umiso ken pagbalinennatayo a nasaysayaat a tao. Apay a maikunatayo ti kasta?

Imutektekam ti insurat ni apostol Pablo kadagiti Kristiano idi umuna a siglo nga agnanaed iti Corinto idiay Grecia. Agdindinamag dayta a nagkauna a siudad gapu kadagiti imoral nga umilina. Impakdaar ni Pablo: “Dagiti tattao nga imoral, dagiti agrukbab kadagiti didiosen, dagiti mannakikamalala, dagiti aggartem iti padada a lalaki wenno padada a babai wenno dagiti agag-agaw, naagum, mammartek, mamadpadakes wenno dagiti mannanakaw—awanto kadakuada ti makipagtagikua iti Pagarian ti Dios.” Kalpasanna, innayonna: “Kasta ti sumagmamano kadakayo idi. Ngem naugasankayon iti basol, naidatonkayon iti Dios, napalintegkayon iti imatang ti Dios babaen iti nagan ni Apotayo a Jesu-Cristo ken babaen iti Espiritu ti Diostayo.” (1 Corinto 6:9-11, Ti Baro a Naimbag a Damag Biblia) Wen, ti umiso a relihion natulonganna ti dadduma a sigud nga imoral a tattao tapno agbalinda a nadalus ken nalinteg nga adipen ti Dios!

Iti kasumbangirna, namakdaar ti Biblia: “Dumtengto ti tiempo a di ipangag dagiti tattao ti pudno a pannursuro, ngem surotendanto dagiti tarigagayda, ket dawatendanto iti ad-adu pay a maestro a mangibaga kadakuada iti pagay-ayatda a dengdenggen.”—2 Timoteo 4:3, Naimbag a Damag.

Kasta kadi ti ar-aramiden dagiti pagaammom a relihion? Isursuroda kadi ti nangato a moral a pagalagadan ti Biblia? Wenno inaramidda a nalibeg dagiti nalawag a balakad ti Sao ti Dios, nga ibagada laeng no ania ti ‘pagay-ayat a denggen’ dagiti tattao?

Tapno nalaklakam a mailasin no mangpatpataud iti nasayaat a bunga ti maysa a relihion, apay a dimo iwayaan a sungbatan dagiti sumaganad a saludsod?

TOPIKO: Panagasawa.

NO ANIA TI ISURSURO TI BIBLIA:

“Ti panagasawa nadayaw coma kadagiti isu-amin, ket ti pagiddaan awam coma ti tulawna; ta ti Dios ocomennanto dagiti mannakiabig ken dagiti mannakicamalala.”—Hebreo 13:4, Ti Biblia, PBS.

SALUDSOD:

Daytoy kadi a relihion ikalikagumna kadagiti agassawa a miembrona a masapul a legal a nagkasarda?

TOPIKO: Diborsio.

NO ANIA TI ISURSURO TI BIBLIA:

Idi insaludsodda ken Jesus no adda aniaman a pakaibatayan ti diborsio, kinunana: “Siasinoman a mangidiborsio iti asawana a babai, malaksid iti pakaibatayan a pannakiabig, ket mangasawa iti sabali makaaramid iti pannakikamalala.”—Mateo 19:9, Ti Nasantuan a Kasuratan.

SALUDSOD:

Raraemen kadi daytoy a relihion ti bilin ni Jesus ken ipalubosna laeng ti diborsio ken pannakiasawa manen no maigapu dayta iti pannakiabig?

TOPIKO: Seksual nga imoralidad.

NO ANIA TI ISURSURO TI BIBLIA:

“Adaywanyo ti pannakicamalala. Uray ania a basol nga aramiden ti tao, adda iti ruar ti bagi; ngem ti mannakicamalala, agbasol iti makadadael iti bagina met laeng.”—1 Corinto 6:18, Ti Biblia, PBS.

“Uray ti babai, saanen a makikaidda iti lalaki. Ti laengen padana a babai ti kaiddaenna.  Kasta met ti lalaki. Ti laengen padana a lalaki ti kaiddaenna ket sumgedda iti kinaderrep. Nakababain ti ar-aramidenda iti maysa ken maysa. Isut’ gapuna a madusada a kas kaikarianda gapu iti dakes nga aramidda.”—Roma 1:26, 27, Naimbag a Damag.

SALUDSOD:

Isursuro kadi daytoy a relihion a basol ti seksual nga imoralidad, iti man nagbaetan ti agkasungani a sekso wenno agkasekso?

TOPIKO: Situtured a panangyaplikar dagiti miembrona kadagiti pagalagadan ti Biblia.

NO ANIA TI ISURSURO TI BIBLIA:

“Isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti didiosen wenno manangrabngis wenno managbarbartek wenno manangkikil, saan uray makipangan iti kasta a tao.” (1 Corinto 5:11, Ti Nasantuan a Kasuratan) Ania koma ti mapasamak kadagidiay agkunkuna a Kristiano ngem gaggagaraenda ti agbasol? “Iccatenyo ngarud daydiay tao a dakes iti tengngayo,” kuna ti Sao ti Dios.—1 Corinto 5:13, Ti Biblia, PBS.

SALUDSOD:

Ilaksid kadi daytoy a relihion ti asinoman a miembrona a mangigaggagara a manglabsing kadagiti pagalagadan ti Biblia?

Ania a relihion ti pagaammo a mangyap-aplikar kadagiti nangato a moral a pagalagadan ti Biblia?