Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2009-08-01

Umiso Kadi ti Amin a Relihion?

Umiso Kadi ti Amin a Relihion?

NAGADU ti relihion ita. Sigun iti maysa a nabiit pay a surbey, adda 19 a kangrunaan a relihion ken agarup 10,000 a babbabassit a relihion iti intero a lubong. Ita pay laeng a kastoy kaadu ti relihion a mabalin a pagpilian dagiti tattao. Gapuna, napateg kadi no ania a relihion ti piliem?

Adda dagiti agkuna a dagiti nagduduma a relihion ket arigna nga agsasabali a dalan nga agturong iti maymaysa a bantay. Para kadakuada, saan a napateg no ania a dalan ti piliem, yantangay agturong amin dagitoy iti maymaysa a lugar. Ibagada a gapu ta adda maymaysa a Mannakabalin-amin a Dios, sigurado nga agturong kenkuana ti amin a relihion.

Agturong Kadi iti Dios ti Amin a Dalan?

Ania ti kuna ni Jesu-Kristo, maysa kadagiti kangrunaan a mararaem a narelihiosuan a mannursuro iti historia, maipapan iti dayta a banag? “Sumrekkayo iti nailet a ruangan,” kinunana kadagiti adalanna. Apay? “Ta nalawa ti ruangan ken kasta met ti dalan nga agturong iti agnanayon a pakadadaelan, ket adu ti magna sadiay. Ngem nailet ti ruangan ti biag ken narigat ti dalan nga agturong iti biag, ket manmano ti makasarak.”—Mateo 7:13, 14, Ti Baro a Naimbag a Damag Biblia.

Kayat kadi a sawen ni Jesus nga agturong iti “pakadadaelan” ti dadduma a relihion? Wenno isursurona kadi a dagiti laeng saan a mamati iti Dios ti adda iti nalawa a dalan, ket dagidiay mamati iti Dios—aniaman ti relihionda—isuda ti adda iti nailet a dalan nga agturong iti biag?

Kalpasan la unay a dinakamat ni Jesus nga adda laeng dua a dalan, kinunana: “Agaluadcayo cadagiti naulbod a mammadto nga umayda cadacayo a nacacawes a cas la carnero, ngem iti unegda loboda a narawet.” (Mateo 7:15, Ti Biblia, Philippine Bible Society) Idi agangay, kinunana: “Saan a ti tunggal maysa nga agkuna kaniak iti ‘Apo, Apo,’ makastrekto iti Pagarian ti langit, no di laeng dagiti mangtungpal iti  pagayatan ni Amak sadi langit.” (Mateo 7:21, Naimbag a Damag) No ti maysa ket maawagan a mammadto wenno ibagana a ni Jesus ti ‘Apona,’ sigurado nga adda relihion dayta a tao. No kasta, nalawag nga ibagbaga ni Jesus a saan nga amin a relihion ket umiso ken saan nga amin a narelihiosuan a mannursuro ket rumbeng a pagtalkan.

Posible Kadi a Mailasin ti Nailet a Dalan?

Ti Biblia ket nayarig iti mapagpannurayan a mapa a makatulong iti maysa a tao a mangbirok iti umiso a relihion

Yantangay saan nga amin a dalan ket agturong iti Dios, kasano ngarud a mailasinmo ti nailet a dalan nga agturong iti biag idinto ta rinibu dagiti pagpiliam? Usigem daytoy nga ilustrasion: Ipapantayo a nayaw-awanka iti dakkel a siudad. Kayatmo ti agpatulong. Adda sikokompiansa a nangibaga kenka nga agpadayaka. Adda met nangibaga nga agpalaudka. Kaskasdi, isingasing ti sabali a mapanka iti direksion a mariknam a kasayaatan. Kamaudiananna, adda padam nga agdaldaliasat a nangiruar iti mapagpannurayan a mapa ket impakitana kenka ti umiso a dalan. Kalpasanna, intedna ti mapa tapno adda pangkitaam iti umiso a direksion. Saan kadi a nataltalged ti riknam a makadanonka iti papanam?

No maipapan iti panangpili iti umiso a relihion, kasapulantayo met ti mapagpannurayan a naespirituan a mapa. Adda kadi kasta a mapa? Wen, adda. Isu ti Biblia, a nagkuna: “Impaltiing ti Dios ti amin a Nasantoan a surat, ket naserbi a pangisuro iti kinapudno, pangbabalaw, pangatur iti biddut ken pakasursuroan iti nalinteg a panagbiag.”—2 Timoteo 3:16, Naimbag a Damag.

Mabalin nga adda magun-odam nga Iloko a patarus ti Biblia a mabalinmo nga usaren kas naespirituan a mapa. Dagiti Saksi ni Jehova a nangipablaak iti daytoy a pagbasaan nangpataudda iti mapagtalkan a patarus ti Biblia a pagaammo kas ti Baro a Lubong a Patarus ti Nasantuan a Kasuratan. Ngem no saanka a Saksi ni Jehova, mabalin a kaykayatmo nga usaren ti dadduma a patarus bayat nga usigem ti topiko maipapan iti panangilasin iti umiso ken palso a relihion. Gapuna, nagkotar daytoy a serye dagiti artikulo manipud iti nagduduma a patarus ti Biblia a raraemen ti dadduma a relihion.

Bayat a basbasaem dagiti sumaganad nga artikulo, pagdiligem ti dati nga ammom ken ti linaon ti Biblia. Silalagipka koma iti kinuna ni Jesus no kasano a mailasin ti umiso a relihion. Kinunana: “Tunggal cayo a nasayaat, mangted bungbunga a nasayaat, ngem ti cayo a dakes, mangted bungbunga a dakes. Ti nasayaat a cayo saanna a mabalin ti mangted bungbunga a dakes, kasta met ti cayo a dakes di met macaited iti bungbunga a nasayaat.” (Mateo 7:17, 18, Ti Biblia, PBS) Usigem ti uray tallo laeng kadagiti nasayaat a bunga a dinakamat ti Biblia a pakabigbigan ti “cayo a nasayaat.”